İlyas Hüseynov: "…ABŞ-da gedən proseslər sanki Rusiya üçün bir sıra fürsətlər formalaşdırır və Ankaraının vasitəçiliyinə Rusiya sanki ehtiyac görmür"
Kremlin sözçüsü Dmitri Peskov Putin və Ərdoğan arasında Astanada keçirilən görüşdə Ukrayna məsələsinin müzakirə edildiyini, lakin Türkiyə liderinin danışıqlarda vasitəçi ola bilməyəcəyini bildirib.
Rusiyanın 1-ci kanalına açıqlamasında Ərdoğanın Ukrayna danışıqlarında vasitəçi olmasının mümkün olub-olmadığı sualını cavablandıran Peskov "Xeyr, bu mümkün deyil" deyib.
Ancaq Peskov bunun səbəbi ilə bağlı heç nə deməyib.
Qeyd edək ki, Putinlə görüşən Ərdoğan Ukraynada hər iki tərəfi qane edəcək sülhün mümkün olduğunu deyib və Türkiyənin bu istiqamətdə hər cür dəstəyə hazır olduğunu bildirib.
Peskov niyə belə deyib? Türkiyə niyə vasitəçi ola bilməz? Rusiya Türkiyənin Ukrayna məsələsində vasitəçiliyindən imtina edir?
"Bunun da bir sıra səbəblərini görmək mümkündür, çünki Rusiya sanki bütün suallara döyüş meydanında cavab vermək niyyətindədir"
Politoloq İlyas Hüseynov "Bakı-Xəbər"ə şərhində bildirdi ki, Rusiya ilə Ukrayna arasında gedən müharibənin sonlandırılması və eləcə də danışıqların baş verməsi üçün ən böyük geopolitik faktor Türkiyədir. "Bununla yanaşı qeyd etmək lazımdır ki, Türkiyənin vasitəçiliyi ilə önəmli razılıqlar əldə olunmuşdu, İstanbulda Rusiya və Ukrayana nümayəndə heyətləri arasında görüş keçirildi. Bundan öncə Antalya Diplomatik Forumunda Rusiya və Ukrayna xarici işlər nazirlərinin görüşü baş tutdu, taxıl dəhlizi istifadəyə verildi, əsir və saxlanılan şəxslərin mübadiləsi oldu. Bütün bunlar Türkiyənin səyləri və təşəbbüsləri nəticəsində mümkün olmuşdu. Hətta böyük ehtimalla, İstanbul-2 prosesi haqqında fikirlər səsləndirilirdi, bildirilirdi ki, belə bir görüş baş tuta bilər. Lakin İsveçrədə keçirilən Ukraynaya dəstək konfransı, Rusiya Federasiyasının prezidenti Vladimir Putinin müharibə ilə bağlı öz tələbləri və şərtləri yeni mənzərəni formalaşdırdı. Artıq görürük ki, Rusiya sanki Türkiyənin vasitəçiliyindən imtina edir. Bunun da bir sıra səbəblərini görmək mümkündür, çünki Rusiya sanki bütün suallara döyüş meydanında cavab vermək niyyətindədir"-deyə bildirən İ. Hüseynov qeyd etdi ki, eyni zamanda Amerika Birləşmiş Ştatlarında (ABŞ) keçirilən seçkilər də Kremlin maraq dairəsindədir. "Demokratların hakimiyyətdən getməsi, Baydenin hakimiyyətinə son qoyulması və Trampın gəlişi Rusiya üçün bir fürsət kimi qiymətləndirilə bilər. Çünki Trampın müharibə ilə bağlı öz baxışları var. Bununla yanaşı olaraq Avropa İttifaqı və ABŞ-da gedən proseslər sanki Rusiya üçün bir sıra fürsətlər formalaşdırır və Ankaraının vasitəçiliyinə Rusiya sanki ehtiyac görmür. İstənilən halda burada müharibəni başa çatdırmaq lazımdır. Rusiya çox istəyir ki, öz şərtləri daxilində bir təslimçi sülh müqaviləsi imzalansın. Şübhəsiz ki, Ukrayna buna qarşı çıxır, müxtəlif dövlətlər Ukraynanın silahlandırılmasına diqqət ayırır, lakin ümumi nəticəyə, konsensusa gəlmək mümkünsüz görünür"-deyə İ.Hüseynov qeyd etdi.
İradə SARIYEVA
