Faiq Ələkbərli: "Fransanın müstəmləkəçilik siyasətinə qarşı vahid bir cəbhənin yaradılması mütləq mənada o xalqları müstəqilliyə qovuşduracaq"
Qvadelupanın Azadlığı naminə Xalq Birliyinin təşkilatçılığı, Bakı Təşəbbüs Qrupunun dəstəyi və Fransa müstəmləkəçiliyindən əziyyət çəkən bir sıra dövlətlərin rəsmi nümayəndələrin iştirakı ilə Bakıda keçirilən I Qurultayının yekunlarına dair Beynəlxalq Azadlıq Cəbhəsinin Yaranması Haqqında Bəyannamə imzalanıb.
Sənədi qurultay iştirakçısı olan 14 müstəmləkə dövlətinin təmsilçiləri imzalayıb.
Artıq məlumat verildiyi kimi, Qvadelupanın Azadlığı naminə Xalq Birliyinin təşkilatçılığı və Bakı Təşəbbüs Qrupunun dəstəyi ilə Fransa müstəmləkəçiliyindən əziyyət çəkən Korsika, Melaneziya, Polineziya, Karib və Antil adalar qrupundan olan 20-yə yaxın siyasi partiya və müstəqillik hərəkatlarının rəhbər şəxslərinin iştirakı ilə 17-18 iyul tarixlərində Bakıda birinci Qurultay keçirilib.
İki gün davam edən qapalı müzakirələrin yekunu kimi Fransa koloniyalarında müstəqillik uğrunda mübarizə aparan siyasi partiya və hərəkatların rəhbər şəxsləri vahid Cəbhənin Fransa Koloniyalarının Beynəlxalq Azadlıq Cəbhəsinin yaradılmasına dair razılığa gəliblər.
Qurultayda iştirak edən 17 Fransa və Niderland kaloniyalarının səlahiyyətli rəsmiləri Beynəlxalq Azadlıq Cəbhəsinin yaradılması haqqında yekun Bəyannaməni imzalayıblar. Həmçinin, iştirakçılar Cəbhənin Nizamnaməsini təsdiqləyiblər.
Bəyannamədə ölkəmizin dekolonizasiya prosesindəki vacib rolu, habelə Bakı Təşəbbüs Qrupunun müstəmləkə ərazilərinin azadlığı uğrunda apardığı mübarizəyə verdiyi dəstək və sadiqlik xüsusi vurğulanıb və Azərbaycana minnətdarlıq ifadə olunub.
Sənəddə Fransa kolonializminin irqçi və repressiv siyasəti pislənərək, bu xüsusda, Yeni Kaledoniya və digər müstəmləkə ərazilərində Fransa Hökuməti tərəfindən həyata keçirilən cinayətlər kəskin qınanılıb.
Beynəlxalq Azadlıq Cəbhəsinin yaradılması Fransa müstəmləkəçiliyinə qarşı mərkəzləşdirilmiş platformanın - vahid çətirin yaradılması deməkdir. Qurultay iştirakçıları müstəqillik uğrunda mübarizədə daha sıx təşkilatlanma, habelə Fransa kolonializminə qalib gələrək müstəqillik əldə etmək yolunda fəaliyyətlərinin əlaqələndirilməsinə qərar veriblər.
Hazırda müstəmləkə altında yaşayan digər ərazilər üçün üzvlüyə açıq olacaq Cəbhə Fransa koloniyalarının dekolonizasiya prosesində səylərini birləşdirmək və öz müqəddəratlarını təyin etmə məsələlərini dünya ictimaiyyətinə dolğun şəkildə çatdırmaq məqsədi daşıyır. Bundan başqa, Cəbhənin gələcək fəaliyyətinə müstəmləkəçiliyin aradan qaldırılmasına dair strategiyanın, o cümlədən Fəaliyyət Planının və Gündəliyinin hazırlanması və beynəlxalq təşkilatlara təqdim edilməsi kimi məsələlər daxildir.
Bildirilir ki, Fransa Koloniyalarının Qurultayının keçirilməsi məhz Azərbaycanın Qoşulmama Hərəkatına sədrliyi dövründə lokomotiv rolunu üzərinə götürərək dekolonizasiya prosesinə verdiyi töhfələr nəticəsində mümkün olub.
Xatırladaq ki, Bakı Təşəbbüs Qrupu Fransa müstəmləkələrinin azadlıq uğrunda ədalətli mübarizəsinə dəstəyini davam etdirir.
"Fransa bundan sonra müstəmləkəçilik siyasətindən əl çəkməsə daha ağır zərbə alacaq"
Beynəlxalq Azadlıq Cəbhəsinin yaradılmasını çox mühüm hadisə hesab edən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli "Bakı-Xəbər"ə bildirdi ki, Qvadelupanın Azadlığı naminə Xalq Birliyinin təşkilatçılığı və Bakı Təşəbbüs Qrupunun dəstəyi və Fransa müstəmləkəçiliyindən əziyyət çəkən bir sıra dövlətlərin rəsmi nümayəndələrinin iştirakı ilə Bakıda I Qurultayının keçirilməsi və yekunda Beynəlxalq Azadlıq Cəbhəsinin Yaranması Haqqında Bəyannamə imzalanması müasir dövrdə müstəmləkəçiliyə qarşı mübarizə tarixində əhəmiyyətli yer tutur. "Əlbəttə, Beynəlxalq Azadlıq Cəbhəsinin yaranması Fransanın mövcud müstəmləkə siyasətinə qarşı aparılan uğurlu mübarizəni daha da gücləndirəcək. Azadlıq Cəbhəsinin yaradılması da göstərir ki, indiyə qədər görülən işlər nəticəsiz qalmayıb, müstəmləkəçiliyə qarşı mübarizə aparan xalqlar da, onların arzularına dəstək verənlər də düzgün yoldadırlar. Fransa özünü "demokratiyanın beşiyi", "ədalətli, humanist" bir ölkə kimi qələmə verir, ancaq faktki olaraq bu ölkə imperialist dövlət olaraq siyasətini davam etdirir. Fransa vaxtilə imperializmin ən üzdə olan dövlətlərindən biri olub, bu gün də o siyasətdən əl çəkmir. Fransa müstəmləkəçiliyinə qarşı Beynəlxalq Azadlıq Cəbhəsinin yaradılmasını ehtiva edən sənədə 14 müstəmləkə dövlətinin təmsilçilərinin imza atması bir tarixdir. Bu Azadlıq Cəbhəsinin yaradılması tarixi Bakıda yazıldı, Bakının müstəmləkəçiliyə qarşı mübarizədə əsas mərkəzə çevrilməsi də təqdirəlayiq hadisədir. Bakı Təşəbbüs Qrupunun bu prosesə yaxından dəstək verməsi onu göstərir ki, onların mübarizəsi uğurla nəticələnəcək. Fransanın müstəmləkəçilik siyasətinə qarşı vahid bir cəbhənin yaradılması mütləq mənada o xalqları müstəqilliyə qovuşduracaq".
F.Ələkbərli vurğuladı ki, Fransa hökuməti, dövlət rəsmiləri, xüsusən də prezident Makron bu məsələdən hələ ciddi nəticə çıxara bilməyib. O hesab edir ki, görülən bütün işlər, atılan addımlar Fransaya öz yerini göstərəcək. "Fransa bundan sonra müstəmləkəçilik siyasətindən əl çəkməsə daha ağır zərbə alacaq. Bütün hallarda Fransanın apardığı müstəmləkəçilik siyasətinə bir "dur" deyən olmalı idi. Şübhəsiz ki, müstəmləkə xalqlarının da atdığı addımlar, Bakıda vahid bir cəbhənin təşkil edilməsi də müsbət haldır. Demək istədiyimiz odur ki, Bakıda bu addımların atılması, qurultayın keçirilməsi, bəyannamənin qəbul olunması, fransız müstəmləkəçiliyindən əziyyət çəkən xalqların liderlərinin bir araya gəlməsi, vahid mövqe nümayiş etdirməsi bütün hallarda XXI əsrin tarixinə düşəcək. Onlar öz azadlıqlarını, dövlət müstəqilliklərini əldə etdikdən sonra Fransa müstəmləkəçiliyindən xilas olmuş xalqların tarixində Azərbaycanın, Bakının adı da qeyd olunacaq. Bakı demokratik bir şəkildə bu prosesə dəstək verir. Mənə elə gəlir ki, burda söhbət demokratik məsələlərdən gedir və bu sahədə Bakının rolu vardır. Hesab edirəm ki, Fransa öz layiqli cəzasını alacaq"-deyə F.Ələkbərli qeyd etdi.
İradə SARIYEVA
