Ukrayna Silahlı Qüvvələrinin sabiq baş komandanı Valeri Zalujnı prezident Volodimir Zelenskiyə dövlət başçısı postuna namizədliyini irəli sürmək niyyətində olduğunu bildirib. Bu barədə "Ukrainska pravda" nəşri öz mənbələrinə istinadən məlumat yayıb.
Nəşrin həmsöhbətlərinin sözlərinə görə, iyunun ortalarında Zelenski Prezident Ofisinin rəhbəri Kirilo Budanov, onun müavini Oleq Tatarov, "Xalqın xidmətçisi" fraksiyasının lideri David Araxamiya, müdafiə naziri Mixaylo Fyodorov və Milli Təhlükəsizlik və Müdafiə Şurasının katibi Rustem Umerovla qapalı görüş keçirib. "Ukrainska pravda"nın məlumatına görə, görüşdə 2026-cı ilin payızında prezident seçkilərinin keçirilməsi imkanları müzakirə edilib. Buna səbəb qapalı sosioloji sorğunun nəticələri olub. Həmin araşdırmaya əsasən, Zelenskinin reytinqindəki geriləmə dayanıb, ona dəstək isə yenidən cüzi artmağa başlayıb. Nəşrin iddiasına görə, sorğunun nəticələrinə əsasən, birinci turda seçicilərin 33 faizi Zelenskiyə, 22 faizi Zalujnıya, 14 faizi isə Budanova səs verməyə hazırdır. Bununla belə, ikinci turda Zelenski hələlik Zalujnıya uduzur — 32 faizə qarşı 37 faiz. Məlumata görə, Zelenski potensial rəqibinin planlarını öyrənmək məqsədilə hazırda Ukraynanın Böyük Britaniyadakı səfiri olan Zalujnını Kiyevə çağırıb. Görüş üçün rəsmi bəhanə kimi Böyük Britaniyanın baş naziri Kir Starmerin mümkün istefasına hazırlıq məsələsi göstərilib. Mənbələr iddia edir ki, Zelenski Zalujnıdan payızda seçkilər keçiriləcəyi təqdirdə namizəd olub-olmayacağını soruşub. Zalujnı isə cavabında qısaca deyib: "Bəli, olacağam".
Volodimir Zelenski döyüşlər başa çatandan sonra seçkilərin keçirilməsinə hazır olduğunu bildirib. "The Associated Press" agentliyi Zalujnının Zelenskinin əsas siyasi rəqibi sayıldığını, amma 52 yaşlı səfirin siyasi ambisiyalarını müzakirə etmək istəmədiyini yazır. Zalujnı deyir ki, Rusiyanın təcavüzkar müharibəsi ilə üzləşmiş ölkəsində milli birliyə zərbə vurmaq istəmir. "The Associated Press" yazır: "Amma Zalujnının Zelenski ilə dərin uçurumu haqda ilk dəfə açıq danışması onun müharibə başa çatandan sonra prezidentliyə namizədliyini vermək arzusunun əlaməti ola bilər". Zalujnı 2022-ci ildə prezident Volodimir Zelenski ilə tez-tez münaqişələr yaşamasından danışıb. O deyib ki, məhz bu səbəbdən Ukrayna Təhlükəsizlik Xidməti onun ofisində axtarış aparıb. Zalujnının sözlərinə görə, axtarışlar 2022-ci ilin sentyabrında, ordu ölkənin şimal-şərqində əks-hücum əməliyyatı apardığı vaxt baş verib. Prezidentin qərargahında gərgin müşavirədən sonra o, kabinetinə qayıdıb, bir neçə saat sonra Ukrayna Təhlükəsizlik Xidmətinin onlarla əməkdaşı oraya gəlib. Həmin vaxt otaqda 10-dan çox britaniyalı zabit olubmuş. Zalujnının sözlərinə görə, Ukrayna Təhlükəsizlik Xidməti əməkdaşları nə axtardıqlarını deməyiblər, o isə onların sənədləri və kompüterləri axtarmalarına mane olub. Ukrayna Təhlükəsizlik Xidməti Zalujnının ofisində nə vaxtsa axtarış aparılmadığını bildirib. Zalujnı danışır ki, prezidentin hərbi strategiyasına tez-tez etiraz edib. Dediyinə görə, Zelenski ilə fikir ayrılıqları ölkənin müdafiəsi ilə bağlı olub. Ən böyük mübahisə 2023-cü ildə Ukrayna ordusunun əks-hücum əməliyyatı vaxtı yaranıb. Zalujnı əməliyyatın iflasını qüvvələrin cəbhə xətti boyunca səpələnməsi ilə izah edib. Prezident və digər rəsmilər bu əməliyyat üçün silahlı qüvvələrə yetərincə resurs ayırmayıblar. Keçmiş baş komandan bildirib ki, ilkin plan Rusiya qüvvələrini Zaporojye vilayətindən çıxarmaq, daha sonra isə Azov dənizinə çatmaq idi. Lakin Ukrayna ordusunun qüvvələri böyük əraziyə dağılıb, resurs çatmayıb. 2024-cü il fevralın əvvəlində Zelenski Zalujnını vəzifədən azad edib, ona "Ukrayna qəhrəmanı" fəxri adını verib. Zalujnı Ukraynanın Böyük Britaniyada səfiri təyin olunub. Onda bəzi siyasi təhlilçiləri bunu ovaxtkı baş komandanın Zelenski üçün siyasi rəqib potensialını məhdudlaşdırmaq cəhdi adlandırıb.
Samirə SƏFƏROVA
