Reuters jurnalistlərinin əldə etdiyi məxfi sənədlər və Avropa diplomatlarının ifadələri sayəsində elit Çin hərbi obyektlərində Rusiya hərbçiləri üçün gizli təlim proqramının olduğu ortaya çıxıb.
Agentliyin xəbərində deyilir ki, proqram 2025-ci ilin avqustunda Rusiya müdafiə naziri Andrey Belousovun şəxsi əmri ilə başladılıb. Müqaviləni Rusiya general-mayoru Rüstəm Xusainov və Çin baş polkovniki Sun Dayun imzalayıb.
Proqrama hər iki tərəfdən ən azı dörd general cəlb olunub.
Avropa kəşfiyyatı təxminən 200 Rusiya hərbçisinin bu təlim proqramını başa vurduğunu qeydə alıb. Onlardan bəziləri qayıtdıqdan dərhal sonra döyüş zonasına qayıdıb.
Analitiklər iştirakçıların şəxsi məlumatlarını və fotoşəkillərini əldə ediblər. Bu fotolarda rus zabitlərinin nüvə reaktorunun modelini araşdırdığı və Çin mütəxəssislərinin mühazirələrini dinlədiyi görünür.
Proqrama real döyüş şəraitində kimyəvi kəşfiyyatın təşkili və aparılması, radiasiya kəşfiyyatı və texnogen fəlakətlərin nəticələrinin aradan qaldırılması üsulları, hərbi obyektlərin mürəkkəb ventilyasiya sistemlərinin kimyəvi və radiasiya çirklənməsindən qorunması kimi məsələlərin dərindən öyrənilməsi daxil idi.
Avropa Birliyinin xarici işlər naziri Kaja Kallas rəsmi olaraq Brüsselin məlumatı öz kəşfiyyat kanalları vasitəsilə yoxladığını və faktın təsdiqləndiyini bildirib. Çin Xarici İşlər Nazirliyi isə AB-nin açıqlamalarını "təmiz böhtan" adlandırıb və ittihamların əsassız olduğu bildirib.
Eyni zamanda, Rusiya tərəfi də sərt inkar taktikasını seçib. Dövlət Dumasının Müdafiə Komitəsinin sədri Andrey Kartapolov istintaqı "tam cəfəngiyat" adlandıraraq deyib ki, əsl döyüşün sərt məktəbindən keçmiş Rusiya hərbçilərinin "sadəcə olaraq Çindən öyrənəcəkləri bir şey yoxdur".
SAMİRƏ
