Turab Rzayev: "Putin özü də bilir ki, hazırda ABŞ rəhbərliyinin başı seçkilərə qarışıb"
Rusiya xarici işlər nazirinin müavini Mixail Qaluzin bildirib ki, Moskva Ukrayna və onun müttəfiqləri tərəfindən hazırlanmaqda olan ikinci beynəlxalq sülh sammitində iştirak etməyəcək. Rusiya XİN sammitin ultimatum ritorikasına və Rusiya-Ukrayna münaqişəsinin həlli ilə bağlı digər təşəbbüslərə məhəl qoymadığı üçün sülh konfransını çıxılmaz nöqtə hesab edir:
"Biz Kiyev rejiminin və onun Qərb kuratorlarının bu ilin iyun ayının ortalarında İsveçrənin Bürgenstok şəhərində baş tutmayan sülh sammitinə oxşar tədbir keçirmək niyyətlərini bilirik", deyə Qaluzin bildirib. Onun sözlərinə görə, Rusiya Ukrayna prezidenti Vladimir Zelenskinin düsturunda təklif olunan "ultimatumları qəbul etmir".
Macarıstanın baş naziri Orban Avropa liderlərinə yazdığı məktubda bildirir ki, Avropa Rusiyanın Ukraynaya qarşı müharibəsində sülhyaratma proseslərinə başlamaq üçün təşəbbüs göstərməlidir: "Əgər bu prosesi saxlaya bilməsək və ya dayandıra bilməsək, o zaman qarşıdakı iki ayda cəbhə xəttində əvvəlkindən daha dramatik itkilərin və hərbi hadisələrin şahidi olacağıq".
Putin nəyə arxayındır, niyə bu qədər inamlı danışır?
Siyasi şərhçi Turab Rzayev "Bakı-Xəbər"ə açıqlamasında bildirdi ki, Rusiya Qərbdəki fikir ayrılığından istifadə etməyə çalışır: "Burda bir neçə istiqamətdə bunu hiss edə bilərik. Birincisi odur ki, ABŞ - da prezident seçkiləri yaxınlaşır. Bu seçkiyə namizəd olan Baydenin ciddi sağlıq problemləri var. Ona görə də, onun seçilib - seçilməyəcəyi hələ məlum deyil. Baydenin öz tərəfdarları belə ona namizədliyini geri götürməklə bağlı təzyiqlər edirlər. Faktiki olaraq, onun fiziki durumunun prezidentliyə yetərli olmadığını düşünürlər. Belə bir dövrdə NATO - nun, eyni zamanda ABŞ - ın Ukraynaya verəcəyi dəstəyin bir qismi sırf populizim xarakter daşıyır. Daha çox Ukraynaya veriləcək yardımlara yox, ABŞ - ın daxilindəki seçkilərə hesablanır. Bunu Rusiya da çox gözəl bilir. 60 milyardlıq yardım elan olunsa da, hələ ki, Ukraynaya əhəmiyyətli bir yardım gəlib çıxmayıb. Aydın məsələdir ki, pilot təlimləri 2 - 3 il davam edən bir prosesdir. Qısa müddət ərzində pilotlar yetişdirilib göndərilə bilərdi. Yaxud, F16 -larla bağlı Blinkenin açıqlaması da onun daha çox seçkiyə və populizmə xidmətini göstərir. Blinken bu seçkidən sonra, böyük ehtimal, Baydenin komandasında yer almaq istəyir. Əks halda bu şəkildə hansısa strateji silah tədarükü ilə bağlı məlumatın verilməsini başqa cür əsaslandırmaq mümkün deyil. Digər tərəfdən, Trampın çox böyük şansları var. Tramp prezident seçiləcəyi təqdirdə Putinlə danışacağını, Ukraynaya çox böyük siyasi təzyiq edəcəyini, sülh prosesinə məcbur edəcəyini bildirir. Bu da yenə Rusiya üçün əlavə bir ümid deməkdir. Qərb dövlətləri daxilində də xüsusi xaos var. Xüsusilə Avropa İttifaqı daxilində Fransa parlamentə nəzarəti itirdi. Fransanın hakimiyyətlik dövrü, demək olar ki, bitib. İtaliyada da eyni vəziyyət özünü göstərir. Almaniya daxilində, Avstriyada Rusiya ilə əlaqəli olan qrupların olduğunu da bilirik. Macarıstan, Slovakiya kimi bəzi ölkələr açıq şəkildə Rusiya-Ukrayna müharibəsinin bitməsini, yaxud burada öz maraqlarının nəzərə alınmasını istəyirlər. Yadınızdadırsa, Slovakiyada baş nazirə sui - qəsd oldu. Eyni zamanda Britaniyada da hakimiyyət dəyişikliyi oldu. Daxili siyasi gərginlik həmin ölkələrdə daxili siyasi xaosa gətirib çıxarır və onlar ortaya heç bir siyasi mövqe qoya bilmirlər. Avropa ölkələri arasında fərqli düşüncələr var. Ölkələr özləri də Ukrayna prosesi ilə bağlı ortaya vahid fikir qoya bilmirlər. Bu da ABŞ - ın formalaşdırmağa çalışdığı Ukraynaya dəstək, Rusiyaya qarşı mübarizə üçün qlobal birliyin zəifləməsinə gətirib çıxarır. Düşünürəm ki, Rusiya bundan istifadə etməyə çalışır. Ancaq onun da burda çətinliyi kifayət qədərdi. Çünki Rusiya istədiyi hərbi uğurları cəbhədə əldə edə bilmədi. Bundan sonra Rusiya cəbhə xəttində nə qədər çalışsa da, əhəmiyyətli irəliləyiş göstərə bilmədi. Xarkovu da ələ keçirə bilmədi. Ona görə də onun davranışında müəyyən qədər blef cəhdləri görmək olar. Putin özü də bilir ki, hazırda ABŞ rəhbərliyinin başı seçkilərə qarışıb. Xüsusilə də Bayden və Tramp mübarizə ilə məşğuldurlar. Rusiya Avropa daxilində sabitliyi pozmağa çalışır. Digər tərəfdən ABŞ - da baş verəcək seçkilərin nəticəsi Rusiya üçün gözlənilməz ola bilər. Böyük ehtimal, Bayden və onun komandasının hakimiyyətdə qalması mümkündür".
Məhəmmədəli QƏRİBLİ
