Pakistan Əfqanıstana yeni hava hücumu təşkil edib. Kabil 36 mülki şəxsin öldüyünü və 163 nəfərin yaralandığını iddia edir. İslamabad hücumları təkzib edərək, Karaçidəki Pakistan Reyncerlərinin qərargahına edilən hücumda iştirak edən terrorçu yuvalarını hədəf aldığını bildirir. Bu hadisələr Talibanın 2021-ci ildə Əfqanıstanda hakimiyyətə qayıtmasından bəri iki ölkə arasında daimi qarşıdurmanı açıq şəkildə göstərir. İslamabadın əsas potensial düşməni hesab etdiyi Pakistan və Hindistan arasındakı münasibətlər də son dərəcə gərgin olaraq qalır.
Pakistan İnformasiya Nazirliyinin açıqlamasında Pakistan ordusunun hərəkətləri kəşfiyyat məlumatlarına əsaslanan lokal əməliyyat kimi xarakterizə edilib. Hava hücumlarından əvvəl Pakistanın quru qüvvələri Əfqanıstan-Pakistan sərhədini keçib. Onlara Pakistan Hərbi Hava Qüvvələrinin hava dəstəyi verilib. Əməliyyatın məqsədi Pakistan ərazisinə basqınlar edən yaraqlıların gizli bazalarını məhv etmək idi. Bu, Pakistanın ilk hücumu deyil. Əfqanıstan hakimiyyəti dəfələrlə qonşusunu qınayıb. İndi isə onların sözçüsü Pakistanın hücumlarını "qorxaqcasına təcavüz aktı" adlandırıb. Digər tərəfdən, zorakılığa son qoymaq cəhdləri də az deyil. Mart ayında iki tərəf atəşkəs barədə razılığa gəldi. Lakin razılaşma tezliklə pozuldu. Hər iki tərəf bir-birini günahlandırır. Pakistan Silahlı Qüvvələrinin Baş Qərargah rəisi, feldmarşal Asim Munir bildirib ki, Əfqanıstan terrorçu qrupları dəstəkləməyi dayandırana qədər iki ölkə arasında silahlı toqquşmalar bitməyəcək. İslamabad və Kabil arasındakı münaqişə Pakistan və Hindistan arasında münasibətlərin pisləşməsi fonunda inkişaf edir. Bu ölkələr bir-biri ilə üç dəfə müharibəyə giriblər, hava, raket və pilotsuz təyyarə hücumlarından geniş istifadə olunub. Ən son belə toqquşma ötən ilin may ayında baş verib. Xoşbəxtlikdən, hər iki nüvə silahına malik dövlətin hökumətləri vaxtında böyük bir müharibənin başlamağa dəyməz olduğu qənaətinə gəliblər. Atəşkəs əldə edilib. Lakin bunun nə qədər davamlı olacağı sual altındadır.
Problem ondadır ki, Pakistan, tərəfdaşı Çinin köməyinə güvənir və sualtı donanmasını əvvəllər Hindistanın dominantlıq etdiyi ərazilərdə döyüşlərə hazırlayır. "South China Morning Post" qəzetinin məlumatına görə, Pakistanın 1971-ci ildə Hindistanla müharibədə məğlubiyyətə uğramasından yarım əsr sonra, bu dəfə dənizdə yenidən Dehliyə meydan oxuyur. Pakistan Çindən dizel-elektrik sələflərindən daha uzun müddət su altında qala bilən ilk müasir sualtı qayığını alıb. İlk belə sualtı qayıq artıq Karaçi limanına çatıb. O, 1971-ci ildə Hindistan hərbi gəmisini batıran sualtı qayıqla eyni adda - “PNS Hangor” adlanır. İndi Çində suya endirilən Pakistan sualtı qayığının komandirinin dediyi kimi, güc balansı dəyişir. Pakistanın sualtı donanması əvvəllər tamamilə Hindistanın nəzarətində olan Benqal körfəzində fəaliyyət göstərəcək. Hindistanlı ekspert Svaran Sinqh deyir ki, bir sualtı qayıq fərq yaratmır. Lakin Çinin Pakistana daha üç müasir sualtı qayıq satması və daha sonra Pakistanın onları öz müəssisələrində istehsal etməyə başlaması gözlənilir. Bundan əlavə, Çin müntəzəm olaraq Pakistan Hərbi Dəniz Qüvvələri ilə birgə hərbi təlimlər keçirir. Svaran Sinqhin sözlərinə görə, bu, Hindistanın dəniz qüvvələrinin modernləşdirilməsinə xərcləri artırması deməkdir.
Tahir TAĞIYEV
