Azərbaycanın mövcud olduğu regionda lider statusu qazanması və artıq qlobal müstəviyə doğru inamla irəliləməsi, beynəlxalq miqyasda nüfuzlu dövlətə çevrilməsi birmənalı həqiqətdir. Azərbaycanın və şəxsən prezident İlham Əliyevin dəqiq, planlı və şaxələndirilmiş fəaliyyət strategiyası bu uğurların təməl daşlarından biridir.
Ötən müddət ərzində Azərbaycan dövləti beynəlxalq münasibətlər və əməkdaşlıq sistemində özünün olduqca mühüm rolunu və nüfuzlu yerini müəyyənləşdirə bilib.
Bunu prezident İlham Əliyevin London səfəri fonunda da görmək olar. Dövlət başçısının Böyük Britaniyanın Oksford şəhərində qarşı tərəflərin müraciətinə əsasən Lüksemburq Böyük Hersoqluğunun baş naziri Lyuk Friden, Litva Respublikasının prezidenti Gitanas Nauseda, Finlandiya Respublikasının prezidenti Aleksandr Stubb, Çex respublikasının baş naziri Petr Fiala və Almaniya Federativ Respublikasının kansleri Olaf Şolts ilə görüşləri həm də ölkəmizə yüksək diqqətdən xəbər verir. Xatırladaq ki, prezident İlham Əliyev Böyük Britaniya və Şimali İrlandiya Birləşmiş Krallığının baş naziri Kir Starmerin dəvəti ilə İngiltərəyə işgüzar səfəri çərçivəsində "Avropa Siyasi Birliyi"nin 4-cü Zirvə toplantısında iştirak edib. Həm xarizmatik liderin bütün keyfiyyətlərinə, həm də səmərəli dövlət idarəçiliyi bacarıqlarına və təcrübəsinə malik prezident İlham Əliyev bu gün çoxsaylı beynəlxalq tədbirlərə davamlı dəvətlər alır. Bunun ümdə səbəblərindən biri odur ki, Azərbaycanın xarici siyasət gündəliyi hər zaman sülhün və sabitliyin qorunmasına, qarşılıqlı faydalı əməkdaşlıq imkanlarının dəyələndirilməsinə əsaslanan ikitərəfli və çoxtərəfli əlaqələrin möhkəmləndirilməsinə hədəflənib. İndi dünya nizamının bütün qütblərini təmsil edən qlobal aktorlar Azərbaycanla əməkdaşlıq imkanlarını dəyərləndirmək üçün mümkün fürsətlərdən fəal şəkildə yararlanmağa çalışırlar. Eləcə də bu imkanların dəyərləndirilməsi Azərbaycan üçün yeni platformalarda təmsilçilik şansı da yaradır. Belə platformalar sırasında Şanxay Əməkdaşlıq Təşkilatı (ŞƏT) xüsusi önəm daşıyır. Qazaxıstanda keçirilən Zirvə toplantısında Prezident İlham Əliyevin fəxri qonaq qismində iştirak etməsi də bunu bir daha təsdiqləyir. Azərbaycanın dialoq üzrə tərəfdaşı olduğu ŞƏT ilə əlaqələri ötən doqquz il ərzində sürətlə inkişaf edib. Ölkəmizin Çin, Rusiya, Qazaxıstan, Pakistan, Özbəkistan, Qırğızıstan kimi təşkilata üzv və təsisçi dövlətlərlə əlaqələri yaxşı səviyyədə davam etdirilir. Astana Sammiti çərçivəsində Prezident İlham Əliyevin ikitərəfli və üçtərəfli əsasda çox mühüm görüşləri oldu və bu görüşlər çərçivəsində kifayət qədər önəmli mesajlar verildi. Azərbaycanın sülh gündəliyinin ədalətliliyi və dəstəklənməsi ilə bağlı Türkiyə, Çin, Pakistan, Rusiya kimi mühüm aktorların mövqeyi bir daha açıq şəkildə ifadə edildi. Amma digər məqamlar da böyük uğurlardan xəbər verir. Ümumiyyətlə, prezident İlham Əliyevin yalnız bu ay üçün gündəliyinə nəzər yetirmək kifayət edir ki, xarici siyasətdə çoxsaylı uğurları görmək mümkün olsun. Dövlət başçısının Şanxay Əməkdaşlıq Təşkilatı çərçivəsində keçirdiyi görüşlər, Çinlə imzalanan strateji tərəfdaşlıq sazişi, Astanada prezidentlərlərlə görüşü, Azərbaycan-Türkiyə-Pakistan formatında əməkdaşlıq, BRICS-lə münasibətlərin güclənməsi, bunun ardınca isə Londona səfər, bu platformada Azərbaycanın iştirakı mühüm uğur göstəricisidir.
Azərbaycanın həm Avropanın, həm də Asiyanın müxtəlif regionlarında yerləşən dövlətləri ilə ikitərəfli əlaqələri onu qitələrarası qovşağa çevirir. Bu fonda Azərbaycanın beynəlxalq aləmdə nüfuzunun artması ölkəmizin müxtəlif dövlətlərlə münasibətlərinə də müsbət təsir göstərir, əlaqələri strateji tərəfdaşlıq səviyyəsinə yüksəldir. Qeyd olunduğu kimi. prezident İlham Əliyevin müxtəlif nüfuzlu beynəlxalq tədbirlərə dəvət alması, bir sıra tədbirlərdə fəxri qonaq qismində iştirak etməsi ölkəmizin artan rolunun əyani təsdiqidir. Azərbaycanın Vətən müharibəsində Qələbəsi və antiterror tədbirləri nəticəsində öz suverenliyini tam bərpa etməsi ilə Cənubi Qafqazda yaranan yeni reallıqlar və əməkdaşlıq imkanları ikitərəfli və çoxtərəfli əlaqələrin dərinləşməsi istiqamətində yeni perspektivlər açır. Bunu dünya miqayasında qəbul edirlər. Azərbaycan prezidentinin Avropa liderləri ilə görüşləri, ölkəmizin Almaniya, Böyük Britaniya, ABŞ kimi ölkələrlə əlaqələri, intensiv səfərlər də bunu təsdiq edir. Azərbaycan COP29-a ev sahibliyi etməklə ölkələrlə tərəfdaş və dost olmaq imkanı qazanır. Azərbaycan, xüsusən də Türk dünyası ilə əlaqələrə böyük önəm verir. Şuşada Türk Dövlətləri Təşkilatının qeyri-rəsmi Zirvə görüşünün keçirilməsi bir daha bunu göstərir. Bu zirvə görüşü üzv ölkələr arasında əlaqələrin gücləndirilməsi baxımından böyük əhəmiyyət kəsb edir. 15 il əvvəl Naxçıvanda bu təşkilat yaranandan keçən dövr ərzində Türk Dövlətləri Təşkilatı səmərəli fəaliyyət göstərib. Bu müddət ərzində mədəni, humanitar, iqtisadi və siyasi əlaqələrin genişləndirilməsi istiqamətində mühüm addımlar atılıb. Azərbaycan bütün türk dövlətlərilə geniş münasibətlərə malikdir və bu ölkələr arasında əlaqələrin güclənməsində maraqlıdır. Azərbaycan Türk Dövlətləri Təşkilatının yaranmasında yaxından iştirak edib, hər zaman Türk dünyasının sıx birləşməsinə çalışıb. Türk dünyasının və Türk Dövlətləri Təşkilatının gücləndirilməsi Azərbaycanın xarici siyasətinin prioritet istiqamətidir. Qonuşularla da, Ermənistan istisna olmaqla, münasibətlər sürətlə inkişaf edir. Bütün bunlar İkinci Qarabağ müharibəsindən sonra Azərbaycanın daha qlobal xarici siyasət həyata keçirməsinin mühüm göstəricisidir.
Samirə SƏFƏROVA
