Zaur İbrahimli: "Azərbaycan bütün mümkün vasitələrlə Korsika xalqının mübarizəsinə mənəvi-siyasi dəstək verib..."
Rauf Zeyni:"Ölkəmiz onların hüquqlarının müdafiəsi sahəsində təşəbbüs göstərib"
Şakir Ağayev:“Azərbaycanın rolu danılmazdır”
Fransa Milli Assambleyasında Korsikanın Fransa Respublikası daxilində xüsusi muxtariyyət statusunun təsbit edilməsini nəzərdə tutan konstitusiya qanunu layihəsinin qəbul olunub.
Azərbaycan Milli Məclisi Korsika Xalqına Dəstək Qrupu Fransa Milli Assambleyasında qəbul edilmiş konstitusiya qanunu layihəsinə dair bəyanat yayıb.
Bəyanatda deyilir:"Fransa Milli Assambleyasında Korsikanın Fransa Respublikası daxilində xüsusi muxtariyyət statusunun təsbit edilməsini nəzərdə tutan konstitusiya qanunu layihəsinin qəbul olunması Korsika xalqı üçün mühüm mərhələdir. Qanun layihəsi adanın tarixi, mədəni, sosial və coğrafi xüsusiyyətləri nəzərə alınmaqla Korsikaya daha geniş özünüidarəetmə səlahiyyətlərinin verilməsini nəzərdə tutur və bu baxımdan Korsika xalqının uzun illər ərzində apardığı dinc, demokratik və ardıcıl mübarizənin mühüm siyasi nəticəsi kimi qiymətləndirilir.
Biz, Milli Məclisin Korsika Xalqına Dəstək Qrupu olaraq, Korsika xalqının bu əzmini, qətiyyətini və demokratik prinsiplərə sadiqliyini yüksək qiymətləndirir, onları səmimi qəlbdən alqışlayırıq. Korsika xalqının öz gələcəyini müəyyənləşdirmək istiqamətində nümayiş etdirdiyi əzm və qətiyyət bir daha göstərir ki, xalqların legitim tələbləri gec-tez siyasi müstəvidə öz əksini tapır. Bu baxımdan Fransa Milli Assambleyasında qəbul olunmuş qərar yalnız qanunvericilik aktı deyil, həm də Korsika xalqının uzunmüddətli mübarizəsinin mühüm siyasi nailiyyətidir.
Ümidvarıq ki, Fransa Senatı da tarixi məsuliyyət nümayiş etdirərək Fransa Milli Assambleyasının qəbul etdiyi qərarı dəstəkləyəcək və bununla da Korsika xalqının demokratik iradəsinə hörmət ifadə edəcək. Azərbaycan Respublikası Milli Məclisinin Korsika Xalqına Dəstək Qrupu bundan sonra da Korsika xalqının qanuni hüquqlarının, demokratik iradəsinin və dinc siyasi mübarizəsinin beynəlxalq ictimaiyyət tərəfindən obyektiv qiymətləndirilməsini dəstəkləməyə davam edəcək".
Korsika xalqının bu qələbəsində Azərbaycanın rolu nə qədərdir?
Politoloq Zaur İbrahimli baki-xeber.com-a bildirdi ki, Azərbaycanın Korsika xalqının azadllıq mübarizəsinə geniş dəstək verib. "Bu ölkəmizin neomüstəmləkəçiliyə qarşı apardığı sistemli siyasətin bir hissəsidir. Bu siyasət bir neçə istiqamətdə özünü göstərir. Azərbaycan hər zaman Fransanın Korsika dilinə qadağa qoyması kimi müstəmləkəçi siyasətini gündəliyə gətirib və beynəlxalq platformalarda qaldırıb. Zamanında Fransanın Qarabağdakı separatizmi dəstəkləməsi də neomüstəmləkəçilik yanaşmasının təzahürü kimi dəyərləndirilib. Bakı Təşəbbüs Qrupu İctmai Biriyi beynəlxalq arenada keçmiş Fransa müstəmləkələri olan müxtəlif ərazilərin, o cümlədən Korsika da daxil olmaqla xalqlarına ictimai təşəbbüslərlə dəstək verib və bu mövzuda beynəlxalq konfranslar təşkil edib. Azərbaycan bütün mümkün vasitələrlə Korsika xalqının mübarizəsinə mənəvi-siyasi dəstək verib, Fransanın müstəmləkəçilik siyasətinə qarşı beynəlxalq platformalarda geniş və ardıcıl kampaniya aparıb. Bu, həm də Azərbaycanın özünün keçmiş münaqişələr fonunda beynəlxalq hüquq və xalqların öz müqəddəratını təyinetmə hüququ məsələlərinə verdiyi əhəmiyyəti nümayiş etdirir. Korsika xalqının azadllıq mübarizəsində bu uğura nail olmasında Azərbaycanın verdiyi mənəvi-siyasi dəstəyin də töhfəsi olub". Z.İbrahimli qeyd etdi ki, xüsusən heç kimin danışmaq istəmədyi halda Azərbacyan QHT-ləri, ekspertləri bu mövzuda Korsika xalqının səsini dünyaya çatdırmağa çalışıblar.
Bakı İctimai Əməkdaşlıq Mərkəzinin sədri Rauf Zeyni baki-xeber.com-a uzun müddətdir Azərbaycan ictimaiyyəti, Azərbaycan Qeyri-Hökumət Təşkilatı, Bakı Təşəbbüs Qrupu bu istiqamətdə, yəni azsaylı xalqların milli müqəddəratı, milli azadlığı haqqında tədbirlər həyata keçirdir. “Ölkəmiz onların hüquqlarının müdafiəsi sahəsində təşəbbüs göstərib. Bir neçə beynəlxalq konfranslar keçirilib. Korsika və digər etnik xalqların özlərini bəyan etməsi, öz talelərini özləri həll etməsi, beynəlxalq hüquqlarının qorunması istiqamətində Bakı Təşəbbüs Qrupu və onun sədri Abbas Abbasov çox böyük fəallıq göstərib. Həm beynəlxalq səviyyədə, həm Azərbaycanda bir neçə tədbirlər həyata keçirilib. Düşünürəm ki, bugün Fransa Milli Assambleyasında milli azlıq olan Korsika xalqının konstitusiya qanun layihəsi qəbul olunub. Azərbaycan Milli Məclisi də bununla əlaqədar olaraq bəyanat yayıb. Azərbaycan ictimaiyyətinin, konkret Bakı Təşəbbüs Qrupunun burada çox böyük xidməti, zəhməti və fəaliyyəti var. Düşünürəm ki, biz öz milli maraqlarımızı, öz hüquqlarımızı qorumaqla yanaşı, əlbəttə ki, beynəlxalq aləmdə ehtiyac olduğu halda müəyyən bir xalqların, millətlərin hüquqlarını da qorumaq imkanını əldən buraxmamalıyıq. Azərbaycan Qoşulmama Hərəkatına rəhbərlik etdi və o hərəkat beynəlxalq təşkilat kimi Azərbaycanın rəhbərliyi dövründə təşkilatlandı”.
“Novoye vremya” qəzetinin baş redaktoru Şakir Ağayev də baki-xeber.com-a bildirdi ki, Fransa Milli Assambleyasına qəbul edilmiş məlum layihə Korsika xalqının xeyrinə olan məsələdir. “Sözsüz ki, bu çox müsbət qəbul olunur. Yəni çox müsbət bir tendensiyadır. Burada Azərbaycanın rolu danılmazdır. Korsika xalqının hüquqları uğrunda Azərbaycan mübarizə aparıb, onların haqqı üçün nə lazımdırsa edib. Deyərdim, Azərbaycan kimi davranan ikinci bir dövlət olmayıb. Azərbaycanın da dəstəyi ilə yaradılan Təşəbbüs Qrupu vasitəsilə Birləşmiş Millətlər Təşkilatı səviyyəsində, bütün beynəlxalq təşkilatlarda və bütün danışıqlarda Təşəbbüs Qrupu tərəfindən Korsika xalqının hüquqları müdafiə olundu. Bilirsiniz ki, keçən illərdə onların hüquqları çoxu sürətdə pozulurdu. Seçki hüquqları əlindən alınırdı. Hətta Korsika xalqı Azərbaycanın rolunu o dərəcə qiymətləndirirdi ki, bilirsiniz ki, öz bayrağı ilə paralel Azərbaycanın bayrağını qaldırıb. Azərbaycan Prezidentinin beynəlxalq tədbirlərdə bu məsələni qaldırması, müxtəlif xarici və yerli mətbuata verdiyi müsahibələrdə neokolonializmin orada hökmran olduğunu bildirmiş, Korsika xalqının öz hüquqlarını özünə qaytarılmaq məsələsi dəfələrlə qaldırılmışdı. Sözsüz ki, bu öz müsbət rolunu oynayıb, təsirini göstərib. Bu Azərbaycanın bir dövlət kimi neokolonializmə qarşı diplomatik qələbəsidir”-deyə Ş.Ağayev qeyd etdi.
İradə SARIYEVA
