Amerika Birləşmiş Ştatlarının (ABŞ) Ermənistandakı səfiri Lin Treysinin öz məzuniyyətini ermənilərin “Sünik” adlandırdığı tarixi Azərbaycan ərazisi olan Qərbi Zəngəzurda keçirdiyi barədə məlumatlar yayılıb.
Səfirin hansı səbəbdən məzuniyyətini keçirmək üçün “Sünik”i seçdiyinə gəlincə, o, müsahibəsində qeyd edib ki, onu buranın gözəl təbiəti, aylı gecələri, “qonaqpərvər insanları” cəlb edib, ona görə də bir həftəlik məzuniyyətini orada keçirib. Həmçinin səfir Ermənistanın “zəngin tarixi və mədəniyyəti” haqqında da danışıb. Deyib ki, “Sünik” çox gözəl yerdi və başqalarına da bura gəlməyi tövsiyə edib.
ABŞ-ın Ermənistandakı səfiri bilmir ki, ağızdolusu təriflədiyi “Sünik” Azərbaycanın tarixi Qərbi Zəngəzur torpağıdır?
“ABŞ səfiri tarixi həqiqəti görməzdən gələrək. sadəcə olaraq bu məsələlərdə açıq şəkildə Ermənistanpərəst mövqe sərgiləyir”
Azərbaycan Milli Elmlər Akademiyasının (AMEA) Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, siyasi icmalçı Faiq Ələkbərli “Bakı-Xəbər”ə şərhində bildirdi ki, ABŞ-ın Ermənistandakı səfirinin belə bir davranış sərgiləməsi ABŞ-ın 100 ildir yürütdüyü ikiüzlü siyasətin növbəti göstəricisidir. “ABŞ-ın Ermənistandakı səfiri çox gözəl bilir ki, “Sünik” deyə mədh etdiyi ərazi Azərbaycanın tarixi torpağıdır. Buranın Qərbi Zəngəzur olduğunu və bu ərazinin Ermənistana qanunsuz olaraq verildiyini səfir hamıdan yaxşı bilir, sadəcə özünü bilməmiş kimi göstərib. ABŞ səfiri sadəcə olaraq bu məsələlərdə açıq şəkildə tarixi həqiqəti görməzdən gələrək Ermənistanpərəst mövqe sərgiləyir və Ermənistana göstərmək istəyir ki, ABŞ onları Rusiyadan çox istəyir. Bu bir tərəfdən Ermənistanın Rusiyadan qopardılaraq ABŞ-a tərəf çəkilməsi niyyəti güdür. Ancaq biz ABŞ-ın ikiüzlü siyasətini indi görmürük, yüz il bundan əvvəl də görmüşük. Çünki o zaman Zəngəzurun və Naxçıvanın Ermənistana, o dövrkü Ararat Respublikasına verilməsi ilə bağlı ABŞ tərəfəfindən Cumhuriyyət rəhbərliyinə təklif edilmişdi. Yəni ABŞ səfiri o torpaqların Azərbaycanın tarixi ərazisi olduğunu çox yaxşı bilir. ABŞ bizə münasibətdə həmişə ikiüzlü siyasət yürüdüb”.
Qərbi Zəngəzuru “Sünik” olaraq vurğulamaqla səfirin əsas məqsədinin 10 noyabr razılaşmasına kölgə salmaq olduğunu deyən F.Ələkbərlinin sözlərinə görə, səfir bununla öz ölkəsinin Zəngəzur dəhlizinin açılmasına müsbət yanaşmadığını erməni cəmiyyətinə çatdırmaq istəyib. “Səfirin hərəkətindən də görsənir ki, ABŞ bütün hallarda 10 noyabr bəyanatının icrasına, Zəngəzur dəhlizinin açılmasına dolayısı ilə mane olmağa çalışır. ABŞ burada öz maraqlarını ortaya qoymaq üçün səfirin dili belə fikirlər açıqlayır. Ora qətiyyən “Sünik” deyil, Qərbi Zəngəzurdu. ABŞ səfiri də buranın qədim türk torpağı olduğunu çox əla bilir” - deyə F.Ələkbərli qeyd etdi.
İradə SARIYEVA
