Azər Həsrət: "Ermənistanı təzminat ödəməyə məcbur etmək əvəzinə, silahlandırırlar"
Məlum olduğu kimi, bu günlərdə Prezident İlham Əliyev parlamentdə çıxışında Ermənistanın silahlandırılmasına toxunub və Avropa İttifaqının bu ölkədəki missiyasının fəaliyyətini tənqid edib. O cümlədən, Sülh Fondunun Ermənistanı silahlandırdığını qeyd edib:
"Ermənistan tərəfi həm kütləvi surətdə silahlanır, eyni zamanda, xarici ölkələrlə, özü də böyük dövlətlərlə hərbi təlimlər keçirir. Ermənistana Qərb ölkələrindən silah, sursat göndərilir. Bəzi hallarda açıq - necə ki, Fransa-Ermənistan hərbi əməkdaşlığı açıq-aşkar aparılır - bəzi hallarda isə məxfi formada. Ancaq biz indi hər şeyi bilməliyik və bilirik, kimlər nəyi Ermənistana nə vaxt ötürür, hansı hərbi yük təyyarələri Ermənistan hava limanlarına enir və o yük təyyarələrində hansı hərbi məhsullar Ermənistana daşınır. Yəni, Ermənistanı bizə qarşı yönəltmək üçün bəzi Qərb dövlətlərinin planları göz qabağındadır".
Bu arada Avropa İttifaqının xarici siyasət xidmətinin rəsmi nümayəndəsi Peter Stano bununla bağlı sualı cavablandırarkən Ermənistanın silahlanmasına haqq qazandırıb. Stano bildirib ki, missiya silahsız və mülkidir və Aİ-nin regiona sülh gətirmək səylərini dəstəkləmək üçün yerləşdirilib: "Müdafiə potensialı üzərində işləmək və tərəfdaşlarını, o cümlədən təhlükəsizlik və müdafiə sahələrində seçmək Ermənistanın suveren hüququdur. Eyni şəkildə, münasibətlərin normallaşmasına davam etmək və davamlı sülhə nail olmaq üçün siyasi iradə olduğu müddətdə Azərbaycanın tərəfdaşları ilə intensiv hərbi əməkdaşlığının sülh prosesinə təsir edəcəyinə inanmırıq".
Bundan başqa, Ermənistan Təhlükəsizlik Şurasının katibi Armen Qriqoryan Brüsselə işgüzar səfəri çərçivəsində Avropa Xarici Fəaliyyət Xidmətinin baş katibinin təhlükəsizlik və müdafiə məsələləri üzrə müavini Şaql Fqaysla görüşüb. Fqays qeyd edib ki, Aİ missiyası guya yalnız sülh işi ilə məşğul olur.
Belə çıxır ki, hər iki Aİ rəsmisi hərbiləşmə məsələsində Azərbaycanla Ermənistanı bərabərləşdirirlər. Axı Ermənistanla Azərbaycan bərabər deyil. Nəzərə almaq lazımdır ki, Ermənistan hələ Azərbaycana təcavüz şəraitindədir. Onun suveren hüquqlarını Azərbaycanla eyniləşdirmək olmaz. Xüsusən də Stano Ermənistanın silahlanmasına haqq qazandırıb və verilən silahların hücum silahı olmadığını, müdafiə xarakterli olduğunu deyib.
Sözügedən məsələni bakı-xeber.com-a şərh edən siyasi şərhçi Azər Həsrət hesab edir ki, hər iki Aİ rəsmisinin arqumentləri əsassızdır: "Avropa İttifaqı ümumiyyətlə, Ermənistan-Azərbaycan məsələsində çox təəssüflər olsun ki, neytrallıq nümayiş etdirə bilmir. Yəni münaqişə davam etdiyi dövrdə də, işğal dövründə də Avroittifaq böyük hesabla Ermənistanın tərəfində olub. Halbuki, sözügedən nüfuzlu qurum öz təsir imkanlarından istifadə edib münaqişənin dinc yolla və ədalətli şəkildə həll edilməsinə töhfə verə bilərdi. Ancaq biz bunu görmədik. Onlar hansısa töhfə vermədilər, münaqişənin həllinə yardımçı olmadılar. Nəticə etibarı ilə uduzan, itirən və burnu ovulan, kapitulyasiya aktına imza atan Ermənistan oldu. İndi Azərbaycan ərazi bütövlüyünü və suverenliyini tam bərpa edib. Belə bir şəraitdə Aİ keçmişdən dərs çıxararaq neytrallıq nümayiş etdirməlidir. Ona görə ki, bu xalqlar arasında etimadın yaranmasına hansısa töhfə versin. Ancaq görünən odur ki, Aİ hələ də bir tərəfin yanındadır və Ermənistanı yenə də qızışdırmaqla məşğuldur. Ermənistan silahlandırılır və buna siyasi baxımdan haqq qazandırılır. Halbuki, Ermənistan təcavüzkar tərəf olub. Ərazilərimizi 30 ilə yaxın işğal altında saxlayıb, bütün yaşayış məntəqələrini məhv edib. Buna görə Ermənistanı təzminat ödəməyə məcbur etmək əvəzinə, silahlandırırlar. Bu dərəcədə ortada riyakar siyasət var və hələ utanmadan buna haqq da qazandırırlar. Prezident Əliyev hər zaman olduğu kimi, xoşməramlı çağrış edir. Yəni Aİ-nin bu birtərəfli silahlandırma siyasətinə toxunaraq, eyni zamanda ermənilərin də gözünü açmaq istəyir ki, sizə onlardan fayda gəlməyəcək. Anlaşmalı olduğunuz tək tərəf Azərbaycandır. Aİ ilə belə siyasət Ermənistanın ziyanınadır. Bir gün Ermənistan bunun əvəzini ağır ödəyəcək".
Vidadi ORDAHALLI
