Yadigar Məmmədli: "Ermənistan 4 ilə yaxındır Zəngəzur dəhlizi ilə bağlı öhdəliklərdən yayınır"
Ermənistanın keçmiş xarici işlər naziri Vardan Oskanyan etiraf edib ki, Azərbaycan həmişə tarazlığı qoruyub saxlaya bilib və üstün mövqedədir. O, erməni mediasına açıqlamasında qeyd edib ki, Avropaya istiqamətlənmə blefdir:
"Xalqımız yenə aldadılır. Aİ-də bizi heç kim gözləmir, bəlkə 20-30 ildən sonra bu baş verəcək, amma hazırda bu haqda danışanlar sadəcə olaraq yanılırlar. Rusiya Ermənistanı Azərbaycanla əvəz edə, bizi bütövlükdə unuda və strateji problemlərini Bakı vasitəsilə həll edə bilər. Biz artıq Şimal-Cənub yolunu itirmişik. Bu yaxınlarda üç fərqli proqrama baxdım, Ermənistan heç bir xəritədə yoxdur. Bu yol Hindistandan, Bəndər Abbasdan Rusiyaya, Azərbaycandan keçərək Avropaya gedir və bizimkilər indi də bir növ "Dünyanın kəsişməsindən" danışırlar. Biz artıq bu yolu itirmişik, Şərq-Qərb yolu bizim üçün hələ mövcud deyil, Azərbaycan həmişə tarazlığı saxlaya bilib, indi Rusiya ilə münasibətlərini daha da dərinləşdirə və bizi əvəz edə bilər. Gürcüstan daha çox bir-birini tamamlayan siyasət aparır. Onlar Rusiya ilə münasibətlərini normal vəziyyətə salacaq, biz isə tam təcrid vəziyyətində olacağıq".
"Zaman isə onların əleyhinə işləyir və nəticədə yenə itirən tərəf olacaqlar"
Sözügedən məsələni "Bakı-Xəbər"ə şərh edən media eksperti Yadigar Məmmədli hesab edir ki, Oskanyanın fikirlərində reallıqlara söykənən məqamlar var: "Oskanyan əvvəlki hakimiyyətin, daha dəqiq desək, revanşist qüvvələrin təmsilçisi olsa da, onun son açıqlaması ciddi etirafdır. O, Rusiyayönümlü siyasi fiqur olsa da, son açıqlamasında reallıqlara söykənərək Ermənistandakı mövcud durumu təhlil edir. Bununla Ermənistanın hansı acınacaqlı vəziyyətdə olduğunu konkret arqumentlərlə əsaslandırır. Ermənistan tərəfi elə hesab edirdi ki, guya onlar olduqca əlverişli coğrafi mövqedə yerləşirlər və bu səbəbdən böyük güc mərkəzləri bu amili nəzərə alacaqlar. Ancaq onlar Birinci Qarabağ müharibəsindən sonrakı dövrdə gedən prosesləri doğru təhlil etmədilər. Məsələ ondadır ki, işğal faktoruna görə Ermənistan o zaman bütün regional meqa layihələrdən kənarda qaldı və bundan milyonlarla vəsait itirdi. Əvəzində Gürcüstan bu imkanlardan maksimum faydalandı. Halbuki, istər neft-qaz kəmərləri, istərsə də dəmir yolları Ermənistan üzərindən keçsəydi məsafə baxımından daha yaxın olardı. Bütün bunlara baxmayaraq, işğal dövründə Azərbaycan müasir infrastruktur formalaşdırdı. Ölkəmiz Şimal-Cənub, Şərq-Qərb dəhlizlərinin kəsişməsində və olduqca əvəzsiz bir coğrafi mövqedə yerləşir. Bütün bunlara baxmayaraq, Ermənistan 4 ilə yaxındır Zəngəzur dəhlizi ilə bağlı öhdəliklərdən yayınır. Zaman isə onların əleyhinə işləyir və nəticədə yenə itirən tərəf olacaqlar. Niyə? Ona görə ki, Ağbənddən İran vasitəsilə alternativ yolun salınması prosesi gedir. Bu isə həm Naxçıvanla quru əlaqəsinin qısaldılması deməkdir, həm də Çindən gələn yüklərin bu yol vasitəsilə daşınması mümkün olacaq. Üstəlik, Rəşt-Astara dəmir yolu hazır olandan sonra, heç şübhəsiz, Hindistandan Rusiyaya və əks istiqamətdə bütün yüklər Azərbaycan üzərindən daşınacaq. Oskanyan təcrübəli diplomat olaraq bütün bunların fərqində olduğu üçün Paşinyanın "dünyanın kəsişməsi" layihəsinə reallıqlardan çıxış edərək yanaşır. Bu isə o deməkdir ki, Ermənistan uduzan tərəfdə yer alıb".
Vidadi ORDAHALLI
