Qulamhüseyn Əlibəyli: "Bu, erməni xəstəliyinin, həyasızlığının təzahür formasıdır"
Ermənistanın xarici işlər naziri Ararat Mirzoyan G20 nazirlərinin ikinci iclasında çıxışında Azərbaycanın ünvanına növbəti dəfə əsassız, yalan fikirlər səsləndirib. Mirzoyan iddia edib ki, guya Ermənistan Azərbaycan tərəfindən "təcavüzə" məruz qalıb:
"Bu gün bir çox regionlarda inkişafın tərəqqisinə ciddi zərbə vuran təcavüzün, silahlı münaqişələrin, geosiyasi gərginliyin, inamsızlığın şahidi oluruq. Genişmiqyaslı müharibənin nəticələri, onun suveren ərazisinə təcavüz aktları və Dağlıq Qarabağın bütün yerli əhalisi olan 140 minə yaxın qaçqın axını Ermənistanın inkişaf arzularına ciddi zərbə vurdu, lakin bu fəlakətlər hakimiyyəti sarsıda bilmədi".
Mirzoyan sülhdən danışır, amma bununla paralel Azərbaycanı ittiham edir. Sanki Azərbaycan ərazilərini 30 il işğalda saxlayan, 1 milyon qaçqın və məcburi köçkünün baiskarı Ermənistan deyilmiş.
"Sülhdən danışan erməni rəsmisinin belə fikirləri əslində erməni tərəfin əsl murdar niyyətini ortaya qoyur"
Sözügedən məsələni "Bakı-Xəbər"ə şərh edən sabiq millət vəkili, hüquqşünas Qulamhüseyn Əlibəyli hesab edir ki, bu, növbəti erməni riyakarlığıdır: "Erməni rəsmilərin beynəlxalq tədbirlərin tribunasından Azərbaycana qarşı, ölkəmiz əleyhinə bütün xalqımıza qarşı belə əsassız, iyrənc böhtanlar yağdırması birinci dəfə deyil baş verir. Bu, erməni xəstəliyinin, həyasızlığının təzahür formasıdır. Bununla ermənilər çalışırlar ki, öz havadarlarının gözü qarşısında özlərini yazıq, təcavüzə məruz qalmış millət kimi qələmə versinlər. Həmçinin bu minvalla havadarlarından daha çox pul qoparsınlar. Həmin vəsait hesabına yenidən silahlansınlar. Burada bir maraqlı cəhət var və o ondan ibarətdir ki, bunu bir növ etiraf kimi də başa düşmək lazımdır. Bu mənada etiraf ki, Azərbaycan ərazilərinin işğal olunması, orada terrorçuların məskunlaşdırılması, təbii sərvətlərin talan edilməsi əslində ermənilərin arzusu kimi qələmə verilir. Mahiyyət etibarı ilə həm də belə bir mənzərə yaranır. Çünki ermənilər çalışırlar ki, qonşu dövlətlərin ərazilərini işğal etsinlər. Buna nail ola bilmədikdə isə arzuları gözlərində qalır. Sonra da başlayırlar bütün dünyaya zarımağa ki, guya bunlar əzabkeş xalqdılar. Mirzoyanın son çıxışı da buna edilən bir cəhddir. Məgər Qarabağda 140 min erməni yaşayıb? Məgər antiterror əməliyyatlarından sonra Azərbaycan zorla etnik erməniləri Qarabağdan çıxarıb? Onlar könüllü olaraq Qarabağı tərk ediblər. Bu baxımdan Mirzoyanın Azərbaycanın ünvanına səsləndirdiyi fikirlər iftiradır və reallıqla heç bir əlaqəsi yoxdur. Sülhdən danışan erməni rəsmisinin belə fikirləri əslində erməni tərəfin əsl murdar niyyətini ortaya qoyur. Bütün bunlar həm də Azərbaycana qarşı qaralama kampaniyasının, informasiya müharibəsinin tərkib hissəsidir".
Vidadi ORDAHALLI
