Son günlər Ermənistan silahlı qüvvələri Naxçıvandakı mövqelərimizi mütəmadi atəşə tutmağa başlayıb. Avqustun 10-u günorta saatlarında Ermənistan silahlı qüvvələrinin bölmələri Vedi rayonunun Arazdəyən yaşayış məntəqəsində yerləşən mövqelərindən Naxçıvan Muxtar Respublikasının Sədərək rayonu Heydərabad yaşayış məntəqəsi istiqamətində yerləşən Azərbaycan Ordusunun mövqelərini müxtəlif çaplı silahlardan atəşə tutub.
Müdafiə Nazirliyindən verilən məlumata görə, Azərbaycan Ordusunun şəxsi heyəti arasında həlak olan və yaralanan yoxdur. Ermənilərin Naxçıvanı müharibə çəlləyinə çevirmək istəməsinin kökündə hansı səbəblər durur?
Hərbi-siyasi ekspert, ehtiyatda olan polkovnik-leytenant İbrahim Rüstəmli “Bakı-Xəbər”ə açıqlamasında bildirdi ki, Azərbaycan ötən il hərbi əməliyyatlara başlayan zaman 44 gün ərzində Ermənistanın bütün hərbi infrastrukturunu demək olar sıradan çıxarıb: “Onlar nə iqtisadi, nə siyasi, nə də ki, hərbi baxımdan bizim zərbələrimizə tab gətirə bildi. Spinozanın bir sözü var. Deyir ki, insanları hər şeydən çox narahat edən reallıqdır. Ermənistan bu reallıqla barışa bilmir. Çünki son 30 ildə bəyan edirdi ki, onlar güclü orduya sahibdirlər. Dəmir yumruq necə təpələrinə dəydisə, şoka düşdülər. İndi-indi şokdan ayılmağa başlayırlar. 44 günlük müharibəni yadda qalmağa haqq etdirən bir sıra səbəblər var. Bunlardan ən başlıcası Prezidentimizin müharibəni aparmaq qabiliyyəti idi. Cənab İlham Əliyev çox böyük redaktələr etdi. Biz Qarabağ müharibəsi zamanı buraxdığımız səhvləri təkrarlamadıq. Ermənilərin bu gün atəşkəsi pozması revanşistlərin əməlidir. Bununla regionda gərginliyi yenidən artırmaq istəyirlər. Bütün bunlara Prezident lazımi cavabları verir. Cənab İlham Əliyev çıxışlarında dedi ki, biz hətta XXII əsrin müharibəsinə hazır olmalıyıq. Bu həmin revanşistlərə verilən ən layiqli cavabdır. Nəzərə çatdırırıq ki, lazım gələrsə daha sərt müharibələrə hazırıq. Ortada 3 ölkənin imzaladığı sənəd var. Həmin sənəd Azərbaycanın qələbəsini, Ermənistanın isə məğlub olmasını şərtləndirir. Bundan sonra baş verəcək hadisələrə görə bütün məsuliyyət Ermənistanın üzərinə düşür. Bəzi ölkələr qəsdən münaqişə ocaqlarını oyatmaqla revanşistlərə motivasiya verirlər. Erməni xalqı hər zaman vasitəyə çevrilir və əziyyət çəkir. Qədim romalılar qulları danışan alət adladırırdı. Yəni onun-bunun ideyasını yerinə yetirən vasitə. Ermənilər də həmin danışan alətlərdir. Erməni lobbisi kifayət qədər təsir imkanlarına malikdir. Onlar prosesin səngiməsində maraqlı deyil”.
Ekspertin sözlərinə görə, hədəf kimi Naxçıvanın seçilməsinin də obyektiv səbəbləri var: "Bu il təkcə Qazaxın işğalda olan kəndləri yox, eyni zamanda Naxçıvanın da işğalda olan kəndi geri qaytarılacaq. Sərhədlərin delimitasiyası, sülh sazişinin imzalanması kimi məsələlər də ilin sonunadək reallaşacaq. Yəni bu gün Ermənistanın Naxçıvanı davamlı olaraq atəşə tutmasının kökündə məhz Kərki ilə bağlı narahatlıqlar dayanır. Lakin erməniləri narahat edən əsas məqam sülh sazişinin imzalanmasıdır ki, bunu da Nikol Paşinyan hakimiyyətinin ilk illərindən istəyir. Çünki Qarabağ məsələsi tam həll olunarsa, Ermənistan Rusiyanın təsir dairəsindən çıxacaq və ABŞ-la yaxınlaşmaq şansı qazanacaq. Bunu başa düşən Rusiyaya bağlı erməni qüvvələri, etiraz əlaməti olaraq, Naxçıvan da daxil olmaqla, sərhədboyu ərazilərdə təxribatlar törətməyə çalışır".
Məhəmmədəli QƏRİBLİ
