Rusiya Müdafiə naziri Sergey Şoyqu siyasi yönümlü bəyanatlar verməyə başlayıb. Şoyqu daxili təhlükənin xarici təhdidlərdən daha çətin olduğunu bəyan edib: “Xarici təhdidlər başadüşüləndir. Bizi təhdid edəndə, kimin təhdid etdiyini, nə üçün təhdid etdiyini bilirik. Onlar isə silahlanıblar. Ona qarşı müqavimət göstərə biləcəyimizi, bununla necə mübarizə aparacağımızı bilirik”.
Onun fikrincə, cəmiyyətin parçalanması və çürüməsi hər bir ölkə üçün ən böyük təhlükə yaradır: “Ancaq bunun daha qorxunc bir hissəsi var, bu yaxınlarda, daha doğrusu, son onilliklər ərzində hər hansı bir ölkə üçün əsas təhlükə yaradılır və ya artıq yaradılıb. Bu, daxili təhdiddir. Bütün bunlar ölkə daxilində cəmiyyəti içindən tədricən parçalamaqdır”.
Rusiyalı nazir deyib ki, Riqada, Tallində və Varşavada ruslara vətənlərində təxribat xarakterli informasiya fəaliyyətləri həyata keçirib təbliğat aparmaq üçün təlim mərkəzləri yaradılıb: “Rusiya hərbi qruplaşmalarının Suriyaya yeridilməsi rəngli inqilablar zəncirini qırdı. Bizim ordumuzun Suriyaya yeridilməsi Yaxın Şərq və Afrikadakı rəngli inqilablar zəncirini qırdı. Biz Suriyada təkcə terrorçuları məhv etmirik, həm dövləti onlardan xilas edir, həm də terrorçuların buradan bizim ölkəyə gəlməsinin qarşısını alırıq. Rəngli inqilablar dalğası dünya siyasətində ciddi dəyişikliklərə səbəb oldu. Yuqoslaviya, Gürcüstan, İraq, Liviya, Ukrayna, Suriyada bu inqilab ssenarisi gerçəkləşdirildi”. Şoyqu bununla nə demək istəyib?
Politoloq Elşən Mustafayev “Bakı-Xəbər”ə bildirdi ki, prezident Vladimir Putinin vaxtından əvvəl hakimiyyətdən gedəcəyi ilə bağlı iddialar və varis mövzusu Rusiyanın tənqidçi mediasının daima diqqətindədir: “Vladimir Putin hakimiyyətdən gedəndən sonra onu əvəz edəcək şəxs haqda iddialar Qərb mediasında zaman-zaman gündəmə gələn mövzulardandır. Ötən ilin əvvəllərindən başlayaraq qəbul olunan bir sıra qanunlar, xüsusilə də eks-prezidentlər və onların ailə üzvlərinə toxunulmazlıq, eks-prezidentlərə Federal Məclisin ömürlük üzvü olmaq hüququnun verilməsi Putinin hakimiyyətdən vaxtından əvvəl gedəcəyi ilə bağlı iddiaları aktuallaşdırıb. Putini əvəz edə biləcək namizədlərin siyahısı genişdir. Baş nazir Mixail Mişustin, müdafiə naziri Sergey Şoyqu, Moskva meri Sergey Sobyanin, Təhlükəsizlik Şurasının katibi Nikolay Patruşevin oğlu, indiki kənd təsərrüfatı naziri Dmitri Patruşev, Xarici Kəşfiyyat Xidmətinin rəisi Sergey Narışkin və s. Federasiya Şurasının sədri Valentina Matviyenko, Rusiya Prezidenti Administrasiyasının rəhbəri Anton Vayno, Dövlət Dumasının spikeri Vyaçeslav Volodin də mümkün varis siyahısında olan şəxslərdir. Ancaq onların içində Rusiya hökumətində hamıdan çox işləyən şəxslərdən olan müdafiə naziri Sergey Şoyqunun adı daha real görünür. Çünki Şoyqunun rəhbərlik etdiyi Rusiya silahlı qüvvələri Putinin xarici siyasətinin əsas elementinə çevrilib. Şoyqu yalnız növbəti müdafiə naziri deyil. Putindən 3 yaş cavan olan Şoyqu Rusiya hökumətində ən çox işləyənlərdəndir. Onun hakimiyyət strukturlarına gəlişi hələ 1990-cı ildə, SSRİ-nin dağılmasından əvvəl baş verib. Bundan başqa vurğulanır ki, Şoyqu fövqəladə hallar naziri postunda yaxşı nüfuz qazanıb. Bununla yanaşı, o, Rusiya bürokratiyası arasında ustalıqla manevr edərək, düşmən qazanmayıb. Hakim dairədə başqa belə bir siyasətçi yoxdur. Bu, tamamilə presedentsiz hadisədir. Qeyd olunur ki, Şoyqunun Putinə sadiqliyi, populyarlığı və səriştəliliyinin kombinasiyası müdafiə nazirini ən ehtimal olunan varisə çevirir. Məhz bu amil artıq Şoyqunu siyasi bəyanatlar verməyə vadar edir. Təbiidir ki, bütün bu proseslər Putinin icazəsi və iradəsi daxilndə baş verir”.
Məhəmmədəli QƏRİBLİ
