Xəyal Bəşirov: "Anna Akopyanın da Ukraynanın birinci xanımı Zelenskayanın dəvətilə o tədbirə getməsi və orada Rusiya əleyhinə fikirlər səsləndirməsi kifayət qədər əsas verir ki, Rusiya Ermənistana qarşı real addım atsın"
Ermənistanın baş naziri Anna Akopyanın həyat yoldaşı Facebook səhifəsində Nyu-Yorka səfərinin gündəmindən video yayımlayıb.
O, videonu belə təqdim edib: "Ukraynanın birinci xanımı Olena Zelenskayanın dəvəti ilə BMT Baş Assambleyasının 79-cu sessiyası çərçivəsində "Uşaqların gələcəyini təmin etmək: yumşaq güc üçün yeni çağırışların həlli" adlı sammitdə iştirak etdim".
Qeyd edək ki, A.Akopyan ilk dəfə deyil Olena Zelenskinin dəvətilə tədbirə qatılır. Ukrayna-Rusiya müharibəsinin yeni başladığı dövrlərdə A.Akopyan Ukraynaya getmişdi və orada çıxış etmişdi, bu da Rusiyanın ciddi narazılığına səbəb olmuşdu.
İndi də Rusiya prezidenti Vladimir Putinə qarşı Beynəlxalq Cinayət Məhkəməsində həbs qərarı ukraynalı uşaqlara görə çıxarılıb. İttiham edirlər ki, Putin Ukraynadan minlərlə uşağı oğurlatdırıb, deportasiya edib naməlum bir yerə apartdırıb. Buna görə Putinə cinayət işi açıblar. Zelenskinin həyat yoldaşının da qatıldığı BMT tədbirində mövzu əsasən Ukraynadan Rusiyanın deportasiya etdiyi uşaqlarla bağlı olub. Həmin konfransda Anna Akopyan da iştirak edib. Bu fakt, təəssüf ki, Rusiyanın nəzərindən qaçıb. Rusiya məsələyə reaksiya verməyib. Rusiya üçün ən həssas olan bir məsələyə reaksiya verilməməsi maraq doğurur.
"Biz Rusiyanın addımlarını görmürük, ona görə ki, bunun bir oyun olduğunu görmək mümkündür"
Siyasi və Hüquqi Araşdırmalar Mərkəzinin rəhbəri Xəyal Bəşirov "Bakı-Xəbər"ə şərhində bildirdi ki, Ermənistanın Baş naziri Nikol Paşinynanın arvadı Anna Akopyanın Ukraynanın birinci xanımı tərəfindən BMT-dəki Rusiya əleyhinə tədbirə dəvət edilməsini əslində Ukraynanın hazırda Rusiyaya qarşı cəbhəsini gücləndirmək addımı kimi qiymətləndirmək olar. "Hazırda Ermənistanın yürütdüyü siyasəti nəzərə alsaq Ukrayna tərəfinin niyyətini anlamaq mümkündür, amma biz də çox gözəl bilirik, Ukraynanın birinci xanımı da çox yaxşı anlayır ki, Ermənistan heç də səmimi olaraq antirusiya siyasəti yürütmür. Ermənistan Qərbə doğru addım atacağı təhdidi ilə Rusiyadan nə isə qoparır, paralel şəkildə Qərbdən həm yardımlar, həm silah, hərbi texnika, həm də digər dəstəklər alır. Ermənistanın yürütdüyü siyasət birmənalı siyasət deyil, bu konkret və yaxud birqütblü siyasət deyil. Ermənistan eyni zamanda KTMT-ya üzv dövlət olmaqla yanaşı, Avrasiya İqtisadi İttifaqına üzv olan dövlətdir. Bu təşkilatlarda fəaliyyətini dondurmaq iddiasını ortaya qoysa da, o təşkilatlardan çıxmaq kimi real addımlar atmır.
Əgər Ukrayna da həqiqətən Rusiyameylli siyasət yürüdən dövlətlərlə münasibətlərini kəsmək, yaxud onlarla analoji siyasət qurmaq niyyətini ortaya qoymaq istəyirsə, Ermənistanın atdığı addımların mahiyyətinə nəzər yetirib bu ölkə ilə siyasətini o şəkildə qurmalıdır. Ermənistan həmin o dövlət deyil ki, Rusiya-Ukrayna müharibəsi başlayandan sonra özünün Rusiyadam aldığı sınıq-salxaq qırıcı təyyarələrini Ukraynanı bombalamaq üçün Rusiyaya vermişdi. Ermənistan hələ də KTMT-yə üzv olmaqla, faktiki olaraq, Rusiyanın orbitində olan dövlətdir. Bu ölkə Avrasiya İqtisadi İttifaqına üzv olmaqla, ordan dvidendlər əldə etməklə, əslində bu gün Rusiyanın satelliti olmaq siyasətini davam etdirir. Bu şəkildə siyasət yürüdən bir dövlətin başçısının arvadının o konfransa dəvət edilməsi əslində bir daha ondan xəbər verir ki, heç də görünən hadisələr, atılan addınlar deyildiyi kimi həyata keçirilmir. Təbii ki, Anna Akopyan BMT kürsüsündə görüntü üçün Rusiyanın ünvanına pafoslu və populist çıxış edib, fikir səsləndirib. Amma bu səsləndirilən fikirlərə uyğun hər hansı bir addım atılacaqmı? Təbii ki, əsas məsələ budur.
Düşünürəm ki, işğala məruz qalmış və öz ərazi bütövlüyü uğrunda mübarizə aparan Ukrayna dövləti, onun rəsmiləri, o cümlədən birinci xanımı 30 ilə yaxın bir müddət ərzində Azərbaycana qarşı işğalçı siyasət yürüdən, bu gün də o siyasətindən əl çəkmək istəməyən, konstitusion əsasda, beynəlxalq səviyyədə, o cümlədən də Ukrayna tərəfindən tanınmış ərazilərimizə iddia edən Ermənistan dövlətinə bu yanaşma tərzi əslində səmimi yanaşma deyil. Bu, işğal siyasəti yürüdən dövlətin addımlarına göz yummaq, həm də dolayı yolla ona dəstək olmaq deməkdir. Düşünürəm ki, Ukrayna tərəfinin bu addımı yanlışdır. Çünki hazırkı mərhələdə Ukrayna öz ərazi bütövlüyü, torpaqlarının işğaldan azad olunması uğrunda mübarizə aparırsa, bütün addımlarında, siyasətində işğalçı dövlətlərlə mübarizə aparmalıdır. Ermənistan kimi bir dövlətlə birgə addım atılması həm də dolayısı yollarla işğala haqq qazandırmaq, işğalçı siyasət yürüdən dövlətə dəstək göstərmək deməkdir ki, bu da faktiki olaraq Ukrayna dövlətinin və xalqının maraqlarına ziddir"-deyə bildirən X.Bəşirov Rusiyanın hələ də A.Akopyanın səfərinə münasibət bildirməməsinin səbəblərinə də toxundu.
X.Bəşirov bildirdi ki, 44 günlük müharibədən sonra Rusiya və Ermənistan arasında baş verən proseslər bir çox hallarda oyun kimi görsənir: "Hazırda Rusiya və Ermənistan arasında gedən proseslər bir oyun təsiri bağışlayır. ABŞ başda olmaqla, Qərbin Rusiyanın Cənubi Qafqaz regionundan tam çıxarılması ilə bağlı siyasət yürütməsi fikirləri səsləndirlir. Düşünürəm ki, ABŞ Rusiyanın Cənubi Qafqazdan çıxmasını deyil, bu regionda onların yazdıqları ssenariyə uyğun fəaliyyət göstərməsini istəyir. Yəni bu gün Cənubi Qafqazda Rusiyanın Ermənistan vasitəsilə sıxışdırılıb çıxarılması ilə əlaqədar atılan addımların hamısı bu məqsədə xidmət edir. Ermənistan da, təbii ki, alət rolunu çox böyük məharətlə oynayır. Məsələn, indiyə kimi Rusiyaya qarşı atılan addımların, səsləndirilən fikirlərin mahiyyətinə nəzər yetirdikdə görürük ki, bu bir oyunun tərkib hissəsidir. Nikol Paşinyanın arvadı Anna Akopyanın da Ukraynanın birinci xanımı Zelenskayanın dəvəti ilə o tədbirə getməsi
və orada Rusiya əleyhinə fikirlər səsləndirməsi kifayət qədər əsas verir ki, Rusiya Ermənistana qarşı real addım atsın. Yəni Anna Akopyanın o tədbirə qatılması və Rusyanın əleyhinə danışması Rusiyanın Ermənistana qarşı gerçək addım atmasını şərtləndirən amildir. Bugünə qədər atılan addımlar da onu göstərir ki, əslində Rusiyanın əlində kifayət qədər əsaslar var ki, Ermənistana qarşı lazımı addımlar atsın. Buna qarşı olan hər hansı bir məsələ yoxdur. Sadəcə olaraq, düşünürəm ki, hazırkı mərhələdə Ermənistan bir oyunun alətidir və o oyunu oynayır. Əgər o oyundan kənara çıxacaqsa və həqiqərən də Rusiyaya qarşı ona yazılan ssenaridən kənar oyunlar oynamağa cəhd göstərəcəksə o halda biz Rusiyadan ona təpki görəcəyik. Akopyanın bu davranışına qarşı, təbii ki, Rusiya tərəfindən fikirlər səsləndiriləcək, Rusiya Xarici İşlər Nazirliyinin sözçüsü, yaxud digər şəxslər səviyyəsində buna qarşı mövqe bildiriləcək. Amma bu heç də hansısa real, ciddi addımın atılmasına gətirib çıxarmayacaq. Nə üçün? Çünki bugünə qədər Ermənistanın Baş naziri, onun arvadı, rəsmi şəxslər bu addımı atıblar. Hətta keçən dövrdə Anna Akopyan Ukraynaya səfər də etmişdi, yardım adı altında nələrsə aparmışdı. Rusiyadan buna qarşı da ciddi bir reaksiya görmədik. Düşünürəm ki, Ermənistanın Baş naziri və digər rəsmi şəxsləri Rusiyaya qarşı kifayət qədər sərt görünən çıxışlar ediblər. Amma biz Rusiyanın addımlarını görmürük, ona görə ki, bunun bir oyun olduğunu görmək mümkündür".
X.Bəşirov hesab edir ki, gələcəkdə Ermənistan bu oyunun şərtlərindən kənara çıxacaqsa, yaxud Ermənistanın addımı ssenaridənkənar bir addım olarsa Rusiyanın təpkisini görəcəyik.
İradə SARIYEVA
