Rusiya milyarderi Ruben Vardanyan Laçın dəhlizindən rahatca keçərək Azərbaycan Respublikasının rəsmən sülhməramlı adlanan Rusiya hərbi kontingentinin nəzarətində olan torpaqlarına gəlib. Bu haqda Xankəndidəki separatçı nəşrlər məlumat yayıb, eyni zamanda R.Vardanyan özü sosial şəbəkədə paylaşım edib.
İnformasiyadan bəlli olur ki, Rusiya oliqarxının maliyyəsi hesabına Xocalı rayonunun Xanyurdu kəndindəki ermənilər üçün yeni çörək sexi istifadəyə verilib. Erməni milyarder bunları deyib:
“Çox təəssüf edirəm ki, Ermənistanda yaşayan ermənilərin 80% -i Qarabağda olmayıb. Sizi buraya gəlməyə, bu çörəyi, bu suyu dadmağa, bu pomidor və xiyarı dadmağa və bu insanların öz torpağına, kəndinə, ailəsinə olan münasibətini həqiqətən hiss etməyə təşviq etmək istəyirəm. Bu, bütün gücümüzlə qorumalı olduğumuz torpaqlarımız, Vətənimizdir”.
Çox maraqlıdır ki, işğal dönəmində olan vəziyyət təkrarlanır. Həmin vaxt da Azərbaycanın icazəsi olmadan işğal altında saxlanılan ərazilərə icazəsiz yatırımlar edilirdi. Buna rus sülhməramlıları niyə göz yumur?
Cümhuriyyət Xalq Partiyasının (CXP) sədri Bədrəddin Quliyev “Bakı-Xəbər”ə bildirdi ki, rusiyalı milyarder Ruben Vardanyanın Laçın dəhlizindən keçərək Azərbaycan ərazisinə daxil olub orada “xeyriyyəçilik” işləri aparması ermənilərin heç bir razılaşmaya əməl etmədiyini təsdiqləyir: “Biz həmin razılaşmalara yenidən baxış keçirməliyik. Onlar necə ki, Zəngəzurla bağlı prosesin qarşısını almaq istəyir, biz də Laçın dəhlizini öz nəzarətimizdə saxlamalıyıq. Məsələni də belə qoymalıyıq ki, ermənilər qoşunlarını Qarabağdan çıxarmadığına görə bu addımın atılması zəruridir. Rusiya sülhməramlıları orada ikibaşlı oyun oynayır. Moskvadakı siyasətçilərin danışığından görünür ki, onlar bölgədə qalmaqdan ötrü münaqişənin ömrünü uzatmaq istəyir. Biz müttəfiqlərimizlə bu məsələləri ciddi müzakirə etməliyik. Hadisələrin üzərinə ciddi getməliyik. Bu gün onlar çörək sexi açırsa, sabah məktəb, o biri gün qəsəbə tikəcək ki, ermənilər qaçmasın. Bilirsiniz ki, erməni əhali sürətlə Qarabağı tərk edir. Onlar bu cür layihələrin köməyilə erməniləri Qarabağda saxlamaq istəyirlər. Rusiya ilə bağlı mövqelərimizə baxış keçirməliyik. Tələb etməliyik ki, Rusiya prezidentinin imzası olan razılaşmaya riayət etsin. Parlament, Xarici İşlər Nazirliyimiz bu məsələlərin üzərinə getməlidir. İctimaiyyət kəskin pisləməlidir belə halları. Azərbaycanın icazəsi olmadan belə hallar baş verirsə, Laçın dəhlizində mütləq bizim kömrükçülərimiz və sərhəd qoşunlarımız olmalıdır. Azərbaycan getdikcə həmin ərazilərdə öz yurisdiksiyasını gücləndirməlidir. Onların atdığı addımların hamısına adekvat cavablar verilməlidir. Çünki dövləti və milli maraqlarımız bunu tələb edir”.
Partiya sədri hesab edir ki, Azərbaycanın bütün bu addımları atmağa tam hüququ çatır: “Rusiya öz missiyasını xristian təəssübkeşliyinə əsaslanaraq həyata keçirəcəksə, bu, qətiyyən bizə sərf etmir”.
Məhəmmədəli QƏRİBLİ
