Çingiz Özgür: "Naxçıvanın bundan əvvəlki yerli hakimiyyətinin apardığı siyasət nəticəsində belə vəziyyət yaranıb"
Naxçıvan Ali Məclisinə deputat seçilmək istəyən namizədlərin siyahısı nəhayət açıqlandı. Çoxlu sayda özəlliklər və təəccüblü hallar var. Namizədlərin sırasında bircə nəfər belə Muxtar Respublika və ya Naxçıvan MR miqyasında tanınmış şəxs adına rast gəlinmir. Bəzi son çağırış deputat olmuş şəxslərdən başqa.
Elektrik şəbəkə, qaz sahəsinin işçiləri və pensiyaçılar daha çox gözə dəyir. Muxtar Respublikanın əhalisinə görə 3 ən böyük kəndi sayılan Nehrəm, Cəhri və Qarabağlardan tək Nehrəmi çıxmaq şərtilə qalan ikisi yalnız 1 seçki dairəsi təşkil edir. Nehrəmdə 2 seçki dairəsinin olması dairələrin hansı meyarlarla təşkil olunduğu barədə suallar yaradır.
Ümumilikdə, 45 seçki dairəsi üzrə 187 namizəd qeydə alınıb. Hər seçki dairəsinə təxminən 4 nəfər düşür. 45 mandat uğrunda mübarizəyə girişmiş 187 namizədin arasında əksəriyyət YAP üzvləri, bitərəflərlə bərabər 2 nəfər müxalifət namizədi var: bir nəfər AMİP-dən, bir nəfər AĞ Partiyadan. Yəni Naxçıvanda seçkiyə cəmi müxalifətdən 2 nəfər namizəd var. Maraqlıdır, bölgələrdə, Naxçıvanda müxalifət niyə bu qədər zəifdi və ya niyə bu qədər passivdir?
"O bölgənin siyasi məsələlərdə öndə olmağına baxmayaraq, bütün fəallar Bakıya yığılıb..."
Sözügedən məsələyə aydınlıq gətirən əslən Naxçıvandan olan tanınmış jurnalist, ictimai fəal Çingiz Özgür "Bakı-Xəbər"ə açıqlamasında bunun səbəbini bir sıra amillərlə əlaqələndirdi: "Bu, ümumi əyalət mənzərəsidir. Digər tərəfdən, Naxçıvanın bundan əvvəlki yerli hakimiyyətinin apardığı siyasət nəticəsində belə vəziyyət yaranıb. Dəfələrlə yazılarımızda qeyd etmişik ki, belə siyasət üzündən Naxçıvan boşalıb. Naxçıvanda qalanlar əsasən işləyən şəxslər, dövlət məmurları, müəllimlərdir. Özəl biznes orada çox azdır. Elə bir vəziyyət yaranıb ki, bilinir kimin şansı var və o adamlar Naxçıvan Ali Məclisinə namizədliyini verib. 3-4 kənddən bir deputat seçilirsə, həmin kəndlər bir-birinə yaxındır. Hamı bir-birini tanıyır. Biri namizədliyini verirsə, o biriləri iddialarından çəkilir. Hesab edirlər ki, o adam olduğu yerdə onların namizədliyi keçməz. Deməyim odur ki, özündən böyüyə, ziyalıya hörmət Naxçıvanda qalıb. Onu da nəzərə almaq lazımdır ki, Naxçıvan blokadada olduğu üçün daha çox əhali oranı tərk edib. Başqa bir tərəfdən, nəinki Naxçıvanda, digər bölgələrdə də müxalifət zəifdir. Naxçıvanda isə ümumiyyətlə müxalifət zəifdir və hətta 2 namizədi müxalifət saysaq belə, bu çox kiçik rəqəmdir. Naxçıvanın siyasi məsələlərdə öndə olmağına baxmayaraq, bütün fəallar Bakıya yığılıb. Bakıda yaşayan da Naxçıvan Ali Məclisinə deputat seçilməkdə o qədər də maraqlı olmur. Bütün bunlar nəzərə alınarsa, belə vəziyyət Naxçıvanda yaşayan əhalinin sayına uyğun olaraq normal mənzərədir. Yəni yerlər və namizədlərin sayı Naxçıvanı tanıyan insanlar üçün çox normal mənzərədir. Namizədlərə uğur arzu edirəm. Arzu edirəm ki, seçilən deputatlar xalqa xidmət etsinlər. Budəfəki Ali Məclis keçmiş Naxçıvan hakimiyyətinin süqutundan sonrakı ilk seçiləcək orqandır. Ümid edirəm ki Ali Məclis Naxçıvan camaatı üçün uğurlu olacaq".
Vidadi ORDAHALLI
