Rusiyanın Müdafiə naziri Sergey Şoyqu erməni həmkarı Arşak Karapetyanla görüşüb. Bu barədə Ermənistanın Müdafiə Nazirliyi məlumat yayıb. Görüşün sonunda Şoyqu Karapetyana xəncər hədiyyə edib. “Hesab edə bilərik ki, Ermənistana silah tədarükü prosesi başlayıb” deyə Şoyqu simvolik hədiyyəni erməni nazirə verərkən bildirib.
Şoyqu Ermənistan müdafiə naziri Karapetyana xəncər verdi və ona “hesab et ki, Ermənistanın silahlandırılması başlanıldı” işarəsini vurdu və bununla da öz ölkəsinin əsl niyyətlərini bir daha ortaya qoymuş oldu.
“Ehtimal ki, Rusiya bununla Azərbaycana və Türkiyəyə qarşı Ermənistanla birgə hərbi əməliyyatlara başlamaq mesajını da göndərə bilər”
Qarabağ Azadlıq Təşkilatının (QAT) sədri Akid Nağı “Bakı-Xəbər”ə şərhində bildirdi ki, Rusiyanın mövqeyi Azərbaycan tərəfindən sentyabrın 27-dən diqqətlə izlənilir: “Bütün gedişatda Rusiyanın necə hərəkət etdiyini, hansı mövqe tutduğunu izlədik və bu ölkənin bitərəf mövqe tutduğunu uğur kimi dəyərləndirdik. Amma təbii ki, bu təkcə Rusiyanın Azərbaycana xoş münasibəti ilə bağlı deyildi, Rusiya Azərbaycan və Türkiyənin birgə gücü qarşısında qismən neytrallığını qoruyub saxlaya bilmişdi. Özü də gördü ki, Azərbaycan və Türkiyə qüvvələri qarşısında heç nə edə bilməz. Əgər açıq şəkildə hərbi əməliyyatlara müdaxilə edərsə, Türkiyə də meydanda olacaq. Onda Rusiyanın özü üçün çox pis vəziyyət yarana bilərdi. Həm regionda problemlə üzləşərdi, həm də bu, Türkiyə ilə münasibətlərinin korlanması ilə nəticələnərdi, bu da Rusiyanın maraqlarına qətiyyən cavab vermirdi. Hesab edirəm ki, İkinci Qarabağ müharibəsində Ermənistanın məğlubiyyəti Ermənistandan daha çox Rusiyanın məğlubiyyəti demək idi. Rusiyada da bunu çox gözəl başa düşürdülər. Müharibə dövründə Rusiya müqavimət göstərə, heç bir nəticəyə nail ola bilmədi. Ermənistanla birgə Rusiya da özü üçün vaxt qazandı. Rusiya müharibədən məğlub çıxdığını çox dərindən göstərməmək, bunu gizlətmək üçün çox cəhdlər göstərdi. Bu istiqamətdə çox gərgin danışıqlar getdi, Biz 10 noyabr ərəfəsində Azərbaycan və Rusiya prezidentlərinin danışıqlarını izlədik, hansı gərgin şəraitdə getdiyini gördük. Pərdə arxasında Rusiya və Türkiyə rəhbərləri arasında danışılqlar gedirdi. Rusiya çox çətinliklə özünə uyğun bir bəyannamənin imzalanmasına, müharibədən nisbətən sərfəli bir çıxışa nail oldu. Özünü tam məglub şəkildə göstərməmək üçün Rusiya hərbi kontingentini sülhməramlılar adı altında regiona yerləşdirməyə nail oldu. Bu həm də o məqsədi güdürdü ki, Rusiya məğlubiyyət qarşısında qalmasın, yəni bu fakt ortaya çıxmasın. Eyni zamanda sonrakı addımları üçün də orada baza yaradırdı…”
A.Nağı hesab edir ki, Rusiyanın öz məğlubiyyətinin əvəzini Azərbaycandan və Türkiyədən çıxması üçün isə rus sülhməramlıları həmin baza rolunu oynayırdı. “Rusiya məqam gözləyirdi və indi hesab edir ki, o məqam yetişib. Rusiyanın müdafiə nazirinin Ermənistana bu şəkildə açıq dəstək verməsinin və onun artıq silahlandırılmaya başlanıldığını bəyan etməsinin bir neçə yozumu ola bilər. Birincisi, ehtimal ki, Rusiya bununla Azərbaycana və Türkiyəyə qarşı Ermənistanla birgə hərbi əməliyyatlara başlamaq mesajını da göndərə bilər. Amma bu inandırıcı deyil. Çünki indiki şəraitdə, təcrid oldunmuş vəziyyətdə Azərbaycan-Türkiyə-Pakistan birliyinə qarşı hərbi müstəvidə çıxış etmək Rusiyanın maraqlarına cavab vermir. Amma ehtimallardan biri budur. Digər mesaj isə o ola bilər ki, Rusiya bu jestləri ilə Ermənistanı tamamilə Qərbin nəzarətindən çıxarmaq istəyir. Ona görə də, Şoyqu bununla Ermənistanın müdafiə nazirinə demək istəyir ki, Ermənistan həmişəlik Rusiyanın silahının altında olmalıdır. Yəni Soyqunun Karapetyana xəncər bağışlaması elə bu anlamı daşıyır ki, Ermənistan Rusiyanın silahının altında olub, olacaq da. Əslində, Rusiya Ermənistanı həmişə silahlandırıb, bu gün də silahlandırmasını bəyan etməsində təəccüblü heç nə yoxdur. Müharibədə Rusiyanın Ermənistana verdiyi silahlar bizim Qənimətlər parkındadır”.
A.Nağı hesab edir ki, Ermənistanın silahlandırılmasına başlanmasının bəyan edilməsinin əsas mahiyyəti Rusiyanın bütövlükdə Ermənistanı öz nəzarətinə qaytarmaq niyyəti ilə bağlıdır. Onun sözlərinə görə, Ermənistanın müdafiə nazirinə xəncər bağışlanılmasının, bu ölkənin silahlandırılmasına start verildiyinin bəyan edilməsi və sairin əsas mahiyyəti Ermənistanı Qərbin nəzarətindən çıxarmaqdı. “Amma bu da mümkün deyil. Ermənistan tam şəkildə Qərbə bağlıdır, bu bağı qoparmaq mümkünsüzdü, Qərbin nəzarətindən çıxa bilməz. Çünki maliyyəni də Qərbdən alır. Rusiyanın Ermənistana verməyə maliyyəsi yoxdur, Ermənistanın vəziyyətdən çıxması üçün milyardlar lazımdı, bunu Qərb verir” - deyə A.Nağı vurğuladı.
İradə SARIYEVA
