Firdovsi Şahbazov: “Ermənistan yanacağa olan tələbatının əsas hissəsini ölkəmiz hesabına təmin edəcək”
Ermənistanın iqtisadiyyat naziri Gevorq Papoyan bildirib ki, Azərbaycan yanacağı ermənilərin rifah səviyyəsini yüksəldəcək. Azərbaycanın yanacaq tədarükü bazarda qiymətlərin enməsinə və əhalinin maddi vəziyyətinin yaxşılaşmasına səbəb ola bilər.
O qeyd edib ki, əvvəlki benzin partiyası yüksək tələbat səbəbindən qısa müddətdə satılıb, yeni partiyanın isə bazar qiymətindən 80 dram ucuz olacağı gözlənilir. Papoyan vurğulayıb ki, bu proses istehlakçılar üçün yanacağın 60-100 dram ucuzlaşmasına gətirib çıxara bilər. Bundan başqa, dizelin 80 dram ucuzlaşması kənd təsərrüfatında torpaq emalı xərclərini təxminən 20% azaldacaq.
Belə görünür ki, Ermənistan bu gedişlə Azərbaycandan daha çox yanacaq idxal edəcək. Maraqlıdır, yaxın perspektivdə Ermənistan Azərbaycandan qaz da idxal edə bilərmi?
Sözügedən məsələni baki-xeber.com-a şərh edən iqtisad üzrə fəlsəfə doktoru Firdovsi Şahbazov prinsipcə, bunu istisna etmədi: “Əvvəla, Azərbaycan yanacağı Ermənistan üçün ona görə sərfəlidir ki, daşıma xərcləri ucuz başa gəlir. Azərbaycanda müasir neft emalı müəssisələri var. Azərbaycandan idxal edilən yanacaq Ermənistanda rəqabət qabiliyyətini artırır. Əvvəllər Ermənistan əsasən Rusiya və İran hesabına yanacağa olan tələbatını ödəyirdi. Rusiyanın Ermənistanla quru sərhədi olmadığına görə, yanacağın ora aparılması daşıma xərclərini artırırdı. Ona görə də orada satılan yanacaq baha olurdu. İndi Ermənistanda Azərbaycan hesabına yanacağın ucuzlaşması həm də o deməkdir ki, istehsal olunan məhsulların maya dəyəri aşağı düşəcək. Nəticədə məhsul satışından əldə ediləcək gəlirlər artacaq. Çox güman ki, bu gedişlə Ermənistan yanacağa olan tələbatının əsas hissəsini Azərbaycan hesabına təmin edəcək. Ona görə ki, iqtisadi baxımdan sərfəlidir. İki ölkə arasında sülh sazişi imzalanandan sonra qaz idxalı da istisna deyil. Çünki bu da digər yanacaqlar kimi Ermənistan üçün iqtisadi nöqteyi-nəzərdən sərfəli olacaq”.
Vidadi ORDAHALLI
