Elşən Manafov: "Bu təbliğatın uğursuzluğa uğrayacağı heç bir şübhə doğurmur"
COP29 ərəfəsində sosial mediada Azərbaycana qarşı kampaniya güclənir, bu zaman daha çox twitterdə aktivlik hiss olunur. Hazırda görünən odur ki, COP29 heşteqini mümkün qədər "çirkləndirmək" məqsədi qarşıya qoyulub.
Bu heşteqlə "Vardanyana və arsaxa azadlıq"dan tutmuş, "siyasi məhbus" və s. mövzulara qədər paylaşımlar edilir. COP29 tədbiri yaxınlaşdıqca, Azərbaycana qarşı qaralama kampaniyası daha da gücləndirilir. Bütün vasitələrlə ölkəmizi gözdən salmağa, imicini qaralamağa çalışırlar. Bir sözlə, COP29-la bağlı sosial şəbəkələrdə, dünya mediasında Azərbaycanın adının qaralanması ilə bağlı yeni kampaniya başlayıb. Bütün bunlar nə ilə bağlı ola bilər? COP29-un Vardanyanla, "arsaxla", insan haqları ilə nə əlaqəsi var?
"Beynəlxalq tədbirin ölkəmizdə keçirilməsinin qarşısını almaq, əngəlləmək üçün informasiya vasitələri, sosial..."
Sözügedən məsələ ilə bağlı fikirlərini "Bakı-Xəbər"lə bölüşən politoloq Elşən Manafov bununla bağlı bir sıra məqamlara toxundu: "BMT-nin İqlim Dəyişikliyi uzrə Çərçivə Konvensiyasının Tərəflər Konfransının 29-cu sessiyasının -COP29-un Azərbaycanda keçirilməsi barədə qərar keçən il dekabrin 11-də COP28-in plenar iclasinda qəbul edilib. Bu tədbirə ev sahibliyi etmək bir qayda olaraq BMT-nin beş regional qrupu arasında rotasiya edilir. 2024-cü ildə COP29-a ev sahibliyi etmək Azərbaycanın da daxil olduğu Şərqi Avropa regional qrupunun üzərinə düşüb. Ölkəmiz tədbirə ev sahibliyi etmək üçün öz namizədliyini irəli sürüb. Namizədliyini irəli sürmüş Ermənistan və Bolqarıstanla aparılan müzakirələrdən sonra bəlli tərəflər öz namizədliklərini geri götürüblər. Bu isə, dünyanın ən böyük və mühüm dövlətlərarası tədbirlərindən birinin Azərbaycanda keçirilməsinə nail olmaq baxımından dövlətimizin, onun dövlət başçısının növbəti mühüm təntənəli qələbəsidir. Tədbir Azərbaycana beynəlxalq medianın diqqətini cəlb etmək, ölkəmizlə bağlı həqiqətləri beynəlxalq birliyə çatdırmaq, mədəni irsimizi və tariximizi təbliğ etmək, ölkəmizdə turizm sektorunun inkişafına investisiyaların qoyulmasına nail olmaq, etibarlı, sərfəli və işgüzar münasibətlərimizin əhatə dairəsini genişləndirmək, ölkəmizin beynəlxalq nüfuzunun daha da artmasına töhfə vermək və s. baxımından böyük əhəmiyyət kəsb edəcək. İnamla demək olar ki, bu, Qoşulmama Hərəkatına sədrliyimiz və BMT Təhlükəsizlik Şurasına üzvlüyümüzdən sonra xarici siyasətimizin ən böyük uğurlarından biridir. Əlbəttə, bu uğurlar istər ölkə hüdudlarından kənarda, istərsə də onun daxilində Qərbdəki donor təşkilatları ilə sıx maliyyə əlaqələrinə malik olan beşinci kolonun təmsilçilərinin yuxusunu ərşə çəkir. Ona görə də onlar dövlətə, onun iqtidarına qarşı qarayaxma kampaniyası aparmaqla məşğul olurlar. Eyni zamanda, beynəlxalq tədbirin ölkəmizdə keçirilməsinin qarşısını almaq, əngəlləmək üçün informasiya vasitələri, sosial şəbəkələr üzərindən Qərbdə bəlli dairələrin, onlarlaiş birliyində olan erməni millətçilərinin və revanşistlərin maraqlarına uyğun olaraq bədnam təbliğat kampaniyası aparırlar. Hərçənd, bu təbliğatın uğursuzluğa uğrayacağı heç bir şübhə doğurmur. Onsuz da dünyanın nüfuzlu siyasətçiləri, dövlət xadimləri, işgüzar dairələrinin təmsilçiləri, elm və mədəniyyət xadimləri bu tədbirə qatılacaqları barədə mövqelərini izhar ediblər. Azərbaycan belə beynəlxalq tədbirlərin keçirilməsi sahəsində zəngin təcrübəyə malik bir dövlətdir. Etibarlı tərəfdaş kimi dünyada ad qazanıb. Bu isə, bəlli tərəflərin bütün səylərinə baxmayaraq, tədbirin yüksək səviyyədə keçiriləcəyini düşunməyə əsas verir".
Vidadi ORDAHALLI
