Azərbaycan tarixində xüsusi yer tutan 44 günlük Vətən savaşı son üç əsrə yaxın bir dövrdə ölkəmizin məruz qaldığı ədalətsizliyə son qoydu. Qazanılan möhtəşəm zəfər sayəsində ərazi bütövlüyümüzün bərpa olunması ilə yanaşı, milli kimliyimizin təsdiqi istiqamətində mühüm addım atıldı. Bu, eyni zamanda ordu quruculuğu sahəsində görülən işlərin də məntiqi nəticəsi oldu. Üstəlik, bu qələbə milli qürurumuzu özümüzə qaytardı, Azərbaycan xalqı nə qədər məğrur, yenilməz xalq olduğunu dünyaya nümayiş etdirdi.
O da sirr deyil ki, Azərbaycan 30 ilə yaxın davam edən işğal dövründə problemin beynəlxalq hüquq çərçivəsində danışıqlar yolu həllinə çalışdı. Amma BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən çıxarılmasını tələb edən 4 qətnaməsi illərlə kağız üzərində qaldı, Ermənistana heç bir təzyiq göstərilmədi. Bütün bunlar fonunda 2020-ci il 27 sentyabr tarixində Ermənistan tərəfindən növbəti hərbi təxribat törədildi, Azərbaycanın yaşayış məntəqələri və döyüş mövqeləri şiddətli artilleriya atəşinə tutuldu. Düşmənin hərbi təxribatını dəf etmək və təcavüzünə son qoymaq məqsədilə Silahlı Qüvvələrin Ali Baş Komandanı İlham Əliyev bütün cəbhə boyu əks-hücuma keçmək əmri verdi. 44 gün davam edən Vətən müharibəsində Azərbaycan ordusu Müzəffər Ali Baş Komandanın rəhbərliyi ilə ölkənin ərazi bütövlüyünü, tarixi ədaləti, beynəlxalq hüququ bərpa etdi, BMT Təhlükəsizlik Şurasının qətnamələri icra olundu. Ordumuz bir nəfər fərarisi olmadan 44 günün hər bir günündə irəliləyərək düşməni kapitulyasiya aktına imza atmağına məcbur etdi. Bunlar həm də ordu quruculuğu istiqamətində yürüdülən siyasətin nə dərəcədə zəruri olduğunu təsdiqlədi. İkinci Qarabağ müharibəsinə qədər də ordumuz döyüş qabiliyyəti, maddi-texniki təminatı və digər göstəricilərinə görə davamlı şəkildə gücləndirildi. Məhz orduya göstərilən diqqət və qayğısı sayəsində Azərbaycan ordusu qısa zaman kəsiyndə dünyanın ən güclü 50 ordusu sırasına daxil ola bildi. 2016-cı ildəki aprel döyüşləri və 2018-ci ildə keçirdiyimiz Günnüt əməliyyatı Azərbaycan ordusunun gücünün qismən nümayişi idi. Onun kulminasiya nöqtəsi isə 44 günlük savaş oldu. Azərbaycan dünyada heç vaxt nümunəsi olmayan çətin relyef şəraitində mürəkkəb istehkamları darmadağın edərək qələbə qazandı və bütün dünyaya gücünü, qüdrətini sübut etdi. 2020-ci ilin 44 günlük Vətən müharibəsi ilə yanaşı, ötən il sentyabrın 19-da Qarabağ bölgəsində həyata keçirdiyi lokal xarakterli antiterror tədbirləri ilə də dünyaya nümunə oldu. Azərbaycan Silahlı Qüvvələri mülki obyektləri, mülki əhalini hədəfə almadı. Bu antiterror tədbirləri miqyasına görə çox nadir nümunələrdən biri oldu. Belə ki, belə tədbirlər zamanı mülki əhali arasında itki olmadı. Azərbaycan ordusu çox qısa müddətdə ərazidə kommunikasiyaları və yüksəklikləri nəzarətə götürdü. Ordumuz bununla daha bir əməliyyat modelini ortaya qoydu. Dünya bir daha gördü ki, yüksək peşəkarlığa malik olan Azərbaycan ordusu qarşısına qoyulan hədəflərə uğurla çatır. Bunun nəticəsində də strateji hədəflərə tam nail olunur. Amma Azərbaycan bununla arxayınlaşmır.
Ali Baş Komandan kimi İlham Əliyev Silahlı Qüvvələrimizin döyüş qabiliyyətinin daimi yüksəldilməsini xüsusi diqqət mərkəzində saxladı və bu gün də saxlayır. Yeddinci çağırış Milli Məclisin ilk iclasında çıxışı zamanı bu məqamla bağlı prezident İlham Əliyev qeyd edib: "İkinci Qarabağ müharibəsindən keçən dövr ərzində öz hərbi gücümüzü böyük dərəcədə artırmışıq, yeni silahlı birləşmələr yaradıldı, Xüsusi Təyinatlı Qüvvələrin say tərkibi bir neçə dəfə artırıldı. Yeni Xüsusi Təyinatlı Qüvvələr, Komando qüvvələri yaradıldı və onların da say tərkibi ildən-ilə artır və artacaq. Digər xüsusi təyinatlı silahlı birləşmələr yaradılmışdır və gecə-gündüz təlim işləri aparılır. Ordumuzun döyüş qabiliyyəti artır, texnika ilə təchizat lazımi səviyyədə təmin edilir və təmin ediləcəkdir. Ermənistan və onun arxasında duran istənilən ölkə bilməlidir ki, bizimlə şantaj və ultimatum dili ilə danışmaq mümkün olmayacaq. İstənilən cavabı verməyə hazırıq, buna qadirik və hər zaman buna hazır olmalıyıq". Dövlətimizin hərbi qüdrətinin artması və Silahlı Qüvvələrimizin regionda peşəkarlıq, təchizat və döyüş qabiliyyəti baxımından ən güclü orduya çevrilməsi bu günümüzün reallıqlarındandır. Bu gün ordumuz, hərbiyyəmizlə bağlı bir reallıq da var. Heç kimə sirr deyil ki, bu gün Azərbaycan həm də hərbi sənaye ölkəsidir. Ölkənin hərbi zavodlarında istehsal olunan silah-sursat dünyanın müxtəlif ölkələrinə ixrac edilir. Bu da uzaqgörən siyasətin məntiqi nəticəsidir. Bu gün də milli maraqlarımızı qorumaq üçün daima güclü siyasi liderə və iqtisadiyyata, güclü diplomatiyaya və yenilməz orduya ehtiyac var. Çünki bunlar milli gücün əsas komponentləridir və müstəqilliyimizi təmin edən vasitələrdir. Azərbaycan 44 günlük Vətən müharibəsində qazandığı tarixi qələbə ilə inkişafın, tərəqqinin yeni mərhələsinə qədəm qoyub. Əldə olunan böyük tarixi Qələbə bütövlükdə regionumuzda yeni geostrateji reallıqlar yaradıb. Artıq Azərbaycanın suverenliyi tam təmin olunduqdan sonra müstəqil Azərbaycanın tarixində yeni dövr başlayıb. Bu, inkişaf və yüksəliş dövrüdür.
Samirə SƏFƏROVA
