Xaqani Cəfərli: "Rusiya, obrazlı desək, Çin adlı “əjdaha”nın ağzı ilə mədəsi arasındadır"
Rusiya prezidenti Vladimir Putin Ukrayna ilə atəşkəs razılaşması əldə etmək istəmir, əksinə, qan tökülməsinə mümkün son qoyulması ilə bağlı danışıqlar üçün cümə axşamı Türkiyədə görüşmək istəyir. Bunu ABŞ prezidenti Donald Tramp Truth Social sosial şəbəkəsində yazıb.
"Ukrayna bununla dərhal razılaşmalıdır. Ən azından onlar razılaşmanın mümkün olub-olmadığını müəyyən edə biləcəklər, əgər mümkün deyilsə, Avropa liderləri və ABŞ vəziyyətin nə yerdə olduğunu biləcəklər və buna uyğun hərəkət edə bilərlər!", - Tramp yazır.
Tramp deyib ki, onun xüsusi elçisi Stiven Uitkoff Rusiya-Ukrayna münaqişəsinin nizamlanması ilə bağlı davamlı danışıqlar aparır: "Onun hər iki ölkə ilə əla münasibətləri var və düşünürəm ki, bizim şansımız var”.
Belə görünür ki, ABŞ indi Rusiya-Ukrayna müharibəsinin sonlanmasına mövqeyini dəyişir? Əvvəl ABŞ prezidenti Donald Tramp deyirdi ki, işğal olunmuş torpaqlar qayıtmayacaq. İndi isə deyir ki, Ukrayna parçalana bilməz. Bu ziddiyyətli mövqeyin səbəbi nədir?
Baki-xeber.com saytının sualını cavablandıran politoloq Xaqani Cəfərli bildirdi ki, Trampın eyforiya dövrü bitir və gerçəkliklər öz təsirini göstərməyə başlayır: "Tramp anlamağa başlayıb ki, Böyük Britaniya və Avropa İttifaqı, eləcə də Vaşinqtonun siyasi dairələrindəki güclü “Ukrayna partiyası”nın dəstəyi olmadan ticarət müharibəsindən qalib çıxa bilməyəcək. Əksinə, Trampın məğlub olma ehtimalı var ki, bu da onun siyasi karyerasına son qoya bilər.
Respublikaçılar Partiyası da bunun fərqindədir və Trampa təzyiqləri artırırlar.
Tramp anlayır ki, Rusiyanın Çin vassalına çevrilməsinin qarşısını almaq artıq mümkün deyil. Rusiya, obrazlı desək, Çin adlı “əjdaha”nın ağzı ilə mədəsi arasındadır. Üstəlik Böyük Britaniya və Avropa İttifaqının da dəstəyini itirə bilər. Buna görə də mövqeyində dəyişiklik edir.
Qənaətimcə, Tramp anlayır ki, Rusiya yeni dünya düzəninin subyektindən daha çox obyektinə çevrilir.
Qənaətlərim məni aldatmırsa, Azərbaycan, Türkiyə və Gürcüstanın atacağını ehtimal etdiyim addımlar postsovet çoğrafiyasının siyasi mənzərəsini ciddi şəkildə dəyişəcək".
Akif NƏSİRLİ
