Ermənistan hakimiyyətinin Kollektiv Təhlükəsizlik Müqaviləsi Təşkilatına ümidi özünü doğrutlmur. Təşkilat Ermənistan-Azərbaycan qarşdurmasında tərəf olmaq istəmir. KTMT nə müharibə, nə də ondan sonrakı dövrdə Ermənistanın yanında oldu. Çünki Ermənistanın ortaya qoyduğu arqumentlərin əsassız olduğu məlumdur.
Bunun nəticəsidir ki, KTMT baş katibi Stanislav Zas İrəvandakı görüşlərində ehtiyatlı açıqlamalar səsləndirdi. Erməni jurnalistlər isə nə qədər baş katibdən Azərbaycan əleyhinə açıqlama almaq istəsələr də, alınmadı. S.Zas Azərbaycanın əleyhinə bir kəlmə danışmadı. Əksinə, üçtərəfli razılaşmadan irəli gələn məsələlərin yerinə yetirilməsini xatırlatdı. Göründüyü qədər, KTMT-nin mövqeyi dəyişməyib və Ermənistanın bu təşkilatdan hərbi dəstək gözləməyinə dəyməz: “Ermənistan-Azərbaycan sərhəd münaqişəsinin siyasi yolla nizamlanması imkanları tükənməyib və onun həlli üçün Ermənistan-Azərbaycan-Rusiya formatında iş davam etdirilməlidir. Problemin həlli yollarından danışsaq, biz hesab edirik ki, bu vəziyyətin siyasi yolla nizamlanması imkanları tükənməyib və əslində bu bütün tərəflər üçün ən yaxşı variant olardı. Biz tərəflərin bunu dərk edəcəyini və fikir ayrılıqlarının siyasi yolla həlli üçün zəruri addımları atacağını gözləyirik”.
Bununla belə, KTMT baş katibi hərbçilərinə Azərbaycan əsgərlərini məhv etmək üçün atəş açmağı əmr edən Ermənistanın müdafiə nazirinin bəyanatını da şərh etmədi.
“Nəzərə almaq lazımdır ki, Minsk-Bakı münasibətləri çox yüksək səviyyədədir”
Məsələyə münasibət bildirən Yeni Yol Partiyasının sədri Ramil Hüseynovun sözlərinə görə, S.Zasın bu cür təhrikedici suallardan yayınmasının bir neçə səbəbi var: “Əvvəla, S.Zas Ermənistanın irəli sürdüyü arqumentlərin doğru olmadığını çox yaxşı bilir. Çünki prosesdən yetərincə məlumatlıdır. Digər tərəfdən, S.Zas bir müddət Ermənistanın onun baş katib olmasına necə mane olduğunu, bu işi yubatdığını unutmayıb. Çünki Ermənistan tərəfi iki il əvvəl əməllicə bu işə mane olmağa çalışdı. Arqumentləri də o idi ki, S.Zas Bakida ali hərbi təhsil aldığı üçün Azərbaycanın maraqlarını qoruyacaq. Halbuki, bunun məsələyə heç bir dəxli yox idi. Zas prosedur qaydalarına uyğun olaraq həm də Belarusu təmsil edir. Nəzərə almaq lazımdır ki, Minsk-Bakı münasibətləri çox yüksək səviyyədədir. Zasın bu cür ehtiyatlı və təmkinli mövqe sərgiləməsində bu amilin də böyük rolu var. Ən nəhayət, bir aydan sonra S.Zasın KTMT-yə rəhbərlik etməsinin vaxtı başa çatır. Belə olan halda niyə Ermənistanın hər hansı təxribatına alət olsun ki? Bütövlükdə, Ermənistanın KTMT-ni Qarabağ məsələsinə alət etməsi perspektivsiz görünür. Ən azından ona görə ki, təşkilatda təmsil olunan türkdilli dövlətlər buna imkan verməz”.
Bütün bunlara rəğmən, partiya sədri hesab edir ki, Azərbaycan son dərəcə ayıq-sayıq olmalıdır.
Vidadi ORDAHALLI
