Ramil Məmmədli: “102-ci baza Cənubi Qafqazın təhlükəsizliyinin təmin edilməsində əsas element deyil”
Rusiya XİN başçısının müavini Mixail Qaluzin Ermənistandakı Rusiyanın 102-ci hərbi bazası ilə bağlı diqqət çəkən açıqlama verib. Qaluzin bildirib ki, Ermənistan tərəfindən Gümrüdə yerləşən bazanın fəaliyyətinin dayandırılması ilə bağlı rəsmi səviyyədə heç bir siqnal verilməyib.
Diplomatın sözlərinə görə, Moskva bu bazanın həm Ermənistanın, həm də bütövlükdə Cənubi Qafqazın təhlükəsizliyinin təmin edilməsində əsas element olduğuna əmindir: “Ermənistan tərəfi rəsmi olaraq İrəvanın Gümrüdəki Rusiya hərbi bazasını bağlamağı düşünmədiyini bildirib. Biz əminik ki, bu baza həm Ermənistanın özünün, həm də bütövlükdə Cənubi Qafqazın təhlükəsizliyinin təmin edilməsində əsas elementdir”.
Göründüyü kimi, Qaluzin iddia edir ki, 102-ci baza nəinki Ermənistanın, bütövlükdə Cənubi Qafqazın təhlükəsizlik təminatıdır. Maraqlıdır, bu baza həqiqətən Cənubi Qafqazın təhlükəsizlik təminatı hesab oluna bilər?
Sözügedən məsələyə aydınlıq gətirən hərbi ekspert Ramil Məmmədli baki-xeber.com-a açıqlamasında bunu istisna etdi: “102-ci baza Cənubi Qafqazın təhlükəsizliyinin təmin edilməsində əsas element deyil. Belə bir yanaşma tamamilə əsassız və məntiqsizdir. Bunun nə siyasi, nə də hərbi əsası yoxdur. Rusiyanın Ermənistan ərazisindəki 102-ci hərbi bazası dövlətlər arasında 1995-ci ildə əldə edilmiş razılaşmaya görə Gümrüdə, habelə İrəvanın özündə yerləşir. Söhbət Erebuni hərbi hava bazasından gedir. Baza 1992-ci ilin avqustunda formalaşıb. Onun statusu ilə bağlı yekun razılaşmalar 1995-ci ildə əldə edilib. 2011-ci ildə bazanın qalma müddəti uzadılıb. Belə ki, həmin il Rusiyanın məlum bazasının Ermənistanda qalma müddəti barədə razılığın müddəti 2044-ci ilədək uzadılıb. Rusiya Ermənistanda hərbi bazalarını yerləşdirməklə regionun təhlükəsizliyinə töhfə vermək məqsədi güdməyib. Rusiya Ermənistandakı hərbi bazalar hesabına Cənubi Qafqazda öz təsir sferasını genişləndirməyə çalışıb. Müəyyən mənada bazalar hesabına regionu təzyiq altında saxlamağa cəhd edib. Azərbaycan müstəqil siyasət yeridir və 1993-cü ildə Rusiya hərbçilərinin ölkədən çıxarılmasına nail olub. Əvvəl elə idi ki, Rusiya Qarabağın işğalından istifadə edərək hər iki ölkəni təzyiq altında saxlaya bilirdi. Azərbaycan ərazi bütövlüyünü və suverenliyini tam təmin etdikdən sonra bu təsir aradan qalxdı. Belə baxanda Azərbaycan işğala son qoymaqla həm də Ermənistanın siyasi suverenliyinə töhfə verdi. Əgər əvvəlki status-kvo qalsaydı, Ermənistan indiki kimi siyasət yeridə bilməzdi. Moskvadan daha çox asılı olardı. Bir sözlə, Qaluzinin 102-ci baza ilə bağlı dəyərləndirməsi reallığa söykənmir”.
Vidadi ORDAHALLI
