Ermənistan iqtidarı Avropa İttifaqı Şurasının sədri Şarl Mişelin məlum bəyanatından sonra hələ də Qarabağı Azərbaycanın tərkib hissəsi hesab etdiyini dilə gətirməyib, amma rəsmi İrəvan bu bəyanatı təkzib də etməyib.
Avropa İttifaqı Şurasının sədri ötən bazar Brüsseldə keçirilən danışıqlardan sonra bəyan etmişdi ki, Ermənistan və Azərbaycan bir-birinin ərazi bütövlüyünün tanınmasına sadiqliklərini təsdiq ediblər. Budəfəki bəyanatında Mişel ərazi barədə açıq və konkret danışıb.
Bəyanatda Ermənistan ərazisinin 29 min 800 kvadrat kilometr, Azərbaycan ərazisinin isə 86 min 600 kvadrat kilometr olduğu xüsusi vurğulanıb. 86 min 600 kvadrat kilometr Azərbaycanın ərazisidir və bura Qarabağ da daxildir. “Azatutyun”un Azərbaycanın ərazi bütövlüyünün tanınması barədə sualına cavab olaraq Ermənistan xarici işlər nazirinin müavini Mnatsakan Safaryan deyib: “Bildiyiniz kimi, ərazi bütövlüyü həmişə tanınıb. Burada çətin ki, nəsə bir yenilik tapılsın. Razılaşma barədə yenicə bəyanat verilib. Detalları barədə məlumat verə bilmərik”. Mnatsakan Safaryanın sözlərinə görə, Azərbaycan və Ermənistan xarici işlər nazirlərinin Moskva görüşündə sülh müqaviləsinin layihəsi müzakirə olunacaq. Baş veənlərlə bağlı “armenianreport” portalı yazır ki, “xarici işlər nazirimizin “bacarıqlı” müavini Mnatsakan Safaryan Ermənistanın Azərbaycanın 86,6 min kvadrat kilometr ərazi bütövlüyünü, Qarabağın Azərbaycanın tərkibində olmasını tanıyıb-tanınmaması sualına birbaşa cavabdan yayındı: “Məni bu suala cavab verməyə məcbur etməyin”, - deyə Safaryan jurnalistlərin şərh almaq cəhdlərinə cavab verib. Necə başa düşə bilərərik? Axı heç kim Safaryandan şəxsi nə isə soruşmayıb. Amma Safaryan özünü elə apardı ki, guya jurnalistlər ondan bu məmurun şəxsiyyəti ilə bağlı nəsə istəyiblər. Safaryanın davranışı “internetdən əvvəl” deyilən dövrdə absurd olardı. Axı istənilən şəxs internetə daxil olaraq Aİ Şurasının sədri Şarl Mişelin bazar günü Brüsseldə onun iştirakı ilə, həmçinin Ermənistanın baş naziri Nikol Paşinyanın və Azərbaycan prezidenti İlham Əliyevin iştirakı ilə keçirilən üçtərəfli görüşün yekunlarına dair bəyanatının mətnini oxuya bilər. Orada hər şey var. Safaryanı danışmağa məcbur edən hər şey. Mişelin yalnız Qarabağ ermənilərinin hüquq və təhlükəsizliyindən, rəsmi Bakının onlarla dialoqun vacibliyindən danışmasından başlayaq. Onlara humanitar fəlakət barədə heç nə deyilməyib. Mişel Qarabağ ermənilərinin statusu ilə bağlı heç nə deməyib. Bizim “bacarıqlı” xarici işlər nazirinin müavini bunu inkar edə bilməz. Eyni zamanda, hər kəs görə bilər ki, Şarl Mişelin bəyanatında Qarabağı Azərbaycanın ayrılmaz hissəsi kimi tanıyan “Almatı bəyannaməsi”nə istinad var.
İndi Ermənistanda insanlar ölkənin düşdüyü rüsvayçılığın, fəlakətin, gələcək bəlaların miqyasını görür, anlayır! Hakimiyyət orqanlarının cib mediasından və bloqqerlərdən istifadə edərək diqqəti əsas məsələdən, uğursuzluqlarından yayındırmaq cəhdləri, günahı Mişelin, Fransanın, ABŞ-ın, Rusiyanın ünvanına yazmaq cəhdi - bütün bunlar heç bir nəticə vermir. Əksinə, bezdiricidir. Çünki məğlubiyyətlərimizin konkret adı var. Bu, Nikol Paşinyan və onun bütün komandasıdır. Məhz onlar xalqa siyasi, hərbi, iqtisadi baxımdan daha güclü yeni Ermənistan vəd etdilər. Məhz onlar xalqı inandırdılar ki, Azərbaycana heç bir güzəşt olmayacaq. Məhz onlar müharibənin qarşısını ala bilmədilər, məğlub oldular və bunların hamısını rəsmən tanıdılar. Mişel, Makron, Putin, Bayden - Ermənistanın başında milli maraqları qorxulu şəkildə təslim edən biri dayanırsa, onların heç biri heç nə edə bilməz. Safaryanın və ya Xarici İşlər Nazirliyinin digər diplomatlarının aşkar olanı inkar etmək cəhdləri də işə kömək etməyəcək. Hər şey göz qabağındadır - biz uçurumun kənarında belə deyilik. Biz uçuruma addımladıq və ora düşdük”. Ermənistanın keçmiş xarici işlər naziri Vardan Oskanyan da qeyd edir ki, Azərbaycan məqsədinə çatmaq üzrədir: “Aydındır ki, biz Qarabağın təhvil verilməsinin son mərhələsinə qədəm qoyuruq”. O qeyd edib ki, Paşinyanın istənilən coğrafi məkanda hər görüşü Qarabağın təhvil verilməsi prosesini daha da dərinləşdirir və dönməz edir: “Brüssel görüşü zamanı Paşinyan öz tələsinə düşəndə problem daha da mürəkkəbləşdi və dərinləşdi. O, 29800 kvadratkilometrdən o qədər danışdı ki, İlham Əliyev özü də artıq ölkəsinin kvadrat kilometrlərinin tanınmasını tələb etdi. Şarl Mişelin təsvir etdiyi müddəalarla hər hansı bir sənədin imzalanması o deməkdir ki, imzalanan andan Qarabağ Cavaxetiyə çevrilir və Cavaxetidən fərqli olaraq, bir müddət, bəlkə də on ildən sonra Naxçıvana çevriləcək”. Erməni politoloq Beniamin Matevosyan isə bildirir ki, əslində, çoxdandır Qarabağla bağlı deyil, Ermənistanla bağlı danışıqlar gedir, Ermənistanın taleyi danışıqlar masasındadır. Onun sözlərinə görə, Ermənistanın baş naziri Nikol Paşinyan 2022-ci ilin oktyabrında Praqada Qarabağı Azərbaycanın bir hissəsi kimi tanıyıb və Avropa İttifaqı Şurasının prezidenti Şarl Mişel bunu yalnız rəsmi şəkildə elan edib: “Brüsseldə keçirilən görüşlərin nəticələrinə görə, Qarabağ ermənilərinin etnik azlıq adlandırıldığı açıqlandı, sonra bu, texniki səhv və ya Mişelin şəxsi mövqeyi kimi təqdim edildi, lakin sonrakı açıqlamalarda danışıqların nəticələrinə görə hər yerdə etnik azlıq ifadəsi işlədilir, yəni texniki səhv olmayıb”. Erməni politoloq vurğulayıb ki, Azərbaycan Ermənistandan növbəti güzəşt üçün “kozır” alır: “Onlar Laçın yolunun bağlanmasını dərinləşdirməyə çalışacaqlar və başqa əməliyyatlara əl atacaqlar”.
Nahid SALAYEV
