Faiq Balabəyli: “Ermənistanın hədəfi boşa çıxdı, planları alt-üst oldu, bu ziyanlı və təhlükəli məqsədi həyata keçmədi”
Vətən müharibəsi dövründə Ermənistanın əsas hədəflərindən biri Azərbaycanın cəbhə bölgəsindən kənarda yerləşən yaşayış mərkəzlərini, şəhərlərini, kəndlərini, strateji obyektlərini vurmaq idi.
Müharibə dövründə Ermənistanın Azərbaycana raket hücumunun hədəfində Mingəçevir stansiyası da vardı. 2020-ci il oktyabrın 4-də Ermənistan tərəfindən Mingəçevir Elektrik Stansiyasının ərazisinə böyük dağıdıcı qüvvəyə malik “Smerç” reaktiv yaylım atəşi sistemindən raket atıldı. Raket 6-cı və 7-ci enerji bloklarının arasındakı sahəyə düşdü. Bundan başqa, 2020-ci il oktyabrın 11-də ikinci dəfə atılan raket İdarəetmə Mərkəzinin yaxınlığına düşdü. Müvafiq müdafiə sistemlərinin qabaqlayıcı tədbirləri nəticəsində atılmış raketlər zərərsizləşdirildi.
Prezident İlham Əliyev Mingəçevir səfəri çərçivəsində iyunun 24-də Vətən müharibəsi zamanı Ermənistandan bu stansiyaya atılan raketin düşdüyü ərazidə olub.
Məlum olduğu kimi, Ermənistanın raket zərbəsinin məqsədi Azərbaycanın enerji infrastrukturunu iflic vəziyyətinə salmaq olub. Müharibədən əvvəl Azərbaycanı hədələmək üçün bir neçə üsuldan istifadə edən Ermənistan, o cümlədən Mingəçeviri bombalamaq, oradakı su bəndini dağıtmaq və Mingəçevir Elektrik Stansiyasını sıradan çıxarmaq kimi təhdidlər də səsləndirib. Bu əraziyə düşən həm mərmilər, həm də uzaqmənzilli raketlər bunun əyani sübutudur. Bu, dinc əhaliyə, mülki infrastruktura yönəlmiş təcavüz aktı və hərbi cinayətdir.
Müstəqil.az saytının rəhbəri Faiq Balabəyli “Bakı-Xəbər”ə bildirdi ki, Vətən müharibəsi zamanı da, elə ondan əvvəllər də Ermənistan Azərbaycana qarşı təxribatlarından, terrordan çox istifadə edib, eyni zamanda hədələr yağdırıb. F.Balabəyli qeyd etdi ki, Ermənistanın təxribatları, terrorları, hücumları və işğalı nəticəsində itkilərimiz, dağıntılarımız çox olub. “44 günlük Vətən müharibəsində də Ermənistan özünün çirkin siyasətini, ənənəvi düşmənçiliyini davam etdirdi. Müharibənin ilk günündən ordumuzun hücumuna dözə bilməyən, əsgərlərimizlə üz-üzə gəlməkdən çəkinən düşmən özünün çirkin əməllərini dinc şəhərlərimizi, strateji obyektlərimizi qadağan olunmuş silahlarla, raketlərlə atəşə tutub, aqressiyasını daha da artırıb. Döyüş bölgəsindən daha çox uzaqlarda yerləşən şəhərlərimiz, rayonlarımız Ermənistanın xain hədəfinə tuş gəldi. Dinc əhaliyə və strateji obyektlərə raket hücumu etdilər. Elə Mingəçevir şəhərinə raket atmaları da buna hesablanmışdı. Hər kəsə yaxşı məlumdur ki, Mingəçevir Elektrik Stansiyası Azərbaycan üçün çox mühüm strateji əhəmiyyət daşıyan bir obyektdir. Bu obyektin partladılması böyük tələfatlar, uçqunlar, milyonlarla ölçülə bilən ziyanlarla müşayiət oluna bilərdi.
Nə yaxşı ki, erməni tərəfinin bu məkrli niyyəti baş tutmadı. Ermənistanın hədəfi boşa çıxdı, planları alt-üst oldu, bu ziyanlı və təhlükəli məqsədi həyata keçmədi”.
F.Balabəyli qeyd etdi ki, Ermənistanın məqsədi enerji infrastrukturunu iflic vəziyyətinə salmaq olsa da, bu planı tamamilə alt-üst oldu və düşmən rüsvayçı şəkildə geri çəkildi.
F.Balabəyli vurğuladı ki, Azərbaycanın sənaye şəhəri olan Mingəçevirdə strateji baxımdan mühüm əhəmiyyət kəsb etməklə Cənubi Qafqaz regionunda ən böyük su anbarı və elektrik stansiyası yerləşir və bu su anbarının və elektrik stansiyasının vurulması Cənubi Qafqaz regionu üçün ciddi ekoloji fəsadlar törədə bilərdi. Amma Ermənistanin niyyəti gözlərində qaldı.
F.Balabəyli dedi ki, bu gün Mingəçevirdə daha böyük işlər görülür, enerji daşıyıcısı olan yeni obyekt istifadəyə verilir, Prezident İlham Əliyevin iştirakı ilə “8 Noyabr” Elektrik Stansiyasının açılması bu uğurlardan biridir.
İradə SARIYEVA
