Elsad Həsənov: "İran-İsrail münaqişəsi bitsə də (hərçənd, hələ bitməyib), MOSSAD-la SEPAH arasında olan düşmənçilik bitməyəcək".
“The Washington Post” qəzeti xəbər verir ki, MOSSAD əməkdaşları 20-dən çox yüksəkrütbəli iranlı komandirə dəfələrlə zəng edərək onları hədələyiblər.
Məlumata görə, İsrail kəşfiyyatının əməkdaşları telefon zəngləri zamanı SEPAH komandirlərinə ailələri ilə birlikdə qaçmağı məsləhət görüb, əks halda ölümlə üzləşəcəkləri ilə bağlı xəbərdarlıq ediblər.
Belə təhdidlər iki ölkə arasında münaqişənin yenidən alovlanması risqi yarada bilərmi?
Baki-xeber.com-un müxbiri ilə söhbətində təhlükəsizlik məsələləri üzrə ekspert Elşad Həsənov bildirdi ki, ümumiyyətlə, dünyanın kəşfiyyat orqanları arasında MOSSAD liderdir: “ MOSSAD-ın çox güclü maliyyə dəstəyi var və o, dünyada çox böyük agentura şəbəkəsinə malikdir. Hesab edirəm ki, belə sıx agentura şəbəkəsinin olması da qanunauyğundur. Çünki dünyanın hər yerində yəhudi millətinin nümayəndələri var. Üstəgəl, dünyanın maliyyə imkanları da yəhudilərin əlindədir. Yəhudilər çox ağıllı millətdir, Nobel mükafatına layiq görülənlər arasında milli mənsubiyyətinə görə çoxluq təşkil edən yəhudilərdir. Dünyanın Amerika, İngiltərə və Rusiya kimi ölkələrində yəhudilər yüksək vəzifələr tutur və böyuk maliyyə imkanlarına malikdirlər. Bütün bu səbəblərdən MOSSAD dünyanın istənilən yerində istədiyi əməliyyatı keçirə bilir, onların dövlət maraqlarına xələl gətirən şəxsləri aradan götürürlər, zərərsizləşdirirlər. Bu mənada, SEPAH komandirlərinə edilən təhdidlər boş bir məsələ deyil. Bunun arxasında sistemli bir əməliyyat dayanır.
Unutmaq olmaz ki, bu 12 günluk müharibədə İsrail İranın 20-dən çox nüvə alimini və bir neçə generalını məhv etdi. Bunların hamısı MOSSAD-ın keçirdiyi əməliyyatlar əsasında reallaşıb. Amma mən hesab etmirəm ki, bu təhdidlərə görə SEPAH-ın komandirləri öz işlərini qoyub xaricə qaçacaqlar, yox, bu olmayacaq. İranın da kəşfiyyat orqanlarında dövlətini, xalqını sevən, canını vətən yolunda fəda etməyə hazır olan mütəxəssislər var. Onlar da bu işdə müdafiəni təşkil edəcək ki, dövlət orqanlarının normal fəaliyyəti təmin edilsin.
Fikrimcə, müharibənin dayandırılmasına cəhdlər olsa da, lap sülh sazişi bağlansa belə, nə qədər ki bu iki ölkə var, onlar arasında münaqişə dayanmayacaq. Çünki burada həm din amili var, həm də hazırda Yaxın Şərqdə nüfuz uğrunda mübarizə gedir. İranın Livanda, Fələstində və Suriyada böyük proksi qüvvələri var idi. Həmin qüvvələri HƏMAS-İsrail müharibəsi başlayandan sonra İsrail ordusu zərərsizləşdirdi. Bu mənada İran son illər Yaxın Şərqdə sıxışdırılaraq mövqelərindən vurulub çıxarılır. HƏMAS, Hizbullah və husilərlə döyüşdən sonra Netanyahu dedi ki, proksi qüvvələri məhv etdik, indi növbə İranındır. Doğrudan da belə oldu, iyunun 13-də İsrail ABŞ-ın razılığı ilə hücuma keçdi və onlar öz məqsədlərinə çatdı. Tramp bildirdi ki, biz onların nüvə obyektlərini məhv etdik, onlar bir daha nüvə əldə edə bilməyəcək.
Göründüyü kimi, mesaj olaraq edilən təhdidlər sonradan reallaşır. Bu baxımdan mən hesab edirəm ki, MOSSAD tərəfindən SEPAH komandirlərinə edilən təhdidlər əsassız deyil. Amma SEPAH komandirləri də müdafiə olunmaq üçün müvafiq tədbirlər görəcəklər.
İran-İsrail münaqişəsi bitsə də (hərçənd, hələ bitməyib), MOSSAD-la SEPAH arasında olan düşmənçilik bitməyəcək".
Akif NƏSİRLİ
