Rusiya Liberal Demokrat Partiyasının sədri, Dumanın deputatı Vladimir Jirinovski Azərbaycanın sabiq səfiri İsfəndiyar Vahabzadəni məhkəməyə verəcəyi ilə hədələyib. O bu barədə teleaparıcı Solovyovun Youtube-da canlı efiri zamanı bildirib.
Qeyd edək ki, İ.Vahabzadə Jirinovskini və rus xalqını “donuz” adlandırıb. Daha dəqiq desək, buna səbəb Vahabzadənin Jirinovskiyə etdiyi videomüraciətdir. Belə ki, İ.Vahabzadə vaxtaşırı Azərbaycan xalqına qarşı təhqiredici çıxışlar edən Jirinovskiyə müraciət edərək, onu və rusları təhqir edib: “Volodya, qulaq as, piyli donuz, qoca uzunqulaq. Nə vaxtsa bizi ”qoyun" adlandırmışdın və bilmirəm niyə bu barədə hər kəs susmuşdu. Donuz kimi iy verirsən, millətiniz də iy verir. Mən sizin üçün İranda işləmişəm, rus donuzlarının nə etdiyini bilirəm. Boş-boş işlərlə məşğuldurlar, iy verirlər. Qoxunuz artıq bütün dünyaya yayılır. Nəfəs almaq mümkün deyil”. Rusiya Liberal Demokrat Partiyasının rəhbəri isə, öz növbəsində, bunu cəzasız qoymayacağını qeyd edib: “Azərbaycan Respublikasının rəhbərinə cinayət işinin başlanması tələbi ilə sərt bir məktub göndərəcəyik. Bu təhqir dəhşətlidir. Bu, orta əsrlər səviyyəsindədir".
Xatırladaq ki, İsfəndiyar Vahabzadə filologiya elmləri doktoru, professor, diplomat və Moldova Respublikası Elmlər Akademiyasının həqiqi üzvüdür. O, 1997–1999-cu illərdə Pakistan İslam Respublikasında Azərbaycan Respublikasının fövqəladə və səlahiyyətli səfiri, 1999-2002-ci illərdə Azərbaycan Respublikasının BMT-nin Cenevrə şəhərindəki bölməsində və digər beynəlxalq təşkilatlar yanında daimi nümayəndəsi, 2005-2011-ci illərdə Azərbaycan Respublikasının Moldova Respublikasındakı fövqəladə və səlahiyyətli səfiri, 2011-2017-ci illər ərzində isə Azərbaycan Respublikasının Belarus Respublikasındakı fövqəladə və səlahiyyətli səfiri vəzifələrində çalışıb. Azərbaycanın tanınmış şairi Bəxtiyar Vahabzadənin oğludur. Tərcümeyi-halından da görünür ki, İsfəndiyar Vahabzadə uzun müddət diplomatik postlarda çalışıb. Hər halda, bu ona imkan verirdi ki, fikirlərini daha korrekt və təhsirli formada bütöv bir xalqı təhqir etmədən çatdırsın. Ancaq o bunu etməyib, ya da edə bilməyib. Buradan görünür ki, Vahabzadə həm də yaxşı diplomat olmayıb. Yoxsa diplomatik etiket qaydalarını normal əxz etmiş olardı. Ancaq bununla heç də Jurinovskiyə haqq qazandırmaq kimi fikirdə deyilik.
Qeyd edək ki, İ.Vahabzadə V.Jirinovskinin Azərbaycanın ərazi bütövlüyünə və dövlət müstəqilliyinə qarşı etdiyi təhdidlərə cavab verərək, həmin açıqlamaları sərt tənqid edib. Azərbaycan ictimai rəyində bu mövzudakı mövqelər haçalanır. Bəziləri hesab edir ki, Jirnovskinin özü məhkəməlikdir: “Onun başının parası yoxdur. İsfəndiyar Vahabzadə nə deyibsə haqlıdır. Jirnovski bizim millətimizi təhqir edib, Vahabzadə də cavabını verib. Bizdə belə bir məsəl var: “Söymə nökər dədəmi, söyməyim bəy dədəni”.
İsfəndiyar Vahabzadənin özünün isə məsələyə münasibəti belə olub: “Kim nəyi bacarır, onu da eləsin. Verən versin, yazan yazsın, deyən desin. Mən bir şey demədən qabaq fikirləşib elə deyirəm. Sözümü demişəm, söhbəti uzatmağa ehtiyac yoxdur”. LDPR lideri Vladimir Jirinovski bu sözləri təkcə özünə deyil, bütün rus xalqına təhqir sayırsa, onda gərək bir neçə il əvvəl bütöv Azərbaycan xalqına qoyun deyəndə bunu dərk edərdi. Bəli, bütöv bir xalqa ünvanlanan təhqir yolverilməzdir. Ancaq nəzərə almalıyıq ki, quyuya daşı birinci Jirinovski atıb.
Azərbaycanın rəsmi dairələri bu məslədə Vahabzadəyə haqq qazandırmayıb. Azərbaycan Xarici İşlər Nazirliyinin Mətbuat xidmətindən İ.Vahabzadənin Rusiya ilə bağlı çıxışı haqda suala cavab olaraq bildirilib ki, İsfəndiyar Vahabzadə fəaliyyətində olan nöqsanlarına görə dövlət başçısı tərəfindən 2016-cı ildə səfir vəzifəsindən azad edilib: “Belə olduğu təqdirdə, Xarici İşlər Nazirliyi və ya digər dövlət orqanını təmsil etmədiyi üçün XİN olaraq onun fikirlərini şərh etməyimiz düzgün olmazdı”.
İsfəndiyar Vahabzadənin Rusiya ilə bağlı isterik, demaqoji açıqlamalarının ölkəmizə vurduğu ziyan az deyil. Ancaq nəzərə almalıyıq ki, Jirinovskinin ranqı ondan da yüksəkdir. Rusiya Dumasındakı böyük bir fraksiyaya rəhbərlik edir. Görürük ki, sosial şəbəkələrin Rusiya seqmentində, Rusiya mediasında Vahabzadənin açıqlamaları geniş müzakirə olunur. Yaxşı olardı ki, bu reaksiya Jirinovski azərbaycanlıları təhqir etdiyi zaman da veriləydi. Təəssüf ki, görmədik. Bizim cəmiyyətdə isə Vahabzadə sərt tənqid edilir. Bir sözlə, “hər ikisi eyni bezin qırağıdır”. Ancaq Rusiya hakimiyyəti və ictimai rəyi bundan həm də ciddi nəticə çıxarmalıdır ki, bir Jirinovski kimi məsuliyyətsiz adama görə bütün rus xalqının ünvanına xoşagəlməz ifadələr eşitmiş olur. Onun ağzını yummağın vaxtı çoxdan çatıb.
Məhəmmədəli QƏRİBLİ
