ABŞ prezidenti Donald Trampın son həftələrdə Yaxın Şərqə səfəri zamanı Səudiyyə Ərəbistanı, Birləşmiş Ərəb Əmirlikləri və Qətər liderləri ilə Tehranla razılığa gələ bilmədikləri təqdirdə İranın nüvə obyektlərinə hücum məsələsini müzakirə etdiyi ortaya çıxıb.
İsrail mediası yazır ki, Tramp Yaxın Şərq liderləri ilə İranın nüvə proqramı və ABŞ-la Tehran arasında nüvə razılaşması əldə etmək üçün aparılan danışıqları müzakirə edib. Lakin Tramp ikinci variant olan İranın nüvə proqramına hücum məsələsində Səudiyyə, BƏƏ və Qətərdən dəstək dəstək ala bilməyib.
Yaxın Şərq liderləri Bin Salman, Əl Nəhyan və Əl Tani Trampa İranın nüvə obyektlərinə hərbi hücumun əleyhinə olduqlarını bildiriblər. Onlar İranın nüvə proqramına mümkün hücum zamanı Tehranın ABŞ hərbi bazalarının yerləşdiyi Səudiyyə, BƏƏ və Qətərə cavab zərbələri endirə biləcəyilə bağlı narahatlıqlarını Trampa çatdırıblar. Bildirilir ki, Əl Tani Trampa, İranın nüvə obyektlərinə hücumdan ən çox Körfəz ölkələrinin təsirlənəcəyini deyib.
Bu arada yayılan məlumatlara görə, Trampın Yaxın Şərq səfərindən sonra Səudiyyə Ərəbistanı İrana xəbərdarlıq edib. Səudiyyənin müdafiə naziri şahzadə Xalid bin Salman Əl Səudun İrana “Ya Trampla razılaşın, ya da hücuma hazırlaşın” deyə xəbərdarlıq mesajı verdiyi iddia edilir. O, bildirib ki, Trampın nüvə sazişi üzrə danışıqlar aparmaq təklifi ciddi qəbul edilməlidir və bu, İsraillə müharibə risqindən qaçmaq üçün bir fürsətdir.
“Reuters” Körfəzdəki iki mənbəyə və iki İran rəsmisinə istinadən xəbər verir ki, müdafiə naziri Səuda regionda qeyri-sabitliyin artması ehtimalı barədə İrana xəbərdarlıq etmək tapşırılıb.
Səud Tehran administrasiyasına bildirib ki, Trampın səbri artıq tükənir və ABŞ-la danışıqlar konstruktiv şəkildə davam etməlidir. Səudiyyəli nazir Tehrana çatdırıb ki, ABŞ-la razılığa gəlmək lazımdır, əgər danışıqlar nəticə verməsə İsrail hücuma keçə bilər. O, əlavə edib ki, Qəzza və Livanda toqquşmaların baş verdiyi bölgə daha bir müharibəni qaldıra bilməz.
TAHİR
