Tofiq Abbasov: "Biz Ermənistana təhdid yox, təkliflər vəd etdik"
Bu gün Azərbaycanın xarici siyasətində xüsusi önəm daşıyan istiqamətlərdən biri Şanxay Əməkdaşlıq Təşkilatı (ŞƏT) ilə münasibətlərdi. Dünyanın kifayət qədər nüfuzlu təşkilatı olan, ərazi və əhali baxımından ən böyük bir neçə ölkəni özündə birləşdirən ŞƏT-lə ölkəmizin əlaqələri davamlı olaraq inkişaf edir.
Bu təşkilatla Azərbaycan arasında əməkdaşlıq sahələrini nəzərdə tutan memorandum imzalanıb və ölkəmiz ŞƏT-də dialoq tərəfdaşı statusuna malikdir. Yeri gəlmişkən, burada təmsil olunan və bir araya gələn, demək olar ki, bütün dövlətlərlə ölkəmizin normal əlaqələri var. Təbii ki, bu da təşkilatla münasibətlərimizin genişlənməsinə münbit şərait yaradır. Eyni zamanda qarşılıqlı etimad, qonşuluq münasibətlərinin gücləndirilməsi, siyasi, ticarət, iqtisadiyyat və digər sahələrdə səmərəli əməkdaşlıq, regionda sülh, təhlükəsizlik və sabitliyin əldə edilməsi, yeni siyasi və iqtisadi beynəlxalq düzənin yaradılması kimi ŞƏT-in məqsədləri Azərbaycan üçün də xüsusi önəm kəsb edir və ölkəmizin maraqlarına tam cavab verir. Bildiyimiz kimi, Azərbaycanın bütün sahələri əhatə edən davamlı inkişafı, regional güc mərkəzinə çevrilməsi, əlverişli təbii-coğrafi mövqeyi və təşəbbüskarı olduğu nəhəng layihələrin əhəmiyyəti ölkəmizin bu təşkilatla əlaqələrinə ciddi təsir edir. Odur ki, Azərbaycanla əməkdaşlıqda ŞƏT daha çox maraqlıdır.
Azərbaycanın Şanxayda möhkəmlənməsi Qafqazda, Ermənistanla sülh perspektivində hansı təsirlərə malik ola biləcək?
Siyasi şərhçi Tofiq Abbasov "Bakı-Xəbər"ə açıqlamasında bildirdi ki, Azərbaycan bütün istiqamətlərin hamısında öz diplomatik potensialından məharətlə istifadə edir, güclənir: "Şanxay Əməkdaşlıq Təşkilatı, BRİCS elə təşkilatlardı ki, gələcəkdə onların qüdrəti, bacarığı, təsir imkanları artacaq. Məsələ burasındadır ki, Ermənistanın KTMT - də, Avrasiya İqtisadi Birliyində mövqeləri olduğu halda, Azərbaycan bu təşkilatlarda olmaya - olmaya artıq o meydanlarda çox böyük nüfuz sahibinə çevrilib. Avrasiya İqtisadi İttifaqı ilə Azərbaycanın çox böyük əlaqələri formalaşır. Həm ayrı - ayrılıqda ölkələrlə, həm də blokun özü ilə mal dövriyyəmiz artır. Artıq 5 milyardı ötüb keçib. Şanxay Əməkdaşlıq Təşkilatına gəldikdə isə, bu ittifaqın da nümayəndələri Azərbaycana böyük rəğbətlə yanaşırlar. Azərbaycanın həm iqtisadi istehsal potensialını qiymətləndirirlər, həm də əlverişli zəmində yeni sazişlər, bağlantılar əldə etmək niyyətindədirlər. Sirr deyil ki, onlar həm də Azərbaycanın coğrafi məkanını nəzərdən keçiriblər, bilirlər ki, bizdən daha çox asılıdırlar. Çünki Azərbaycan nəqliyyat infrastrukturu yaratmaqla kommunikasiya habına çevrilib. Ona görə də onlar anlayırlar ki, Uzaq Şərqdən, Çindən, Pakistandan malların daşınması məhz Azərbaycandan paylaşdırılacaq. Azərbaycanın bu istiqamətdə çoxşaxəli imkanları var. Həm Cənuba, Şimala, həm Şərqə, həm də Qərbə olan imkanları misal göstərmək olar. Bu da bizim hazırladığımız inteqrasiya modellərindən irəli gələn bir üstünlükdü. Ona görə də, bəllidir ki, Qafqaz bölgəsində Azərbaycan çox güclü potensial əldə edib və bütün ölkələr də bunu bilir. Bu ölkələr Azərbaycana can atırlar, çalışırlar ki, bizimlə daha yaxın olsunlar və sıx iqtisadi - ticari əlaqələr bağlasınlar. Azərbaycan heç kimə təhdid törətmədən Ermənistana imtiyazlı şərtlər təklif edir. Bunlar Ermənistana indi çatmır, ya da ona imkan verməyən məmləkətlər var. Biz Ermənistana təhdid yox, təkliflər vəd etdik. Bu da bizim zəifliyimizdən yox, güclü olmağımızdan, sağlam siyasət yürütməyimizdən irəli gəlir".
Məhəmmədəli QƏRİBLİ
