Tural İrfan: "QMİ bu məsələdə öndə olmalıdır, ancaq biz bunu görmürük"
Beynəlxalq Xristian Həmrəyliyi (CSI) hüquq müdafiə təşkilatı Beynəlxalq Olimpiya Komitəsinin prezidentini neytral oyunçu statusunda olan Azərbaycan idmançılarını 2024-cü ildə Parisdə keçiriləcək Olimpiya Oyunlarından kənarlaşdırmağa çağırıb.
CSI-nin sözçüsü Coel Veldkamp bildirib ki, Azərbaycanın Olimpiya Oyunlarından kənarda qalması dünyaya düzgün mesaj verəcək: "Beynəlxalq idman dünyası insan hüquqlarının kobud şəkildə pozulmasına dözməyəcək və ya buna məhəl qoyacaq".
Veldkamp qeyd edib ki, Rusiyanın Ukraynaya təcavüzündən sonra BOK Rusiya və Belarus milli komandalarını 2024-cü il Olimpiya Oyunlarından kənarlaşdırmaq üçün qeyri-adi addım atıb: "Bununla belə, Azərbaycan hələ də "Dağlıq Qarabağın" min illik erməni icmasını "qovulmasının" heç bir nəticəsi ilə üzləşməyib".
Veldkamp vurğulayıb ki, Azərbaycan guya "Dağlıq Qarabağda" etnik təmizləmə aparıb və buna lazımi qiymət verilməyib.
Çox maraqlıdır, xristanlıqla bağlı olan təşkilatın idman və siyasi proseslərə nə aidiyyəti var? Belə bir məzmunda müraciəti hansısa müsəlman təşkilatı istənilən Qərb ölkəsi ilə bağlı etsəydi, buna çox ciddi reaksiya verilərdi və həmin təşkilatı islam fundamentalizmində qınayardılar. Buna dünyanın İslam təşkilatlarının, xüsusilə də nüfuzlu İslam Əməkdaşlıq Təşkilatının reaksiyası lazımdırmı? Qafqaz Müsəlmanları İdarəsi əks çağırış edə bilərmi ki, bu təşkilat din adından səlahiyyətini aşan işlərlə məşğul olmaqla, dünyada dini ədavət yaradır?
İlahiyyatçı Tural İrfan "Bakı-Xəbər"ə açıqlamasında bildirdi ki, Qərb və ABŞ-da səlibçi təfəkküründə olan bir çox təşkilatlar var: "Onların bəziləri xristian adı ilə meydana çıxsalar da, elələri var ki, dünyəvi təşkilat örtüyü altında fəaliyyət göstərir. Yəni əsl mahiyyətlərini gizlətmiş olurlar. Bu proses çoxdan gedir. Əsasən də İslam və Türk dünyasına qarşı ciddi həmlələr olunur. Hətta bu yaxınlarda İsveçrədə olan bir keşiş özünü Konstantinopolun lideri adlandırdı. Bu da geniş etiraza səbəb oldu. Belə hallar mövcuddur. Təbiidir ki, belə mövqe dinlərarası ədavətə gətirib çıxaran məsələdir. Avropada islamafobiya ciddi yayılıb. Artıq səlibçilər dövlət qurumıarında da ciddi mövqeyə sahiblənirlər. Bu da dinlərarası tolerantlığın pozulmasına gətirib çıxarır. Belə mövzulara dünyadakı və bizim ölkəmizdəki İslam qurumları lazımi reaksiyaları verməlidir. QMİ və Dini Komitə də mütləq mənada bənzər hallara reaksiya verməlidir. Adı qeyd edilən təşkilatın yanaşması olduqca qərəzlidir. Erməniləri Qarabağdan biz qovmamışıq, onlar könüllü oranı tərk ediblər. Nə yaxşı 30 illik işğal dönəmində bu təşkilatların səsi çıxmadı? Hətta ermənilərin kilsələrin mahiyyətini dəyişmələrinə belə susqun mövqe nümayiş etdirildi. İndi isə bəzi iddialar ortaya atırlar. Təbiidir ki, bunların hamısı yanlışdır. Biz tolerantlıq vəziyyətində yaşayırıq. Fransada Notrdam kilsəsi yananda biz ora dəstək verdik. QMİ bu məsələdə öndə olmalıdır, ancaq biz bunu görmürük. Ölkədə kifayət qədər savadlı ilahiyyatçı var ki, İslam Universitetindən diplomlarını ala bilmirlər. Bu da onların fəallığını aşağı salır, gələcək karyeralarlnı baryer yaratmış olur. Bu cür məsələlər həllini tapmalıdır ki, dini müstəvidə bizə yönələn təxribatlata zamanında cavab verənlər də çoxluq təşkil etsin".
Məhəmmədəli QƏRİBLİ
