Abutalıb Səmədov: “Sentyabr ayında keçiriləcək yeni seçkilərdə parlamentdə qadınların sayı bir qədər artıq olacaq”
Rusiya Federasiya Şurasının sədri Valentina Matviyenko qarşıdakı parlament seçkiləri ərəfəsində "Yedinaya Rossiya" (Vahid Rusiya) partiyasının qadın namizədləri qarşısında çıxış edərək yeni təmayül və əsas vəzifəni müəyyən edib. Valentina Matviyenko bildirib ki, Dövlət Duması seçkilərində iştirak edən “Yedinaya Rossiya” nümayəndələri prezidentin və böyük Rusiya partiyasını təmsil etdiklərini unutmamalıdırlar.
Federasiya Şurasının sədri “Yedinaya Rossiya"nın Qadın Hərəkatının üzvləri ilə görüşüb, onların çoxu Dövlət Duması seçkilərində partiya siyahısına daxil edilib. Matviyenko həmçinin qeyd edib ki, partiya sıralarında ölkənin ictimai-siyasi həyatında fəal iştirak edən istedadlı, məsuliyyətli və gözəl qadınları görməkdən məmnundur.
Matviyenko vurğulayıb ki, Dövlət Dumasında qadın deputatların sayını əhəmiyyətli dərəcədə artırmaq lazımdır. Rusiyada hədəf nədir? Niyə Dumada qadın deputatların sayını artırmaq istəyirlər?
“Alyans”SAM-ın sədri Abutalıb Səmədov baki-xeber.com-a bildirdi ki, Valentina Matviyenko yeni seçiləcək parlamentdə qadınların sayının daha çox olmasının zəruri olduğunu söyləyib: “Bu fikrini onunla əsaslandırıb ki, qadınlar insanlara daha çox kömək etməyə meyillidirlər. Onların ehtiyaclarına daha tez reaksiya verirlər. Eyni zamanda Rusiyada mövcud olan demoqrafiya probleminin həllində, ailə siyasətinin daha düzgün qurulmasında və digər məsələlərdə daha həssas mövqe tuturlar. Bu səbəbdən parlamentdə qadınların daha çox olması zəruridir. İndiki Dövlət Dumasında qadınlar deputatların 18 faizini təşkil edir. Yəni, təqribən 80-81 nəfər qadın deputat var. Bu nə qədər arta bilər? Mütəxəssislərin düşüncəsinə görə, kəskin artım qeyri-mümkündür. Hardasa ola bilər ki, sayları 100-ə yaxınlaşsın, yəni 20-22 faiz səviyyəsində qadınların təmsilçiliyi təmin olunsun. Beynəlxalq standart 30 faiz səviyyəsindədir. Təbiidir ki, Rusiyanın bu səviyyəyə qalxması qeyri-mümkündür. Hansı yollarla qadınlar parlamentdə təmsil oluna bilər? Rusiyada deputat yerlərinin yarısı proporsional sistem əsasında partiya siyahılarında qadınların təmsilçiliyi əsasında təmin oluna bilər. Yəni seçilə biləcək yerlərə daha çox qadın deputatlığa namizəd siyahıya salınar və onlar bu yolla parlamentə keçə bilərlər”. A.Səmədov qeyd etdi ki, deputat yerlərinin yarısı majoritar əsasda seçilir, burada qadınların şansı o qədər də yüksək deyil. “Burada daha çox imkanlı iş adamları, yüksək vəzifə tutmuş şəxslər, ayrı-ayrı, millətlərin liderləri və digər şəxslərin seçilmək şansı daha çoxdur. Bu səbəbdən, əslinə qalsa, Matviyenkonun tələbi, yaxud təklifi daha çox partiyalara ünvanlanıb və onların siyahısına daha çox qadın salınmasını təklif etmək məqsədi daşıyır. Bir daha onu da qeyd etmək lazımdır ki, bundan əvvəlki parlamentdə daha çox qadın “Yedinaya Rossiya " partiyasından təmsil olunub və “Yeni insanlar" fraksiyasında qadınlar daha çox yer alıblar. Ən az isə Liberal Demokrat partiyasında qadın deputatlar təmsil olunur. Bu yanaşma dəyişəcəkmi? Daha çox qadınların parlamentdə təmsil olunması təklifi reallaşacaqmı? Çox güman ki, artım baş verəcək. Çünki Matviyenko əgər belə bəyanat verirsə, bu, hakimiyyətin də mövqeyinin bu cür olduğunu göstərir. Yəqin ki, sentyabr ayında keçiriləcək yeni seçkilərdə parlamentdə qadınların sayı bir qədər artıq olacaq”-deyə A.Səmədov vurğuladı.
İradə SARIYEVA
