Rusiyada Ermənistanın maraqlarından çıxış edən bəzi dairələr zaman-zaman Azərbaycan əleyhinə təxribat xarakterli fikirlər səsləndirir. Doqquz ay əvvəl Azərbaycan Qarabağ məsələsini həll etsə də, onlar öz təxribatçı əməllərindən hələ də əl çəkmir.
Şanxay Əməkdaşlıq Təşkilatı yanında MDB-nin İnkişafı İnstitutunun şöbə müdiri, hərbi ekspert Vladimir Yevseyev erməni mətbuatına açıqlamasında iddia edib ki, Rusiya Qarabağda Dnestryanıdakı ssenariyə əl ata bilər: “Rusiya sülhməramlıları 5 illik müddət başa çatdıqdan sonra da Dağlıq Qarabağı tərk etməyəcək. Rusiya Abxaziya, Cənubi Osetiya, Tacikistan, Dnestryanıda sülhməramlı əməliyyatlar keçirmək üçün böyük təcrübəyə malikdir. Rusiya sülhməramlıları yerləşdirdikdən sonra heç vaxt belə tez çıxarmayıb. Rusiya Qarabağda Dnestryanıda olan ssenariyə əl ata bilər. Rusiya birmənalı olaraq, yaxın 5 il ərzində kontingenti bölgədən çıxarmayacaq. Bu müddətdə Qarabağ ermənilərinin bir hissəsi Rusiya vətəndaşlığı ala bilər. Situasiya rus pasportlarının olduğu Dnestryanıdakı vəziyyətə bənzər ola bilər. Rusiya vətəndaşlarını qorumaq üçün Dnestryanıdadır”.
Göründüyü kimi, bəzi dairələr çox təhlükəli ssenariləri gündəmə gətirmək istəyir. O baxımdan bütün bunları ekspertlər necə dəyərləndirir?
“İstəyirlər ki, hansısa beynəlxalq təşkilatı da buna alət etsinlər”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu. Onun fikrincə, V.Yevseyevin indiki məqamda bunu qabartması təsadüfi deyil: “Məsələ ondadır ki, Rusiya hazırda 10 noyabr razılaşmasından irəli gələn, sülhməramlı qüvvələrin həyata keçirməli olduğu bəndləri yerinə yetirmir. Daha dəqiq desək, yerinə yetirmək istəmir. Ümumiyyətlə, Moskvanın Qarabağla bağlı çox ciddi, Azərbaycanın təhlükəsizlik maraqlarına zidd olan planları var. Məhz hazırkı situasiyada biz bunu ayrı-ayrı Rusiya ekspertlərinin dilindən eşidirik. Hətta Rusiyanin müəyyən beynəlxalq təşkilatlarda təmsil olunan şəxsləri belə, təhlükəli açıqlamalar verir. İstəyirlər ki, hansısa beynəlxalq təşkilatı da buna alət etsinlər. Ancaq Rusiya prezidenti Vladimir Putinin imza atdığı razılaşmaları Kreml yerinə yetirməsə, bu, Moskvanın beynəlxalq müstəvidə etibarsiz bir dövlət olduğunu göstərəcək. Ümumiyyətlə, Azərbaycan nə Moldova, nə də Ukraynadır. Hazırkı proseslərdə ortada Türkiyə də var. Qarabagda Rusiya Dnestryanı kimi fəaliyyət həyata keçirə bilməyəcək. Azərbaycan qəti surətdə buna imkan verməyəcək. İkincisi, biz Rusiyanın müxtəlif illərdə hərbi bazasını ölkədən çıxarmışıq. Məhz Qarabağda da sülhməramlı adı altında Rusiya hərbçilərinin uzun müddət qalmasına Azərbaycan imkan verməyəcək. Təbii ki, Rusiya çalışır buna nail olsun. Ancaq Moskvanın bu ssenarisi mümkün olmayacaq”.
Politolq onu da qeyd etdi ki, Azərbaycan 30 il əvvəlki dövlət deyil.
Vidadi ORDAHALLI
