Elşad Həsənov: "Proseslər yavaş da olsa buna doğru gedir"
"Əyilməz Fransa" siyasi partiyası Prezident Emmanuel Makronu impiçment proseduruna başlamaqla hədələyib.
Partiyanın üzvləri Emmanuel Makronu iyulda keçirilmiş parlament seçkilərinin nəticələrini tanımadığı və sosialist siyasi qüvvələrin irəli sürdükləri namizədi Baş nazir təyin etməkdən imtina etdiyi üçün onu demokratiyaya zərbə vurmaqda, həmçinin dövlət çevrilişinə cəhddə günahlandırıraq, ona qarşı impiçment proseduru başlamaqla hədələyiblər.
"Emmanuel Makron bilməlidir ki, o bizi demokratiyanın təməl qaydasına qarşı atdığı pis addıma tabe etdirə bilməyəcək və onun istefa verməsi üçün bütün konstitusion vasitələrdən istifadə olunacaq. Fransada yeganə hakim xalqın səsidir", - deyə partiyanın deputatları mətbuata açıqlamasında qeyd ediblər. Onlar bildirirlər ki, dövlət başçısının qərarı demokratiyaya qarşı institusional çevriliş kimi dəyərləndirilə bilər. Buna görə də onlar Konstitusiyanın 68-ci maddəsinə istinad edirlər ki, bu maddə də parlamentə Prezidenti mandatı ilə açıq şəkildə uyğun gəlməyən vəzifələri yerinə yetirdiyinə görə vəzifədən azad etməyə imkan verir.
"Aydındır ki, parlament seçkilərini nəzərə almaqdan imtina və ona məhəl qoymamaq barədə qərar prezident mandatının əsas tələblərinə cavab verməməkdə qınanılan uğursuzluqdur", - deyə açıqlamada vurğulanıb.
Ötən həftə Fransa hökumətinin başçısı Qabriel Attal Milli Assambleyadakı siyasi qüvvələrə – ifrat solçu "Fəth olunmamış Fransa" və ifrat sağçı "Milli mitinq"ə əlavə olaraq geniş koalisiya yaratmağı təklif edib, amma bunun baş tutacağı real deyil.
Görünən odur ki, Makronun impiçment prosesi başladı və siyasi qüvvələr arasında həmrəylik var. Nə gözlənilir?
"Bu səbəbdən Makron sona qədər səlahiyyətlərini icra edə bilməyəcək"
Sözügedən məsələni "Bakı-Xəbər"ə şərh edən edən siyasi ekspert Elşad Həsənovun fikrincə, Makron getdikcə küncə sıxışdırılır: "Əslində Makronun impiçmenti indi yox, çoxdan olmalı idi. Çünki ortalıqda ciddi iflas var. Makron ona göstərilən etimadı doğrulda bilmədi. Fransanın xarici ölkələrdə nüfuzu ciddi zərbələrə məruz qaldı. Bir sıra ölkələrdən Fransa faktiki olaraq qovuldu. Azərbaycanda Fransanın casus şəbəkəsi ifşa edildi. Bütün bunlardan sonra əslində Makron istefa verməli idi. Ümumiyyətlə, belə vəziyyətlərdə özünə hörmət edən siyasətçilər istefa verir. Çünki Makronun rəhbərlik etdiyi partiya həm Avropa Parlamentinə, həm də Fransa parlamentinə keçirilən seçkilərdə uduzdu. Bu, onun siyasi fiaskosu idi. Makron isə parlamentin səs çoxluğunu iqnor edərək yeni baş nazirin seçilməsini iqnor edir. Bu isə Makronun impiçment məsələsini gündəmə gətirir. Çünki Makron ölkə Konstitusiyasının 68-ci maddəsini pozaraq prezident səlahiyyətlərindən sui-istifadə edir. Ona görə də parlament Makronu vəzifəsindən uzaqlaşdıra bilər. Proseslər yavaş da olsa buna doğru gedir. Fikrimcə, məsələ daha da böyüyəcək və Makron vəzifəsini qoruya bilməyəcək. Çünki əksər siyasi qüvvələr Makronun siyasətini bəyənmir. Makron Fransa kimi dövlətin nüfuzunu yerə vurdu və hər yerdə uduza-uduza gedir. Bu səbəbdən o, sona qədər səlahiyyətlərini icra edə bilməyəcək".
Vidadi ORDAHALLI
