Elşən Manafov: “Bu, müxalifətin mövqeyinə güclü təsir imkanlarına malik Rusiyanın geosiyasi maraqlarından irəli gəlir”
Ermənistan Baş naziri Nikol Paşinyan müxalifət deputatları tərəfindən parlament masalarına qoyulan “Qarabağ bayraqları”nı Azərbaycanla yeni müharibə təhlükəsi adlandırıb. Bu bəyanatı o, parlamentdə hökumət saatı zamanı səsləndirib.
Daha sonra Paşinyan bunları qeyd edib: “Parlamentimizdə “Qarabağ bayraqları”nın olması müharibə təhlükəsidir. Onlar bu söhbəti açır, təxribat törədirlər. Qarabağ məsələsi bağlanıb. Müxalifət sülhə təhlükə yaradır. Bununla onlar birbaşa təhlükəsizlik təhdidləri yaradır, bütün qonşuları Ermənistana qarşı birləşməyə təhrik edirlər. Vəziyyətin qeyri-sabitləşməsinin qarşısını almaq üçün səy göstərməliyik. Biz sülhü institusional şəkildə inkişaf etdirməyə davam edirik”.
Görünən odur ki, revanşist qüvvələr hər vasitə ilə Qarabağ məsələsini gündəmdə saxlamağa çalışırlar.
Sözügedən məsələ ilə bağlı fikirlərini baki-xeber.com-la bölüşən politoloq Elşən Manafovcbununla bağlı bir sıra məqamlara toxundu: “Ermənistan müxalifətinin Qarabağ probleminə münasibəti konyuktur maraqlardan irəli gəlir. Habelə müxalifətin mövqeyinə güclü təsir imkanlarına malik Rusiyanın bölgə ilə bağlı geosiyasi maraqlarından irəli gəlir. Müxalifət Qarabağ probleminə münasibətdə sərgilədiyi mövqe ilə bunun Azərbaycanla Ermənistanın münasibətlərində gərginlik doğuracağının mahiyyətinə varır. Bunun ölkədə siyasi düzənə, sosial sferaya göstərəcəyi təsirin doğuracağı kataklizmləri görür. Bununla belə bəlli siyasətin Paşinyan iqtidarı üçün doğuracağı problemlər konteksindən çıxış edərək suyu bulandırmağa çalışır. Revanşist müxalifət yaşanacaq hadisələrə görə dövlətçilik qarşısında hüquqi məsuliyyətin iqtidarın üzərinə düşəcəyini bilir. Siyasi anlamda bu vəziyyətə görə iqtidarla xalq qarşısında siyasi məsuliyyəti bölüşdürmək mövqeyindən uzaqdır”.
Politoloq hesab edir ki, Paşinyan ciddi cəhdlə Azərbaycanla münasibətlərdə yaşana biləcək problemlərdən qaçır: “Bu onun hakimiyyətdə qalıb möhkəmlənməklə bağlı planlarının ziddir. Eyni zamanda Paşinyanın seçkilərdəki qələbəsi məhz onun Azərbaycanla münasibətləri sülh və qarşılıqlı anlaşma müstəvisi üzərində saxlayacağı ilə bağlı seçicilərə verdiyi vədlərdən irəli gəlir. Digər tərəfdən Paşinyan Ermənistanda onun hakimiyyətə gəlməsində ona siyasi dəstək vermiş Qərbdəki bəlli dairələr qarşısında da borclu və məsuldur. Bu dairələr isə bölgəyə Rusiyanın təsir imkanlarının güclənməsinə yol verməmək üçün Azərbaycanla regional təhlükəsizlik problemlərinin həllində Paşinyana rəsmi Bakı ilə əməkdaşlıq etməyi tövsiyə edirlər. Zira Qərbin beyin mərkəzləri anlayırlar ki, Rusiya iqtidarını qane etməyən Paşinyan iqtidarından qurtulmaq üçün Kreml Bakının İrəvanla münasibətlərində yaşana biləcək hər hansı gərginlikdən yararlana bilər. Bu konteksdə Paşinyan müxalifətin Qarabağla bağlı siyasətini dövlətçiliyə xəyanət konteksində qiymətləndirir. Onların hərəkətlərinin Qarabağda separatizm dalğasının yüksəlişinə gətirə biləcəyini bəyan edib müxalifə qarşı qanunvericilik konteksində tədbirlərin görülməsinə cəhd edə bilər. Lakin Paşinyan belə bir siyasətin ölkədə və onun hüdudlarından kənarda doğuracağı rezonansı da görməyə məsuldur. Ölkədə parlamentə keçirilən sonuncu seçkilər göstərdi ki, Rusiya ilə münasibətlərə önəm verən müxalifət siyasi legitimlik qazandı. Digər tərəfdən bu legitimlik müxalifə sonuncu seçkilərdə dəstək göstərmiş seçicilərin 35-38%-lik göstəricinə söykənir. Seçki hüququ olan seçicilərin 50% bu seçkilərə qatılmadı. Onların isə böyük əksəriyyəti hazırda Rusiyada çalışan və yaşayanlardır. Yaranmış şərait Rusiya ilə münasibətlərdə geosiyasi yükün artmasına yol verməmək şərtilə Paşinyan iqtidarından Azərbaycan və Türkiyə ilə münasibətlərdəki problemlərin qarşılıqlı anlaşma müstəvisi üzərində həllini tələb edir. Onun sonuncu seçkilərdə əldə etdiyi yüksək siyasi legitimlik statusu bu problemlərin həlli uçun siyasi və hüquqi baza yaradıb”.
Vidadi ORDAHALLI
