Sədrəddin Soltan: "Medinski nümayəndə heyətinə rəhbərlik edirsə, bu o deməkdir ki, Rusiyanın sülh sazişi imzalamaq fikri yoxdur"
ABŞ prezidenti Tramp Rusiya nümayəndə heyətinin rəhbəri Medinskinin Ukrayna ilə danışıqlar prosesindən kənarlaşdırılmasını istəyib. Bununla belə, Rusiya Xarici İşlər Nazirliyi iyunun 2-də keçiriləcək danışıqlarda Rusiya nümayəndə heyətinin tərkibinin dəyişməyəcəyini vurğulayıb.
Rusiya ABŞ prezidenti Donald Trampın tələblərinin əksinə olaraq yenidən Putinin köməkçisi Vladimir Medinskini Ukrayna ilə danışıqlara göndərəcək. Rusiya Xarici İşlər Nazirliyinin sözçüsü Mariya Zaxarova mayın 29-da “Rossiya 24” telekanalının efirində bildirib ki, iyunun 2-də İstanbulda keçirilməsi planlaşdırılan görüşdə Rusiya nümayəndə heyətinin tərkibi dəyişməz qalacaq.
Medinski artıq 2022-ci ildə İstanbulda və bu ilin mayında Ukrayna ilə danışıqlarda Rusiya nümayəndə heyətlərinə rəhbərlik edib, lakin onun iştirakı Qərb vasitəçilərinin narazılığına səbəb olub. Tramp administrasiyası onun danışıqlar prosesindən kənarlaşdırılmasında israr edib. Kiyev və Moskva arasında təmasların təşkilinə cavabdeh olan Amerika rəsmiləri Rusiyanın keçmiş mədəniyyət naziri və Rusiyanın Ukrayna işğalına haqq qazandıran təbliğat tarixi dərsliyinin müəllifi Medinski də daxil olmaqla, “sərt xətt tərəfdarlarının” danışıqlarda iştirakına qarşı çıxıblar. Medinski rus xalqının “əlavə xromosom”a sahib olması iddiası ilə də tanınır. ABŞ açıq deyir ki, Medinskini danışıqlardan rədd edin, Putin isə onun danışıqlar komandasına rəhbərlik edəcəyində israr edir. Belə bir şəraitdə iyunun 2-də Rusiya-Ukrayna danışıqları baş tuta bilərmi?
Baki-xeber.com saytına açıqlamasında Orta Doğu Araşdırmaları Mərkəzinin rəhbəri, siyasi sərhçi Sədrəddin Soltan bildirdi ki, Medinski Putinin köməkçisi olmazdan əvvəl Rusiyanın mədəniyyət naziri işləyib: "O, bütün yazıları və düşüncələri ilə bir "velikarus" şovinistdir. O, bunu kitablarında da göstərir, hətta, bildirir ki, rus xalqının "əlavə xromosom"u var. Medinskinin 10 və 11-ci sinif şagirdləri üçün "Rusiya tarixi" və "Ümumdünya tarixi" dərslikləri var. Kitablarda o, Rusiyanın dünya müharibələrində oynadığı rol, Rusiyanın dağılıb yenidən dirçəlməsi və əhalisinin güclü olmasını təbliğ edir. Yəni bu kitablar rusların 21-ci əsrdə özünə güvənini, milli özünüdərkini geri qaytarmağı təbliğ edir. Medinski ruslar haqqında formalaşan sərxoşluq, əyyaşlıq, tənbəllik, və s. xarakterləri dağıtmaq hədəfini qarşıya qoyub. Bu kitablarda 1812-ci ildəki vətən müharibəsində Rusiyanın Fransanı məğlub etməsini, birinci və ikinci dünya müharibəsində rusların oynadığı rolu və s. təbliğ edilir. Medinski Rusiyanın Ukraynada apardığı müharibəyə haqq qazandırır, onu bütün əlamətləri ilə dəstəkləyir və Ukraynanı Rusiya torpaqları hesab edir.
Medinski 2022-ci ildə də Rusiya-Urayna danışıqları aparan nümayəndə heyətinə rəhbərlik edirdi. İndiki heyətdə də yenə başçı odur.
Fikrimizcə, ABŞ Medinskinin Rusiya nümayəndə heyətinə rəhbərlik etməsini həm də ona görə istəmir ki, o, Ukrayna nümayəndə heyətini danışıqlarda hədələmişdi. O, bildirmişdi ki, Rusiyanın şərtləri ilə razı olmasalar ukraynalılar daha bir vilayəti itirəcəklər. Bu danışıqların ruhuna yad və zərər verə bilən bir bəyanat idi.
Medinski nümayəndə heyətinə rəhbərlik edirsə, bu o deməkdir ki, Rusiyanın sülh sazişi imzalamaq fikri yoxdur. Yaxud Rusiyanın təqdim etdiyi memorandum yalnız Ukraynaya şərtlərini qəbul etdirməkdən ibarətdir. Çünki Medinski müharibəni davam etdirmək, Ukraynanı tamamilə işğal edib, Rusiyanın əsarəti altına almaq istəyən kəsimin nümayəndəsidir. O, "velikorus" şovinistdir, eyni zamanda sovet ittifaqını bərpa etmək fikrində olan hakimiyyəti elitasının bir nümayəndəsidir.
Onu da qeyd edim ki, Medinskinin çoxlu kitabları var. Yazdığı kitabların hamısı Rusiya tarixi haqqında miflər, nağıllar, hekayələr və s.-dən ibarətdir. O, Rusiya tarixinin təbliğatçısıdır. Bir çox hallarda Medinski şişirtmələrə yol verib. Çunki Rusiya tarixi onun indiki qonşularının tarixindən qədim və mürəkkəb deyil. Rusiyanın yaranma tarixi də bəllidir, onu quranlar da, yaradanlar da, gücləndirənlər də hamıya məlumdur. Medinski kimiləri "velikorus" şovinizmini şişirtmək, təbliğ etməklə onu regiona hakim etməyə çalışır.
Putin bu məsələdə israr etsə, ola bilsin ki, bazar ertəsinə nəzərdə tutulan danışıqlar baş tutmasın".
Akif NƏSİRLİ
