Faiq Ələkbərli: "Bu cür qondarma "abidə" ilə ermənilər və onların havadarları yalnız özlərinə təsəlli verə bilərlər"
Ermənistandakı müəyyən qüvvələr heç cür "Arsax" sevdasından əl çəkmək istəmirlər. Bu gün revanşistlər açıq, Nikol Paşinyan hökuməti isə dolayı yolla separatçı erməni əsgərlərinin "xatirəsinin əbədiləşdirilməsi" üçün çalışır. Ermənistan mediasının yaydığı məlumata görə, "Yerablur" hərbi panteonunda "Artsaxın çağırışı" memorialının təməlqoyma mərasimi olub.
"Mənim şərəfim var" fraksiyasının katibi Tiqran Abramyan mərasimdə sərsəm fkirlər səsləndirərək deyib ki, o hərbiçilər guya "Arsaxın" "azadlığı uğrunda ölüblər, məzarları da Qarabağda qalıb.
Ermənilər Qarabağda ölən separatçı erməni əsgərlərinə "abidə" qoyurlar və onları "Vətənin müdafiəçiləri" kimi qələmə verirlər, deyirlər ki, qoyulacaq memorial insanların "ziyarət yerinə" çevriləcək, Qarabağdan getmiş ermənilər o "abidəyə" baxıb təsəlli alacaqlar (?)
Abramyan deyib ki, yeni "memorialın" tikintisi "Artsaxda" həlak olmuş "qəhrəmanların" "ölməzliyini" "simvolizə" edir.
Kor tutduğunu buraxmayan kimi, bunlar da "Arsax" sevdasından, Qarabağda ölən separatçı, terrorçu əsgərləri "qəhrəmanlaşdırmaqdan" əl çəkmək istəmirlər, onlara qondarma abidə qoyub dünya ermənilərinin başını növbəti "soyqırım" nağılı ilə qatmaq istəyirlər.
"...dəyişəcək bir şey varsa, onu biz dəyişəcəyik"
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun "Türk xalqlarının fəlsəfi fikir tarixi və müasir fəlsəfəsi" şöbəsinin müdiri, fəlsəfə doktoru, dosent Faiq Ələkbərli "Bakı-Xəbər"ə "Məlum məsələdir ki, "Arsax" deyilən nəsnə artıq tarixin səhnəsindən silinib. Onların olmayan "Arsax" xülyası ətrafında birləşib Qarabağda həlak olan separatçılara abidə qoyması heç bir nəticə verməyəcək. Belə ucuz işlərlə Azərbaycanın əleyhinə təbliğat aparmaq yalnız Ermənistan və onun havadarları üçün müəyyən təsəlli ola bilər. Ancaq heç nə gerçəyi dəyişə bilməz. Bu cür qondarma "abidə" ilə ermənilər və onların havadarları yalnız özlərinə təsəlli verə bilərlər. Çünki dünya gerçəyi bilir və Azərbaycan öz tarixi torpaqlarını işğaldan azad edib, bu faktı dünya ictimaiyyəti qəbul edir"-deyə bildirdi.
F.Ələkbərli qeyd etdi ki, Azərbaycan genosidlə məşğul olmayıb, Ermənistan isə bizim xalqımıza qarşı soyqırım cinayəti törədib. "İndi də işğalçı erməni əsgərinə, separatçılara abidə qoyub o "memorialı" ziyarət yerinə çevirmək istəyirlər. Bu, ermənilərin növbəti dəfə hadisələri saxtalaşdırmasıdır. Onlar istəyirlər ki, dünyanın diqqətini özlərinə cəlb etsinlər, amma cəhdləri faydasızıdır"-deyə F.Ələkbərli bildirdi. F.Ələkbərlinin sözlərinə görə, ermənilər onu unutmamalıdır ki, hazırda yaşadıqları Ermənistan adlanan dövlət də tarixi Azərbaycan ərazisində qurulub, o torpaqlar türk torpaqlarıdır. "Biz o torpaqlara gec-tez sahib çıxacağıq. Onun dərdini çəkməlidirlər. Yoxsa hansısa qondarma tarixlə, saxta "Arsax" sevdası ilə, miflərlə yaşamaq nə ermənilərə, nə də havadarlarına yaxşı heç nə vəd etmir. Müəyyən təsəlli tapa bilərlər, o təsəlli ilə yaşaya bilərlər, amma onun ömrü uzun çəkməyəcək. Onlar belə qondarma məsələlərdənsə daha ciddi məsələlər haqda düşünsünlər, sülhə maraq göstərsinlər. Çünki xilas yolları sülhdür.
Azərbaycanın tarixi torpaqlarının necə ermənilərə verildiyi bəllidir, həqiqətlər ortaya çıxdıqca onlar narahat olurlar, bu səbəbdən də bu cür saxtakarlıqların sayını artırırlar. Biz onsuz da öz torpaqlarımızın sahibi olacağıq, Onlar nə qədər "Arsaxdan", separatçıların "qəhrəmanlığından" danışsalar da, bu heç nəyi dəyişmir, əksinə, dəyişəcək bir şey varsa onu biz dəyişəcəyik. Ona görə də, bu, ermənilərin növbəti saxtaraklığından başqa bir şey deyil. Bununla Azərbaycanı heç bir halda qaralaya bilməyəcəklər. Amma reallıq budur ki, daşnakı, terrorçunu, separatçını "qəhrəmanlaşdırmaq" ermənilərin xislətindədir, bununla da özlərini aldadırlar"-deyə F.Ələkbərli qeyd etdi.
İradə SARIYEVA
