Abutalıb Səmədov: "Zelenskinin planlaşdırdığı zərbələr Rusiyanı sülhə məcbur edə bilməyəcək"
Belarus Prezidenti Aleksandr Lukaşenko bildirib ki, Prezident Zelenskinin nümayəndələri ilə görüşərək Belarusun müharibəyə cəlb edilməməsi istəyini onlara çatdırıb. O qeyd edib ki, Belarus Ukrayna ilə döyüşmək istəmir, lakin istənilən halda Rusiyanın tərəfini dəstəkləyəcək və bəzi qüvvələrin Belarusu münaqişəyə cəlb etməyə çalışdığını iddia edib.
Öz növbəsində, Ukrayna Prezidenti Zelenski Rusiyanın təsiri ilə Belarusun Ukrayna sərhədi boyunca hərbi infrastruktur, sursat və yanacaq anbarları yaratdığını iddia edib. O, Belarusu gərginliyi azaltmağa çağırıb və Ukrayna Təhlükəsizlik Xidmətinə (SBU) Rusiyanı hərbi əməliyyatları dayandırmağa təşviq etmək məqsədilə 40 günlük "təsir əməliyyatı" keçirməyi tapşırdığını açıqlayıb.
Zelenskinin 40 günlük təşviq əməliyyatına başlaması nə deməkdir və o hansı nəticələr verə bilər?
Politoloq Abutalıb Səmədov hesab edir ki, Ukrayna prezidenti Volodimir Zelenskinin bəhs etdiyi 40 günlük əməliyyat planı Rusiyaya ciddi zərbələr vura bilsə də, Moskvanı öz sülh şərtlərindən geri çəkilməyə məcbur etməyəcək.
Politoloq Abutalıb Səmədov "Bakı-Xəbər" qəzetinə açıqlamasında bildirib ki, son günlər Ukrayna prezidenti Volodimir Zelenski Rusiyanı sülhə məcbur etmək məqsədilə müəyyən planların hazırlandığını bəyan edib. Onun sözlərinə görə, Zelenski əvvəlcə G7 ölkələrindəki müttəfiqlərinə müraciət edərək razılaşdırılmış hərbi yardımın qısa müddətdə çatdırılmasını istəyib və bildirib ki, bu dəstək vaxtında göstərilərsə, Rusiyanı sülhə məcbur etmək üçün imkan yarana bilər.
Səmədov qeyd edib ki, Ukrayna nümayəndələri Belarus prezidenti Aleksandr Lukaşenko ilə görüş zamanı da Ukrayna Təhlükəsizlik Xidmətinin hazırladığı 40 günlük əməliyyat planından bəhs ediblər. Politoloqun fikrincə, əməliyyatın detalları açıqlanmasa da, onun mahiyyəti barədə ehtimallar irəli sürmək mümkündür.
"Burada qeyri-adi nəsə gözləməyə dəyməz. Söhbət Rusiyanın dərinliklərinə endiriləcək dron zərbələrindən gedir. Bu zərbələr nəticəsində həm hərbi obyektlərə ciddi ziyan vurulmalı, həm də Rusiyanın yanacaq infrastrukturu sıradan çıxarılmalıdır", – deyə o bildirib.
Politoloq vurğulayıb ki, son hücumlar nəticəsində Rusiyada yanacaq təminatı ilə bağlı müəyyən problemlər yaranıb və Zelenski bu zərbələrin Moskvanı sülhə daha çox meyilləndirəcəyinə ümid edir. Lakin onun fikrincə, bir sıra ekspertlər hesab edirlər ki, bu addımlar Rusiyanı zəiflətsə və itkilər versə də, onu mövqeyini dəyişməyə vadar etməyəcək.
Səmədovun sözlərinə görə, belə bir vəziyyətdə Rusiyanın yenidən nüvə silahı ilə bağlı bəyanatlar verməsi, Qərbin isə əvvəlki dövrlərdə olduğu kimi bu ritorikadan ehtiyatlanması ehtimalı qalır. O, həmçinin ABŞ-də Donald Trampın Zelenskiyə təzyiqləri artırmasının və hərbi yardımlarda müəyyən azalmanın mümkün olduğunu bildirib.
Politoloq Avropa ölkələrinin də imkanlarının məhdudlaşdığını qeyd edib. Onun sözlərinə görə, Böyük Britaniya və Almaniyada iqtisadi çətinliklər siyasi rəhbərlərin mövqelərinə təsir göstərir ki, bu da Rusiyanın davranışlarına dolayısı ilə təsirsiz ötüşmür.
Abutalıb Səmədov hesab edir ki, bütün bunlara baxmayaraq, Rusiya cəbhədə irəliləyişini davam etdirir və vaxtın öz xeyrinə işləyəcəyini düşünür. Onun fikrincə, Moskva ABŞ-də aralıq seçkilərinə qədər mövqelərini möhkəmləndirməyə çalışacaq, çünki Tramp üçün həmin dövrədək Ukrayna istiqamətində müəyyən nəticə əldə etmək mühüm siyasi əhəmiyyət daşıyır.
Politoloq sonda bildirib ki, Zelenskinin bəhs etdiyi 40 günlük planın əsas məqsədi Rusiyanın strateji obyektlərinə zərbələr endirmək, ölkə daxilində təzyiq və böhran yaratmaq, eyni zamanda Qərbin Ukraynaya dəstəyini gücləndirməkdir. Bununla belə, onun qənaətincə, bu planın Ukraynanın istədiyi şərtlərlə sülhə gətirib çıxarma ehtimalı olduqca zəifdir və gələcəkdə yenidən əvvəlki danışıqlar formatına qayıdılması daha real görünür.
Dəniz NƏSİRLİ
