Atəş Məmmədov prezident İlham Əliyevdən nə xahiş edir?
"Mən Gəncədən gedən nümayəndə heyətinin başçısı kimi, Heydər Əliyev cənablarından sonra çıxış etdim və ulu öndərin çıxışından ruhlanaraq faciəni törədənləri kəskin tənqid etdim"
Fizika-riyaziyyat elmləri namizədi, I Qarabağ Müharibəsi veteranı, ehtiyatda olan zabit, hazırda övladları ilə birgə Bakıda kirayədə yaşayan Gəncə şəhər sakini Məmmədov Atəş Mehdi oğlu qəzetimiz vasitəsilə Prezident İlham Əliyevə müraciət edib.
A.Məmmədov Prezidentə ünvanladığı müraciətdə bildirir: "Sizi bir ədalət feniomeni, müdrik, uzaq görən dövlət başçısı bilib Sizə müraciət edir, Sizdən mərhəmət və kömək diləyirəm!
Buna görə də, 1990-cı ildən 1994-cü ilin atəşkəs dövrünə qədərki müddətdə həyat fəaliyyətim haqda Sizə məlumat vermək istəyirəm.
Mənfur ermənilərin azərbaycanlılara qarşı apardıqları və doğma torpaqlarımızı işğal edərək etnik təmizləmə, soyqırım siyasətinə başladıqları vaxtdan onlarla mübarizəyə başlamışam.
1990-cı il qanlı Yanvar faciəsinə reaksiya olaraq Gəncə şəhərindən 53 nəfər vətənpərvəri toplayaraq yanvarın 20-də təyyarə ilə Moskvaya, Azərbaycanın Daimi Nümayəndəliyinə gətirdim. Yanvarın 21-də Daimi Nümayəndəliyin akt zalında mətbuat konfransı təşkil etdim. Həmin mətbuat konfransında ulu öndər Heydər Əliyev cənabları iştirak etdi və dünya ictimaiyyətinə 20 yanvar faciəsi barədə məlumat verdi. Faciəni törədənləri lənətləyib, Qorboçovu kəskin tənqid etdi və "kötəklədi". Mən Gəncədən gedən nümayəndə heyətinin başçısı kimi, Heydər Əliyev cənablarından sonra çıxış etdim və ulu öndərin çıxışından ruhlanaraq faciəni törədənləri kəskin tənqid etdim. Həmin dövrdə Moskvada qırmızı imperiya əleyhinə küçə yürüşləri, aksiyalar və piketlər təşkil etmişəm.
1992-ci ilin avqust ayının 12-dən Gəncə şəhər Kəpəz rayon hərbi komissarlığından 4 oğlumla bərabər 861 saylı batalyonda hərbi qulluçu olmuşam. 1992-ci ildən 1994-cü ilə, atəşkəs dövrünə qədər hərbi hissəni döyüş sursatı, ərzaq, yanacaq və tikinti materialları ilə təchiz etmişəm. Gəncə şəhərindəki evimi satıb hərbi hissəyə UAZ69 (Villis) markalı maşın alıb bağışladım".
1994-cü ilin oktyabr ayının 3-4-ü arasında dövlət çevrilişinə cəhd edənlərin əleyhinə kəskin çıxışlar etdim "Respublika Prezidenti Heydər Əliyevdən sonra çıxış edərək dövlət çevrilişinə cəhd edənlərin bəd əməllərini və mənfur simalarını tənqid etmişəm.
Hörmətli, Cənab Prezident!
Sizin alicənablığınıza və humanistliyinizə, qayğıkeşliyinizə, mərdliyinizə, mərhəmətinizə əmin olub Sizdən kömək diləyirəm. Mən və dörd oğlum ailəsi ilə birlikdə evsiz-eşiksiz qalmışıq. 1994-cü ildən bu yana kirayələrdə yaşayırıq. Hazırda Bakı şəhərində də kirayədə qalırıq. Aldığım pensiya və veteranlıq təqaüdünü ev kirayəsinə verirəm. Çox ağır, çətin, sosial durumla qarşılaşmışıq, yaşayışımız çox acınacaqlıdır.
Sizdən mənim Azərbaycan dövlətçiliyi uğrunda fəaliyyətimi, ixtiyarlığımı və köməksizliyimi, 29 nəfərlik ailə üzvümlə çıxılmaz vəziyyətdə qaldığımı nəzərə alıb mənə bir mənzil bağışlamağınızı xahiş edirəm. Bu xahişimi yerinə yetirmək Sizin və dövlətimizin imkanı daxilindədir!
Cənab Ali Baş Komandan!
Mən günü keçmiş ixtiyar bir qocayam...
Hesab edin ki, mən və övladlarım başqa bir qalaktikadan Sizə sığınmışıq, Sizə pənah gətirmişik!
Sizin insanpərvərliyinizə, humanistliyinizə ümid edərək Siz alicənablarından kömək diləyirəm!
Müsibətlərə və təqiblərə məruz qalmış bir insana olan köməyiniz Ulu Tanrı tərəfindən yüksək mükafata layiq görüləcək!"
Fəaliyyəti barədə digər məqamlara da toxunan A.Məmmədov yazır ki, fizika-riyaziyyat elmləri namizədi kimi əvvəlcə Gəncə İnşaat Texnikumunda dərs deyib, 1997-ci ilə qədər isə Azərbaycan Politexnik İnstitutunun (Texniki Universitet) Gəncə şəhərində filialında müəllim işləyib.
5 il əvvəl Bakıya köçdüyünü yazan Fizika-riyaziyyat elmləri namizədi, I Qarabağ Müharibəsi veteranı, ehtiyatda olan zabit Məmmədov Atəş Mehdi oğlu ümid edir ki, Prezidentə ünvanladığı müraciətinə müsbət reaksiya veriləcək və o, dövlət tərəfindən mənzillə təmin olunacaq, ixtiyar yaşında mənəvi rahatlıq tapacaq.
Redaksiyadan:Atəş müəllim məkyubuna həmin çıxışı əks olunan videokadrları da əlavə edib.
Həqiqətən həmin snlarda mərhum Heydər Əliyevin yanında olmaq və çıxış etmək tarixi anlardı.
İradə SARIYEVA
