Avqustun 5-də Milli Məclisin sədri Sahibə Qafarova İran İslam Respublikasının yeni seçilmiş prezidenti Seyid İbrahim Rəisinin andiçmə mərasimində iştirak etmək üçün qonşu ölkəyə səfər etdi. Səfər çərçivəsində bir sıra vacib görüşlər keçirildi, ölkələr arasında münasibətlərin inkişafına dair faydalı müzakirələr aparıldı. Həmçinin danışıqlarda Azərbaycan tərəfinin regional məsələlərlə bağlı açıq mövqeyi ifadə olundu.
Belə önəmli səfərdən sonra Azərbaycanla İran arasında əlaqələrə kölgə salmağa çalışan bəzi dairələr ortaya atılaraq xoşagəlməz müzakirələr açdılar. Məsələnin mahiyyətinə varınca, irəli sürülən iddiaların cəfəngiyyat olduğu və təxribat məqsədi daşıdığı aydın şəkildə görünür.
Xüsusilə xanım spikerin İranın yeni seçilmiş prezidenti İbrahim Rəisi ilə görüşü zamanı Azərbaycan bayrağının asılmamasını əlində bayraq edənlər, görünür, İran dövlətinin protokol qaydalarından xəbərsizdir, ya da bilərəkdən ölkələr arasında diplomatik gərginlik yaratmağa çalışırlar. Sahibə Qafarovaya yönəlik ittihamlardan biri də budur ki, o niyə qəbulda başını örtərək iştirak edib.
Ancaq İranın ölkə kimi rəsmi protokol qaydasına bələd olanlar bilir ki, Milli Məclisin sədri Sahibə Qafarovanın geyimində heç bir problem olmayıb. Çünki o, İranda qəbul olunmuş protokola uyğun geyinib. İrana gələn Avropa ölkələrinin nümayəndələri də bu protokola riayət edir. Bu baxımdan spikerə yönəlik ittihamları nə dərəcədə əsaslı saymaq olar?
Arzu Nağıyev: “Hər şey protokola uyğun olub”
Deputat Arzu Nağıyev hesab edir ki, belə məsələlərin qabardılması heç bir məntiqə sığmır: “Spiker Sahibə Qafarovanın İran səfəri ilə bağlı verilən açıqlamalar Milli Məclisin üzvlərini nüfuzdan salmaq xarakteri daşıyır. Bunlar Sahibə Qafarovanın protokola uyğun geyim tərzinin nədən ibarət olduğunu bilməyən insanların mülahizələridir. Düşünürəm ki, hər şey protokola uyğun olub. Lakin məqsədyönlü, qərəzli şəkildə məlumatlar yaymaqla məşğul olan bir qrup mövcuddur”.
Elşən Həsənov: “Yalnız ölkəsində birinci şəxs olanlarla görüşdə hər iki dövlətin bayrağı yanaşı qoyulub”
Azərbaycan Sosialist Partiyasının sədri Elşən Həsənov qəzetimizə bildirdi ki, Milli Məclisin spikeri Sahibə Qafarovanın İranda yeni seçilən prezidentlə görüşü zamanı çarşab geyməsi və qəbulda Azərbaycan bayrağının asılmaması hələ də müxtəlif variantlarda təhlil olunur: “İran bunun protokol qaydası olduğunu izah etsə də, sosial şəbəkə istifadəçiləri, o cümlədən bir çox politoloq bu cavabın bəhanə olduğunu iddia edərək, əslində İranın bununla Azərbaycana mənfi münasibətini ortaya qoyduğunu bildirir. Doğru qənaətə gəlmək üçün başqa ölkələrdən gedən qonaqlarla bağlı davranışları müqayisə etmək kifayətdir. İş burasındadır ki, həmin andiçməyə Sahibə Qafarova tək qatılmayıb. İbrahim Rəisinin andiçmə mərasimində iştirak etmək üçün 73 ölkədən 115 rəsmi şəxs iştirak edib. Onlardan 10-u prezident, 20-si parlament sədri, 11-i xarici işlər naziri olub. İbrahim Rəisinin onların əksəriyyəti ilə görüşü olub. Hamısı ilə bağlı da fotolar və süjetlər təqdim edilib. Onların təhlili göstərir ki, yalnız ölkəsində birinci şəxs olanlarla görüşdə hər iki dövlətin bayrağı yanaşı qoyulub. Məsələn, Rusiya Dumasının sədri Volodinlə görüşdə də biz gördük ki, yalnız İranın bayrağı var. Onda bu, İranın Rusiyaya qarşı hörmətsilzik etdiyi anlamına gəlir? Adi protokol qaydasından belə nəticələri çıxarmaq doğru deyil. İranda rəsmi səfərdə olan istənilən ölkənin xanım rəhbərlərinin geyimi İslam qaydalarına uyğunlaşdırılır. Bu da yalnız Sahibə Qafarova ilə bağlı məsələ deyil. Yaxşı olardı ki, Ermənistanın niyə həmin andiçmədə birinci şəxs qismində iştirakını, Rəisi ilə Paşinyan arasında olan danışığın detallarını və bunun bizə təsir perspektivlərini müzakirə edək”.
Məhəmmədəli QƏRİBLİ
