Əli Orucov: "Moskva çalışacaq ki, ölkə daxilində hansısa ixtişaş, diversiya, sabotaj və buna bənzər hallar törətsin"
"Qarşıdakı illərdə biz Ermənistanla strateji tərəfdaşlığa çevriləcək strateji dialoqu təzələyəcəyik. Bu, Ermənistanın suverenliyini gücləndirəcək". Bunu ABŞ-ın Ermənistandakı səfiri Kristina Kvin Ermənistan Demokratiya Forumu zamanı deyib.
Kvin bildirib ki, Ermənistanın demokratik gələcəyə sadiqliyi bütün dünya üçün nümunədir: "Birləşmiş Ştatlar Ermənistana bu səylərdə, enerji, ticarət və s. sahələrdə kömək etməkdən qürur duyur. Mən demokratiyanın möhkəmləndirilməsi və insan hüquqlarının müdafiəsinin təmin edilməsi istiqamətində görülən işlərlə həqiqətən fəxr edirəm".
O, ABŞ dövlət katibi Entoni Blinkendən sitat gətirərək qeyd edib ki, demokratiya insan potensialının reallaşdırılması üçün yeganə effektiv vasitədir.
Səfirin ABŞ-ın Ermənistanla strateji dialoqun bərpası ilə bağlı verdiyi bu birmənalı bəyanat Rusiyada necə reaksiya doğuracaq? Moskva buna necə yanaşacaq və bu dialoqun qarşısını almaq üçün Rusiya nələri planlaşdıra və edə bilər?
"Rusiya Ermənistana qarşı iqtisadi rıçaqları işə salmağa ona görə tələsmir ki, revanşistlər pis vəziyyətdə qalacaqlar"
Sözügedən məsələyə aydınlıq gətirən AMİP funksioneri Əli Orucov "Bakı-Xəbər"ə açıqlamasında bildirdi ki, Rusiya bunu cavabsız qoymayacaq: "Çünki Ermənistan iki stulda oturaraq ABŞ-la yaxın strateji tərəfdaşlıq qurur. Düzdür, kimsə deyə bilər ki, Ermənistan müstəqil dövlətdir və bu, onun seçimidir. Ancaq nəzərə almaq lazımdır ki, həmin Ermənistan Rusiya ilə strateji müttəfiqlik sazişinə malikdir və bu, müvafiq müqavilələrlə tənzimlənir. Ermənistan KTMT adlı hərbi, Avrasiya İqtisadi İttifaqı adlı iqtisadi yönümlü təşkilatda təmsil olunur. Heç kəsə sirr deyil ki, bu təşkilatların patronu Rusiyadır və məqsədi bir neçə postsovet dövlətini öz orbitində saxlamaqdır. Ancaq Ermənistan bu qurumlarda ola-ola ABŞ-la strateji dialoqu qurur. Avropa İttifaqına üzv olmağı nəzərdən keçirir. Bütün bunlar Ermənistanın Rusiyanın müəyyən etdiyi "qırmızı xətti" keçmək istəyindən xəbər verir. Rusiya bir sıra səbəblərdən, o cümlədən Ukrayna müharibəsinə görə Ermənistanda sərt tədbirlər görə bilmir. Ancaq bu o demək deyil ki, Moskva sona qədər dözəcək. Bu günlərdə Rusiya baş nazirinin müavini Aleksey Overçuk açıq xəbərdar etdi ki, Ermənistan Avropa İttifaqına üzv olmaq qərarı qəbul etsə, Rusiya bazarına rüsumdan azad girişini və Moskva tərəfindən verilən digər imtiyazları itirəcək. Açıq dedi ki, regiondankənar oyunçuların Ermənistana gəlməsinin nəticələri olacaq. Rusiya Ermənistana qarşı iqtisadi rıçaqları işə salmağa ona görə tələsmir ki, revanşistlər pis vəziyyətdə qalacaqlar. Bəlli Rusiyapərəst qüvələr var ki, belə olan halda cəmiyyət içində onlar daha pis duruma düşəcəklər. Paşinyan da deyəcək ki, baxın, Rusiya nə edir. Ona görə də hələ ki, Moskva bu varianta getməyə tələsmir. Ancaq Rusiya çalışacaq ki, Ermənistan daxilində hansısa ixtişaş, diversiya, sabotaj və buna bənzər hallar törətsin. Nə qədər Paşinyan hakimiyyəti Qərbdən dəstək alsa da, bu təxribatlardan tam sığortalana bilməyəcək".
Vidadi ORDAHALLI
