Ermənistanda yerli ermənilərlə Qarabağdan gələn ermənilər arasında münasibətlər heç vaxt rəvan olmayıb. Bunun nəticəsidir ki, 1988-ci ildən sonra baş verən məlum hadisələr zamanı Azərbaycandan Ermənistana gedən ermənilərin bir qismi orada çox yaşaya bilmədi. Onlara göstərilən mənfi münasibət üzündən həmin ermənilərin bir qismi Rusiyaya, əsasən də Şimali Qafqaza köçdü. 1998-ci ildə “Qarabağ klanı” Ermənistanda hakimiyyəti ələ keçirəndən sonra yerli və Qarabağ erməniləri arasında ziddiyətlər daha da dərinləşdi.
Müşahidələr göstərir ki, İkinci Qarabağ müharibəsindən sonra İrəvan və Qarabağ erməniləri arasındakı uçurum daha da dərinləşməkdə davam edir. Xüsusən də Qarabağı tərk edən ermənilərə münasibət daha pisdir. Bu arada erməni mediası yazır ki, son vaxtlar İrəvan erməniləri Qarabağ ermənilərinə ev kirayə verməkdən açıq imtina edirlər: “Bu vəziyyəti İrəvan yataqxanalarından birində əyani şəkildə görmək mümkündür. Belə ki, fevral ayında oraya köçən bir neçə Qarabağ ermənisi ailəsinin yataqxananı tərk etmələri tələb olunur. Həmin ailə üzvləri deyir ki, yataqxana rəhbərliyi onların yerinə daha çox pul ödəyən hindistanlı tələbələrin gələcəyini bəyan edib. Qarabağdan gələn bir sıra ermənilər deyir ki, qaçqınlıqla bağlı status sənədi alan kimi xaricə gedəcəklər. Çünki İrəvanda yaşamaq dözülməzdir”.
Görünən odur ki, ermənilər arasında qarşıdurmalar daha da kəskinləşir.
“Çünki Qarabağdakı separatizm onların başına bəla olub”
Məsələyə münasibət bildirən AMİP funksioneri Əli Orucovun sözlərinə görə, bu yöndə qarşıdurmaların daha da artacağı gözlənilir: “Çünki ziddiyətlərin dərin kökləri var. Məsələ ondadır ki, Ermənistan erməniləri Qarabağda baş verənlərin onlar üçün çox ciddi problemlər yaratdığını deyirlər. Erməni separatizmi üzündən Ermənistan normal inkişaf edə bilmir və bunun əsas zərbəsi cəmiyyətə dəyir. Dəfələrlə Ermənistanda əsgər anaları etiraz aksiyası keçirərək övladlarının Qarabağa göndərilməsinə qarşı çıxıb. Zaman-zaman açıq bəyan edirlər ki, övladlarının Qarabağda ölməsini istəmirlər. Çünki Qarabağdakı separatizm onların başına bəla olub. Bu səbəbdən Ermənistan təcrid vəziyyətinə düşüb, yoxsulluq üzündən əhali ölkəni tərk edib. 1990-cı ildə Ermənistan əhalisi 3,5 milyon nəfər idisə, hazırda ölkədə əhalinin sayı heç 3 milyon deyil. Birinci Qarabağ müharibəsində Ermənistan Rusiyanın köməyi ilə Qarabağı və ətraf rayonları işğal edəndən sonra bir ara tərəflər arasında ziddiyətlər səngidi. Ancaq Ermənistan müvəqqəti qalib tərəf olsa da, bu uzun çəkmədi. Məlum oldu ki, Qarabağın işğalı ermənilərə xoşbəxtlik gətirməyib. İkinci Qarabağ müharibəsindən sonra isə vəziyyət tamamilə dəyişdi. Qarabağı tərk edən ermənilərin bir qismi Ermənistana yerləşdi. Ancaq məlum olur ki, Ermənistan erməniləri artıq bezib. Bu üzdən Qarabağ ermənilərinə evləri kirayə belə vermək istəmirlər”.
Partiya funksioneri onu da qeyd etdi ki, yerli və Qarabağ erməniləri arasında qarşıdurmalar daha da kəskinləşəcək.
Vidadi ORDAHALLI
