Ramil Məmmədli: “Məqsədyönlü şəkildə erməni tərəfi bu zərərli ideyaları ortalığa atır”
Bir sıra gözləntilərə rəğmən, Ermənistan Azəbaycanla sərhədlərin delimitasiya prosesinə soyuq yanaşır. Ötən olin ortalarında Qazax rayonunun Ermənistanla sərhəd 12,6 kilometr ərazisi delimitasiya olunsa da, ondan sonra proses, demək olar ki, dayanıb. Rəsmi İrəvan bu prosesə soyuq yanaşır və bu istiqamətdə konkret addımların atılmasından yayınır.
Hətta ölkədə bir ideyaya üstünlük verilir ki, guya delimitasiya edilən yerlərdə Azərbaycana torpaqlar verilib. Məsələn, sözügedən məsələlərlə bağlı erməni jurnalist Voskan Sarkisyan sosial şəbəkə hesabında bunları yazıb: “Hökumət yeni ərazilərin Azərbaycana verilməsi üçün dövlət büdcəsindən torpaq mülkiyyətçilərinə kompensasiyaların ödənilməsi barədə gizli qərar qəbul edib”.
Onun sözlərinə görə, bu günlərdə Tavus vilayətinin rəisi Hayk Qalumyan Ermənistan hökumətinin 2025-ci il 23 aprel tarixli 474-N saylı qərarı ilə ayrılmış vəsait hesabına vətəndaşlara daşınmaz əmlaka görə kompensasiyaların ödənilməsi üçün komissiyanın yaradılması haqqında qərar qəbul edib: “Vilayət rəisi özünü həmin komissiyanın sədri, Tavus vilayəti bələdiyyəsindən isə beş məmur təyin edib. Bəs hökumətin 2025-ci il 23 aprel tarixli 474-N saylı qərarında nə deyilir? Bununla hökumətin 2024-cü il 27 dekabr tarixli “Ermənistanın 2025-ci il dövlət büdcəsinin icrasının təmin edilməsi tədbirləri haqqında” qərarının əlavəsinə dəyişiklik və əlavələr edilib. Həmin qərarın 2-ci bəndi məxfidir. Bunun bir mənası ola bilər: 2025-ci ilin dövlət büdcəsinə dəyişikliklər edilib ki, Tavus vilayətindən Azərbaycana verilən ərazilərin sahiblərinə pul kompensasiyası verilsin”.
“Ermənistan delimitasiyada maraqlı olsaydı, Qazaxla sərhəddə başlayan proses bu qədər yubanmazdı”
Sözügedən məsələ ilə bağlı fikirlərini “Bakı-Xəbər”lə bölüşən hərbi ekspert Ramil Məmmədli hesab edir ki, məqsədyönlü şəkildə erməni tərəfi bu zərərli ideyaları ortalığa atır: “Məqsəd odur ki, delimitasiya prosesi ilə bağlı danışıqlar yerində saysın. Fikrimcə, bu razılaşdırılmış oyuna bənzəyir. Ermənistan hakimiyyəti məqsədyönlü şəkildə müəyyən şəxslər vasitəsi ilə belə zərərli informasiyaları ortaya atır. Sonra bəhanə ilə çıxış etsinlər ki, guya erməni cəmiyyəti delimitasiya işlərinin aparılmasına qarşı olduğu üçün hökumət buna getmir. Necə deyərlər, hökumət “ictimai rəyi” nəzərə alaraq buna getmir. Bir tərəfdən Ermənistan Parlamentinin sədri Alen Simonyan bəyan edir ki, Ermənistan-Azərbaycan sərhədinin delimitasiyası və demarkasiyası prosesləri gedir, hazırda heç bir fikir ayrılığı yoxdur. O biri tərəfdən də belə informasiyaları ortalığa atırlar. Ermənistan delimitasiyada maraqlı olsaydı, Qazaxla sərhəddə başlayan proses bu qədər yubanmazdı. Halbuki, sərhədin daha çox hissəsində delimitasiya və demarkasiya işləri aparmaq mümkün idi. Ancaq onlar buna getmədilər. Son vaxtlar da Ermənistanda Rusiyaya bağlı revanşist qüvvələrin fəallaşması müşahidə edilir. Seçkilərə bir il vaxtın qalmasına baxmayaraq, indidən aktivləşməyə başlayıblar. Məqsəd 2026-cı ilin ortalarında keçirilən parlament seçkilərində Paşinyan hakimiyyətini devirməkdir. Halbuki, Azərbaycanla sülh sazişinin imzalanması, Türkiyə-Ermənistan sərhədinin açılması tezləşsə, bu, Paşinyan hakimiyyətinin xeyrinə olacaq. Bütün bunlarla paralel delimitasiya prosesi getsəydi, bu da onların xeyrinə işləyən amil olardı. Təəssüflər olsun ki, Paşinyan hakimiyyəti bütün bunları düzgün dəyərləndirmir”.
Vidadi ORDAHALLI
