Bəhruz Quliyev: “Kənardan belə görünür ki, Rusiya yenə də manipulyasiya ilə məşğul olmaq istəyir”
Moskva və Bakı 2024-cü ilin dekabr ayında Aktau yaxınlığında baş verən Azərbaycan Hava Yollarına (AZAL) məxsus təyyarənin qəzası ilə bağlı bütün məsələləri həll ediblər. Bunu Rusiya xarici işlər nazirinin müavini Mixail Qaluzin deyib.
“Bilirsiniz, biz Azərbaycan təyyarəsinin qəzasının nəticələri ilə bağlı bütün məsələləri həll etmişik. Amma başa düşdüyünüz kimi, bu məsələlər dəhşətli faciə yaşamış, düzəlməz itki vermiş konkret insanlara aiddir. Buna görə də, açığı, burada ətraflı danışmaq istəməzdim”, - Qaluzin bildirib.
Rusiya rəsmisi Qaluzin elə təəssürat yaratmağa çalışır ki, sanki bütün problemlər həll edilib. Necə yəni bütün məsələlər həll edilib? Təyyarənin vurulmasına bais olanlar məsuliyyətə cəlb edilibmi, cəzalandırılıbmı?
Sözügedən məsələ ilə bağlı fikirlərini baki-xeber.com-la bölüşən “SƏS” qəzetinin baş redaktoru, politoloq Bəhruz Quliyev bununla bağlı bir sıra məqamlara toxundu: “Rusiya xarici işlər nazirinin müavini Mixail Qaluzinin “AZAL təyyarəsinin qəzası ilə bağlı bütün məsələlər həll edilib” bəyanatı ciddi suallar doğurur. Əgər doğrudan da bütün məsələlər həll olunubsa, o zaman ilk növbədə ictimaiyyətə aydın şəkildə izah edilməlidir: təyyarənin vurulmasına görə məsuliyyət daşıyan şəxslər müəyyən edilərək məsuliyyətə cəlb olunublarmı? Onlar barəsində hansı hüquqi qərarlar qəbul edilib? Zərərçəkənlərin və həlak olanların ailələrinə münasibətdə hansı ədalət təmin olunub? Bu faciə təkcə iki ölkə arasında diplomatik məsələ deyil, ilk növbədə insan həyatı ilə bağlı beynəlxalq hüquqi və mənəvi məsuliyyət məsələsidir. Hadisə nəticəsində onlarla insan həyatını itirib və cəmiyyət bu faciənin bütün təfərrüatlarının tam şəffaf şəkildə araşdırılmasını gözləyir. Əgər "bütün məsələlər həll edilib" ifadəsi yalnız kompensasiya və ya texniki prosedurları nəzərdə tutursa, bu, ədalətin bərqərar olması demək deyil. Ədalət yalnız həqiqət tam üzə çıxarıldıqda, günahkarlar müəyyən edilərək qanun qarşısında cavab verdikdə təmin oluna bilər. Düşünürəm ki, Azərbaycan cəmiyyətinin və həlak olanların ailələrinin əsas gözləntisi məhz budur. Bu səbəbdən Rusiya tərəfi belə ümumi ifadələrlə kifayətlənməməli, qəzanın səbəbləri, məsul şəxslər və görülən hüquqi tədbirlər barədə açıq və konkret məlumat verməlidir. Əks halda, "bütün məsələlər həll edilib" bəyanatı ictimai rəyi qane etmir və cavab gözləyən sualları daha da artır. Kənardan isə belə görünür ki, Rusiya yenə də manipulyasiya ilə məşğul olmaq istəyir”.
Vidadi ORDAHALLI
