Məlum olduğu kimi, Ermənistanın Baş naziri Nikol Paşinyan 2019-cu ilin avqustunda Qarabağa qanunsuz səfəri zamanı “Qarabağ Ermənistandır və nöqtə” bəyanatını verməklə, illərlə gedən danışıqlar üzərindən xətt çəkdi. Daha sonra Vanadzor (Qarakilsə) şəhərində keçirdiyi mətbuat konfransında bunu bir daha həyasızcasına təkrarladı: “Azərbaycan danışıqlar prosesini ərazi bütövlüyü çərçivəsində aparmaq istəyir. Əgər Azərbaycan Qarabağın Azərbaycanın bir hissəsi olduğunu iddia edirsə, bu tələbində qətidirsə, onda Ermənistan da Qarabağın Ermənistan olduğunu deməlidir və nöqtə qoymalıdır”.
Bir il sonra onun bu avantürasının nə ilə nəticələndiyini hamı gördü. Azərbaycan illərlə davam edən işğala güc yolu ilə son qoydu. İndi Ermənistan elə bir miskin vəziyyətə düşüb ki, Paşinyanın komandası bu barədə bir kəlmə də danışmaq istəmir. Erməni mətbuatı yazır ki, bu ölkənin parlamentində deputatlara “Qarabağ Ermənistandır” sualı verilib, amma bir nəfərin belə səsi çıxmayıb. Belə ki, Ermənistan parlamentində keçirilən qapalı iclas zamanı deputat Tiqran Abramyan Xarici əlaqələr komissiyasının rəhbəri vəzifəsinə namizəd, baş nazir aparatının sabiq rəhbəri Eduard Ağacanyana üz tutaraq sualla müraciət edib: “Bir vaxtlar Nikol Paşinyan “Qarabağ Ermənistandır” deyirdi. İndi bu sualla qarşınıza çıxıram. Siz necə düşünürsünüz, “Qarabağ Ermənistandır?” Ümumiyyətlə, hamıya sual verirəm, cavab verin!”. Bu sualdan sonra iclas zalı sükuta qərq olub.
Görünən odur ki, Paşinyanın komandası üzləşdikləri bu rəzil durumun baiskarı barədə danışmağa özlərində cəsarət tapmır.
“Azərbaycanın həm diplomatik, həm də hərbi müstəvidə buna cavabı sərt oldu”
Məsələyə münasibət bildirən politoloq Sahil İsgəndərlinin sözlərinə görə, bu suala cavabla bağlı hakim partiyadan heç kəsin danışmaması onu göstərir ki, onlar necə böyük diplomatik səhv buraxdıqlarının fərqindədirlər: “Məsələ ondadır ki, Azərbaycanın Paşinyanın bu təxribatına cavabı çox sərt oldu. Söhbət ondan gedir ki, Azərbaycan həm diplomatik, həm də hərbi müstəvidə buna sərt cavab verdi. Ermənistan həm diplomatik müstəvidə çətin duruma düşdü, həm də hərbi müstəvidə çıxılmaz durumla üzləşdi. Azərbaycan qısa müddətdə qətiyyətlə ərazilərini işğaldan azad etdi. Ona görə də Ermənistan hələ də Paşinyanın o sərsəm açıqlamasının altından çıxa bilmir. Nəinki siyasi elita, həm də cəmiyyət gördü ki, belə sərsəm bəyanatlar Ermənistan üçün nə ilə nəticələnə bilər. Sözügedən məsələnin əsas izahı bununla bağlıdır. İkinci bir tərəfdən, Ermənistanda olan revanşist qüvvələr də “Qarabağ Ermənistandır” şüarı ilə çıxış etməyə cəsarət etmirlər. Düzdür, əvvəlki separatçı fikirlərdən əl çəkmirlər, amma sözügedən ifadəni işlətmirlər. O baxımdan hesab edirəm ki, ən azı yaxın 20-30 ildə heç kəs həmin “şüarı” təkrarlamağa cəsarət etməyəcək. Ona görə də düşünürəm ki, Ermənistan parlamentində səslənən sualın sükutla qarşılanması bununla bağlıdır. Ən nəhayət, nəzərə almaq lazımdır ki, Ermənistanın ağası olan Rusiyanın prezidenti Putin beynəlxalq hüquqa görə Dağlıq Qarabağın Azərbaycan ərazisi olduğunu bildirdi. Ermənistan KTMT-ni Qarabağ məsələsinə müdaxilə etməyə çağırsa da bu alınmadı”.
Bütün bunlardan çıxış edən politoloq hesab edir ki, təkcə Ermənistan parlamentində yox, erməni cəmiyyətində də “Qarabağ Ermənistandır” sərsəmləməsi gündəmdən çıxarılıb.
Vidadi ORDAHALLI
