Ceyhun Məmmədov: "Ermənistanın silahlandırılması yenidən münaqişənin alovlanmasına səbəb ola bilər"
Fransa prezidenti Emmanuel Makronun Avropa Siyasi İcmasının Zirvə toplantısında mətbuat konfransı zamanı Ermənistanın hərbiləşdirmə siyasətinə haqq qazandıraraq və Azərbaycana qarşı açıq qərəzli mövqe nümayiş etdirərək həyasızcasına iftira atıb:
"Son onilliyə nəzər salsanız, Azərbaycan həqiqətən Ermənistandan daha yaxşı silahlanmış kimi görünür. Yaddaşım mənə düzgün xidmət edirsə, səhv eetmirəmsə Azərbaycan 2020-ci ildə dəhşətli müharibəyə başladı".
Zalda olan bir şəxsin "Azərbaycan öz suveren ərazilərini geri qaytarıb" replikasına Makron əsəbi reaksiya verib: "Bura debat deyil..."
Daha sonra Makron Ermənistana silah vermələrinə bəraət qazandırıb və bildirib ki, müttəfiqlərinə və tərəfdaşlarına özlərini müdafiə etmək üçün silah-sursat göndərmək normal məsələdir: "Silahlanmaq istəyən və başqa ölkənin təcavüzünə məruz qala biləcəyini düşünən suveren ölkənin müraciətinə sadəcə cavab vermək normaldır. Və mən heç vaxt baş nazir Paşinyandan eşitməmişəm ki, onun hər hansı müharibə və ya təcavüz layihəsi var".
"Bütün bunlara baxmayaraq, hər zaman olduğu kimi, yenə də biz Makronun öz ampluasında olduğunu görürük"
Sözügedən məsələni "Bakı-Xəbər"ə şərh edən millət vəkili Ceyhun Məmmədovun fikrincə, təəssüflər olsun ki, hər zaman olduğu kimi, yenə də biz Makronun öz ampluasında olduğunu görürük: "Azərbaycan həqiqətlərini təhrif edir. Otuz il ərzində Ermənistanın Azərbaycanın başına gətirdiyi müsibətlərə toxunmadan yenə yanlış bir formada ölkəmizi ittiham edir. Guya 2020-ci ildə Azərbaycan Ermənistana qarşı müharibə elan edib. Belə bir sərsəm fikirləri irəli sürür. Makronun bir daha diqqətinə çatdırmaq lazımdır ki, Azərbaycana hücum edən, torpaqlarını işğal edən Ermənistan olub. Azərbaycan kiminsə torpağını işğal etməyib, kiməsə qarşı müharibə aparmayıb. Azərbaycan öz ərazilərini azad edərək öz suverenliyini və ərazi bütövlüyünü təmin edib. Belə ki, 44 günlük Vətən müharibəsi zamanı biz ərazi bütövlüyümüzü təmin etdik. 2023-cü ilin sentyabrında antiterror əməliyyatları sayəsində suverenliyimizi tam təmin etdik. Ancaq nədənsə, bütün bunları Makron Azərbaycanın yenidən müharibəyə başlaması kimi təqdim edir. 1988-ci ildən erməni separatizmi başladı. Daha sonra Ermənistandan azərbaycanlılar qovuldu, ərazilərimiz işğal edildi. 1 milyon insan qaçqın və məcburi köçkünə çevrildi. Bizim yüzlərlə kənd və şəhərimiz ermənilər tərəfindən viran edildi. Nədənsə, bütün bunları Makron görmək istəmir. Ümumiyyətlə, bu məsələlərə toxunmur və yenidən özünü Fransanın yox, Ermənistanın prezidenti kimi aparır. Biz bir daha Makronun diqqətinə çatdırırıq ki, həqiqətləri təhrif etmək olmaz. Bütün dünya bilir ki, BMT Təhlükəsizlik Şurasının 4 qətnaməsi nəyə görə qəbul olunub. Həmin qətnamələrdə Azərbaycan torpaqlarının azad olunması məsələsi xüsusi vurğulanır. Ona görə də bu mənada və anlamda həqiqətləri təhrif etmək mümkün deyil. Ermənistanın silahlandırılmasına gəldikdə isə, o da məlumdur ki, hələ də iki ölkə arasında müharibə bitməyib. O mənada ki, Azərbaycanla Ermənistan arasında sülh sazişi imzalanmayıb. O baxımdan Ermənistanın silahlandırılması yenidən münaqişənin alovlanmasına səbəb ola bilər. Londanda Paşinyan cənab Prezidentlə görüşdən imtina etdi. Bütün bu məsələlər Ermənistanı yenidən revanşizmə sürükləyir. Bölgəmizdə gərginlik yaradır və yenidən münaqişəyə səbəb olur. Ona görə də bu məsələni bütün dünya dövlətləri nəzərə almalıdır. Təəssüf ki, Ermənistanı silahlandıran ölkələrin başında yenə də Fransa gəlir".
Vidadi ORDAHALLI
