İlyas Hüseynov: "Onlar demokratların hakimiyyətdən gedəcəyini zənn edərək, son fürsətdən də istifadə etmək istəyindədirlər"
ABŞ-dakı Daşnaksütyun yönümlü təşkilatlar ABŞ-da keçiriləcək prezident seçkiləri ərəfəsində yenidən fəallaşıblar. ABŞ hökumətinin Azərbaycanın ərazi bütövlüyü əleyhinə addım atması üçün çağırışlar edən erməni daşnakları Qarabağdan köçüb getmiş ermənənilərin geri qayıtmaları üçün yaxa-başlarını cırır, ABŞ prezidentindən kömək istəyirlər.
Amerika Erməni Milli Komitəsinin (ANCA) Vaşinqton ofisinin icraçı direktoru Aram Qəmbəryan deyib ki, ABŞ prezidenti Co Bayden beynəlxalq mandat və beynəlxalq sülhməramlıların himayəsi altında ermənilərin "Dağlıq Qarabağa" təhlükəsiz və davamlı qayıtması üçün qlobal kampaniyaya rəhbərlik etməlidir.
Bundan başqa, Qəmbəryan ənənəvi erməni uydurmaları ilə çıxış edib, olmayan "etnik təmizləmədən" danışıb, "120 min ermənin dərdinə ağlayıb" və ABŞ prezidentindən, ABŞ Konqresindən, ABŞ Dövlət Departamentindən imdad umub.
Qəmbəryan eyni zamanda Bakıda həbsdə olan separatçıların da dərdinə qalıb və Azərbaycanı bu və digər məsələlərdə ittiham etməyə cəhd edib.
C.Bayden hazırda seçkilərlə məşğul olduğu halda ermənilər yenə də onu rahat buraxmır və onu iş-gücünü buraxıb "erməni məsələsi ilə məşğul olmağa" məcbur etmək istəyirlər. Bayden öz canının, iş-gücünün hayına qalsa da, haylar yenidən Qarabağla bağlı xam xəyalla düşüblər.
"Prezident seçkisi öncəsi bu məsələni təsadüfən irəli sürməyiblər"
Politoloq İlyas Hüseynov "Bakı-Xəbər"ə şərhində bildirdi ki, ABŞ-da yaşayan ermənilər öz böyük ambisiyalarından əl çəkmirlər. İ.Hüseynovun sözlərinə görə, "dənizdən-dənizə Ermənistan" xəyalı ilə yaşayan bu şəxslər əllərində olan bütün imkanlardan bizə qarşı hər cür istifadə edirlər. "Bunu çox həyasızcasına, aqressiv formada icra etməkdən də çəkinmirlər. Amerika Erməni Milli Konqresi uzun illərdir ki, qardaş Türkiyəyə və ölkəmizə qarşı fəaliyyət göstərir. Qondarma erməni soyqırımının tanıdılması, ölkəmizə qarşı çirkin kampaniya onların əsas hədəfidir. Lokal xarakterli antiterror tədbirlərindən sonra könüllü olaraq bölgəni tərk edən ermənilərin hüquqlarının qorunması, onların yenidən Azərbaycan ərazisinə qaytarılması məqsədlərini irəli sürən ANCA-nın fünksionerləri bu gün, həm də ABŞ-da keçirilməsi nəzərdə tutulan prezident seçkisi öncəsi bu məsələni təsadüfən irəli sürməyiblər.
Onlar demokratların hakimiyyətdən gedəcəyini zənn edərək, son fürsətdən də istifadə etmək istəyindədirlər. Digər tərəfdən, bölgədə separatizmi təşkil edən, onu maliyyələşdirən, qanunsuz ordu qrupları yaradan şəxslərin həbsini də siyasi bir proses kimi qələmə verməyə çalışırlar"-deyə İ.Hüseynov bildirdi.
İ.Hüseynovun sözlərinə görə, bu da tamamilə yolverilməzdir, onlar törətdiklər bütün cinayət əməllərinə görə bu gün ədələt məhkəməsi qarşısında cavab verməlidirlər. "Onların ədalət məhkəməsi qarşısında cavab verməsi önəmlidir. Amma təəssüflər olsun ki, beynəlxalq ictimai rəyi də çaşdırmaqla məşğuldurlar və çalışırlar ki, həm Qarabağdan gedən ermənilərin qaytarılmasını həyata keçirsinlər, həm də burada saxlanılan şəxslərin azadlığa çıxmasına cəhd etsinlər, eyni zamanda Qarabağ müharibəsində qəhrəmanlıq göstərən şəxslərə qarşı sanksiyaların tətbiq olunması və ölkəmiz haqda mənfi rəyin formalaşdırılması onların niyyətidir. Bu tamamilə yolverilməzdir və ABŞ-la Azərbaycan arasında münasibətlərə kölgə salmaq məqsədi daşıyır. Bu həm də ölkəmiz haqqında çox böyük mənfi rəy yaratmaq istəyidir. Nəzərə almaq lazımdır ki, ABŞ-la Azərbaycan arasında olan münasibətlər COP29 tədbiri ilə daha da genişlənir və inkişaf edəcək. Bu da onları narahat edir və onlar çox tədirgindirlər ki, Bakı ilə Vaşinqton arasında münasibətlər keyfiyyətcə yeni müstəviyə qalxa bilər. Azərbaycan qlobal miqyasda ekoloji tarazlığın qorunması tərəfdarıdır və çox çalışır ki, ekologiya da daxil olmaqla siyasi-iqtisadi, enerji, nəqliyyat məsələləri öz həllini tapsın" - deyə İ.Hüseynov qeyd etdi.
İradə SARIYEVA
