Azərbaycan Müdafiə Nazirliyinin Rusiya sülhməramlılarına ünvanlanmış bəyanatı 10 noyabr 2020-ci il üçtərəfli razılaşmanın icra vəziyyətinin ən prinsipial qiymətləndirmə sənədlərindən biridir.
Azərbaycan müdafiə nazirliyinin 11 avqüst bəyanatı regional sülhə nail olmaqda 10 noyabr və 11 yanvar sənədləri kimi dəyişdirici təsirə malikdir. Azərbaycan regionumuzda möhkəm və dayanıqlı sülhün bərqərar edilməsində ən ardıcıl tərəf olduğunu nümayiş etdirir. habelə üçtərəfli razılaşmaların tam icrasında Azərbaycanın nə qədər həssas və maraqlı tərəf olduğunu bu bəyanat bir daha qəti sübut etdi.
Azərbaycan postmüharibə dövrünün ziddiyyətlərinin həllində bütün maraqlı tərəflərin məsuliyyətlərini və səhvlərini eyniləşdirməyin çox ziyanlı oldiğunu növbəti dəfə göstərdi. Azərbaycan bütün dünyaya bəyan etdi ki, 10 noyabr 2020-ci il üçtərəfli razılaşmasının mühüm maddələrindən biri olan erməni silahlı qüvvələrinin ərazilərimizdən çıxarılması tələbi hələ icra edilməyib. Azərbaycan göstərdi ki, Rusiya sülhməramlılarının məsuliyyət zonasında nəinki möhkəm sabitliyin əsasları yaradılmlr, əksinə, gələcək üçün daha qorxulu gərginliklərin əsası qoyulur.Müdafiə nazirliyimiz ərazilərimizdə erməni silahlı qüvvələrinin yerləşdirilməsinə son qoyulmasını tələb etməklə rus sülhməramlılarının da konkret məsuliyyətini göstərdi. Heç bir şübhə yeri qalmadı ki, sülhməramlılar Azərbaycan ərazilərində sülhyaratma missiyasını ilk günlərdən yarımçıq icra edir. Sülhməramlılar özləri Azərbaycan ərazilərində yerləşməklə paralel erməni silahlılarının çıxarılması vəzifəsini də icra etməli olduqlarına göz yumublar. Sülhməramlıların yarımçıq missiya icraçılığı ona gətirib çıxarıb ki, erməni silahlı qüvvələri ərazilərimizdə daha da möhkəmlənməkdə davam ediblər və yeni-yeni postlar qurublar. Erməni silahlı qüvvələrinin ərazilərimizdə hələ də mövcudluğu təcavüzkar niyyətli hərbi aktdır və bunun məsuliyyəti sülhməramlıların üzərinə düşür. Azərbaycanın konkret və tələbkar mövqeyi sülhməramlıların erməni silahlı qüvvələrinə yolverilməz himayədarlığını tam şəkildə aradan qaldırmalıdır. Müdafiə Nazirliyi Prezident İlham Əliyevin müharibə dövründə olduğu kimi, postmüharibə ziddiyyətlərinin də aydın həlli platformasına malik olduğunu nümayiş etdirdi. Azərbaycan Prezidentinin mövqeyi budur ki, dayanıqlı sülhün taleyi razılaşmaların istisnasız olaraq icrasından asılıdır.
Postmüharibə dövründə baş verən hadisələr Ermənistanda revanşist qüvvələrin yavaş-yavaş özünə gələrək, hətta ali hərbi məqamları ələ keçirdiklərini göstərir. Ermənistanın yeni müdafiə nazirinin "Azərbaycan əsgərlərini öldürün" əmri onun iki il əvvəl Amerikada "yeni ərazilər naminə yeni müharibə" bəyanatı vermiş köhnə nazirdən heç nə ilə fərqlənmədiyini göstərir. Bu mənada dünya və ilk növbədə Rusiya Azərbaycan Müdafiə Nazirliyinin bəyanatını ciddi siqnal kimi qəbul etməlidir. Ermənistanın köhnə müdafiə naziri Tonoyanın məlum bəyanatı müharibəyə necə yol açmışdırsa, indiki nazir Karapetyan da eyni texnologiya ilə regionu müharibəyə sürükləyir.Təəssüf ki, bütün bu qorxulu proseslər rus sülhməramlılarının seyrçiliyi və icazəsi altında baş verir.
Bəyanatın müstəsna tarixi əhəmiyyətlərindən biri də ondan ibarətdir ki, sülhməramlıların bəlli məsuliyyət zonasında müvəqqəti yerləşdiyini və öz missiyasını tam icra etməyə borclu olduğunu qəti bəyan etdi.
Aydın QULİYEV
