Rauf Zeyni: "Quru sərhədlərin bağlı olması hər şeydən əvvəl təhlükəsizlik baxımından çox əhəmiyyətlidir"
Azərbaycanın qonşu ölkələrlə quru sərhədinin açılmasının hazırkı şəraitdə ziyanlı olduğu faktdır. Pandemiyanın tam öləziyib sıradan çıxmadığı, müxtəlif infeksion xəstəliklərin yayıldığı, eyni zamanda da təhlükəsizlik məsələlərinin daha vacib olduğu bir vəziyyətdə quru sərhədlərin bağlı qalması məqsədəuyğundur.
Prezident İlham Əliyev Milli Məcslisin ilk iclasındakı geniş nitqində bu məqama da toxunub.
Prezident Əliyev çıxışında bildirib: "...Digər qonşularımızla da sərhədlərimizin möhkəmləndirilməsi vacib şərtlərdən biridir və əminəm ki, Azərbaycan vətəndaşları da bu məsələyə anlayışla yanaşırlar. Bizim quru sərhədlərimiz hələ də bağlıdır, yəni, vətəndaşların gəliş-gedişləri üçün. Başa düşürük ki, bu, müəyyən çətinliklər yaradır. Ancaq bugünkü geosiyasi vəziyyət də hamının gözü qarşısındadır, daxili təhlükəsizliyi təmin etmək üçün bu, yeganə düzgün addımdır. Daxili təhlükəsizlik ilə bağlı bütün lazımi tədbirlər görülür. Təhdidlər də var - real və potensial. O təhdidlərin aradan qaldırılması üçün müvafiq qurumlar fəal işləyirlər. İctimaiyyət də lazım olan həcmdə bu məsələ ilə tanış olur, məlumatlar verilir. Ancaq bu sahə çox həssas olduğu üçün hesab edirəm Azərbaycan vətəndaşları başa düşürlər ki, bu barədə çox şey danışmaq yersiz və zərərli olar. Amma mən tam əminliklə deyə bilərəm ki, son illər ərzində quru sərhədlərimizin bağlı olması bizi çox böyük fəlakətlərdən xilas etdi. Hətta bu gün - sərhədlər bağlı olan vaxtda təhlükəli hərəkətlər olur və bu hərəkətlərin qarşısı alınır. Ona görə sərhədlərimizin qorunması bizi xarici risklərdən qoruyacaq, daxili risklər Azərbaycanda yoxdur. Azərbaycanda təhlükəsizlik, əmin-amanlıq uzun illərdir təmin edilir, sabitlik bütün dünya üçün nümunə ola bilər. Hər kəs bilir ki, əgər sabitlik olmasa, heç bir ölkə inkişaf edə bilməz. Bu gün sabitliyi pozulan ölkələrin vəziyyətini və aqibətini hər kəs yaxşı görür. Bu, təhlükəsizliyin, inkişafın, xarici sərmayənin cəlb edilməsi üçün başlıca şərtdir. Bizim təhlükəsizliklə bağlı bütün digər tədbirlər lazımi səviyyədə təmin edilir. Azərbaycan güclü dövlətdir və ildən-ilə bizim gücümüz artmaqdadır".
Sərhədlər bağlı olmasaydı hansı problemlər baş verə bilərdi?
"Quru sərhədlər açıq olsaydı oradan ölkəmizə təhlükəsizliklə, xəstəliklərlə, infeksiyalarla bağlı bəlalar yönələ bilərdi"
Müstəqil ekspert Rauf Zeyni "Bakı-Xəbər"ə şərhində bildirdi ki, quru sərhədlərimizin bağlı qalması qərarı ən düzgün qərardır və müsbət mənada onun nəticəsini görürük. "Cənab Prezident Milli Məclisdəki çıxışında bu məsələnin əhəmiyyətini bir daha vurğuladı. Təbii ki, gediş-gəliş vacibdir, turizmin inkişafı da lazımlıdır. Biz də quru sərhədlərin açılmasının tərəfdarıyıq ki, insanlar sərbəst şəkildə gedib-gəlsinlər. Ancaq burada çox incə bir məsələ var, viruslar yayılır və sair. Bu təhlükəsizliyimizlə birbaşa bağlı olduğu üçün cənab Prezidentin dediyi məsələlərlə biz də tamamilə şərikik. Əsas prioritet kimi dövlətin təhlükəsizliyi götürülməlidir. Dədə Qorqud nə deyirdi? "Torpağı qorumadınsa, əkib-becərməyə dəyməz". Quru sərhədlərin bağlı olması hər şeydən əvvəl təhlükəsizlik baxımından çox əhəmiyyətlidir.
Bu gün Azərbaycanın COP29 tədbirləri ərəfəsində olması ölkəmizi istəməyən qüvvələri çox narahat edir, hansısa təxribatlar törətməyə can ata bilərlər. COP29 ərəfəsində olmağımız, eyni zamanda da ölkəmizin regionda sülh, stabillik yaradan strateji bir dövlət olması, Azərbaycanın beynəlxalq aləmdə nüfuzunun qalxması, bizi istəməyən qüvvələrin çoxalması o deməkdir ki, biz təhlükəsizliyimizi daha yüksək səviyyədə qorumalıyıq. Region ölkələri ilə sıx əməkdaşlıq edərək onların da, bizim də təhlükəsizliyimizin təmin olunması istiqamətində lazım olan addımları atmalıyıq"-deyə R.Zeyni bildirdi.
R.Zeyninin fikrincə, təhıükəsiziliyimizin əsas şərtlərindən biri bu amildir. O qeyd etdi ki, təhlükəsizliyimizi qorumaq ən vacib məsələdir: "Təhlükəsizlik, stabillik, sabitlik bir-birinə bağlı olan məsələlərdir. Çünki ərazi bütövlüyümüzü, birliyimizi, müstəqilliyimizi qorumaq istəyiriksə bu üç faktor əsas götürülməlidir. Bu baxımdan hesab edirəm ki, biz bununla dövlətimizin, vətəndaşlarımızın təhlükəsizliyini qorumuş olduq. Quru sərhədlər açıq olsaydı oradan ölkəmizə təhlükəsizliklə, xəstəliklərlə, infeksiyalarla bağlı bəlalar yönələ bilərdi. Amma biz quru sərhədləri bağlı saxlamaqla bunları neytrallaşdırdıq"-deyə R.Zeyni əlavə etdi.
İradə SARIYEVA
