Ermənistanın baş naziri Nikol Paşinyan keçirdiyi mətbuat konfransında deyib ki, Qərb tərəfdaşları ilə təhlükəsizlik məsələlərini müzakirə etməyə başlayıblar: “Əvvəllər biz regionun etibarlı olması lazım olan təhlükəsizlik arxitekturasına malik olduğuna inanaraq, Qərblə belə məsələləri ümumiyyətlə müzakirə etmirdik.
Mövcud təhlükəsizlik sisteminin müqavilələrdə nəzərdə tutulduğu kimi işləmədiyini görəndə biz təkcə Qərb tərəfdaşları ilə deyil, Qərblə də təhlükəsizlik məsələləri üzrə müzakirələrə başladıq”.
Bununla Paşinyan Qafqazda Rusiyanın deyil, Qərbin yarada biləcəyi təhlükəsizlik sistemlərinə önəm verdiklərini açıq etiraf etmiş olurmu?
Politoloq Yeganə Hacıyeva “Bakı-Xəbər”ə açıqlamasında bildirdi ki, Nikol Paşinyan Ermənistanın xarici siyasətinin təhlükəsizlik aspektləri ilə bağlı kənar güclərə etibar etdiyini açıq bəyan edir: “Bununla həm də Ermənistanın zəifliyini etiraf etmiş olur. Onlar hesab edirdilər ki, 90-cı illərdə olduğu kimi, rus əsgərləri torpaqları alıb onlara peşkəş edəcək. Rusiya Ermənistanla münasibətlərini tamam korlamaqla regionda öz mövqelərini zəiflətmək istəmir. Artıq zaman başqadır. Son müharibədə də Ermənistana açıq deyil, dolayı yollarla kömək etdi. Həmin vaxt “İsgəndər” raketləri Rusiyanın 102-ci bazasından atılırdı. Nikol Paşinyan məcburiyyətdən səmimi olub. Rusiyanı əvəz edə biləcək yeni tərəfdaşları o Qərbdə görür. Ermənistan bununla yanaşı həm də İranla yaxınlıq edir. Onların törətdiyi son iki hərbi təxribatın ikisi də İran dronlarının müşayiəti ilə olmuşdu. Bu gedişi ilə Paşinyan Qərbdən özlərinə daha çox dəstək almağı hədəfləyir. İstənilən halda Paşinyanın açıqlamalarını riyakarlıq nümunəsi kimi qəbul etməliyik. Çünki onlar Rusiya ilə də bağlarını tam kəsməyib. Paşinyan hakimiyyəti manevr edir. Son dönəmdə Ermənistan açıq şəkildə müttəfiqlərini dəyişməyə çalışır. Paşinyan bir tərəfdən Qarabağdakı vəziyyətin nizamlanmasının Rusiya variantını qəbul etmək istədiyini bəyan edir, digər tərəfdən isə KTMT-də fəal iştirak etməməkdən danışır. Bunlar son dönəmdə açıq şəkildə müttəfiqlərini dəyişməyə çalışan Paşinyan hakimiyyətinin manevrləridir. Rusiyanın əvəzinə Qərbə bu anonsların eyni vaxtda verilməsi Ermənistan hakimiyyətinin oynamasından xəbər verir”.
Ermənistan Rusiyadan tam asılı olan bir ölkədir. Qazı Rusiyadan kifayət qədər ucuz qiymətə alır. İran və Türkiyə ilə sərhədlərini Rusiya sərhədçiləri qoruyur. Rusiyanın Ermənistanda hərbi bazası var. Rusiyanın aparıcı şirkətləri Ermənistan iqtisadiyyatına nəzarət edir. Enerji, dəmir yolu, dağ-mədən sənayesi və digər önəmli sektorları Rusiyanın əlindədir.
Ermənistan Rusiyadan hərbi baxımdan da asılıdır. Bunlardan əlavə, Ermənistana kənardan ən çox pul Rusiyadan gəlir. Bu pullar Ermənistanın dövlət büdcəsinin böyük hissəsini təşkil edir. Rusiyanın hava məkanını müdafiə sistemləri həm də Ermənistanın hava məkanını qoruyur. Yəni Ermənistanın Rusiyadan asılılığını göstərmək üçün belə faktları sadalamaqla bitmir.
Hələ Ermənistanın KTMT, Avrasiya Birliyi və Gömrük Birliyinin üzvü olduğunu, eləcə də Rusiya ilə imzalanmış digər ikitərəfli müqavilələrdən danışmırıq.
Təsəvvür edin ki, belə bir durumda olan ölkə müstəqil və Qərbyönlü siyasət aparmaq istəyir.
Ermənilər Qərbdəki havadarlarının xoşuna gəlmək üçün bu cür açıqlamalar verirlər.
Məhəmmədəli QƏRİBLİ
